ភ្នំពេញ ៖ ប្រជាពលរដ្ឋ ចំនួន៥៥៤គ្រួសារ រស់នៅ ៣សង្កាត់ នៃខណ្ឌដូនពេញ បានទទួលប័ណ្ណកម្មសិទ្ធិសម្គាល់ម្ចាស់អចលនវត្ថុដែលផ្តល់ជូនដោយអាជ្ញាធររាជធានីភ្នំពេញ កាលពីព្រឹកថ្ងៃទី២៥ មិថុនានេះ នៅសាលាខណ្ឌដូនពេញ ដែលមានលោកឃួង ស្រេងអភិបាលនៃគណៈអភិបាលរាជធានីភ្នំពេញ ជាអធិបតី។ រាជរដ្ឋាភិបាល បានផ្តល់ជាកម្មសិទ្ធិ ជូនប្រជាពលរដ្ឋ រស់នៅក្នុងរាជធានីភ្នំពេញ បើគិតមកដល់ពេលនេះ មានប្រមាណជាង១៥ម៉ឺនក្បាលដីហើយ ក្នុងគម្រោងទិន្នន័យ សរុបជាង២២ម៉ឺនក្បាលដី។
លោកសារិន វណ្ណា ប្រធានមន្ទីររៀបចំដែនដី សំណង់ និងសុរិយោដី រាជធានីភ្នំពេញ មានប្រសាសន៍លើកឡើងថា គម្រោងរៀបចំដែនដី និងរដ្ឋបាលដីធ្លីរាជធានីភ្នំពេញ បានចាប់ផ្តើមនៅខែតុលា ឆ្នាំ២០០៣ រហូតមកដល់បច្ចុប្បន្នគម្រោងចុះបញ្ជីដីធ្លីបាន៦០ សង្កាត់ ក្នុងរាជធានីភ្នំពេញ ។ គម្រោងប្រមូលទិន្នន័យសរុប បាន២២៧១៦៤ក្បាលដី និងចែកជូនប្រជាពលេដ្ឋបាន១៥២២៣០ប័ណ្ណ។
លោកបន្តថា កន្លងមកក្នុងសង្កាត់ទាំងនេះ បានចែកប័ណ្ណកម្មសិទ្ធិរួចហើយ។ តំបន់មួយចំនួនត្រូវបានឃ្វៀលចេញពីដីសាធារណៈរបស់រដ្ឋ។ រាជរដ្ឋាភិបាល បានធ្វើការប្រទានកម្ម ជូនប្រជាពលរដ្ឋដែលបានតាំងទីលំនៅបណ្តោះអាសន្នជាយូរមកហើយ។ ជាក់ស្តែងសម្រាប់ពេលនេះ ពោលគឺក្រោយពីបានធ្វើការបណ្តុះបណ្តាល គណៈកម្មការរដ្ឋបាលដីធ្លី ការបោះពុម្ពប័ណ្ណកម្មសិទ្ធិ កម្មវិធីអនុវិស័យរដ្ឋបាលដីធ្លី រាជធានីភ្នំពេញ បានសម្រេចនូវការផ្តល់ប័ណ្ណកម្មសិទ្ធិ ជូនប្រជាពលរដ្ឋស្ថិតនៅភូមិ១១ , ១២ , ១៣ សង្កាត់ស្រះចក ភូមិ១០ សង្កាត់វត្តភ្នំ និងភូមិ១២ សង្កាត់ផ្សារថ្មីទី៣ ខណ្ឌដូនពេញ ។
លោក សារិន វណ្ណា បានថ្លែងបន្តថា ការចុះបញ្ជីដីធ្លីមានលក្ខណៈជាប្រព័ន្ធ ជាវិធីសាស្ត្រមួយ ដែលយើងអាចធ្វើការចុះបញ្ជីដីធ្លីបានយ៉ាងច្បាស់មានប្រសិទ្ធភាព មានតម្លាភាព និងធានាបាននូវភាពកក់ក្តៅ ជូនបងប្អូនប្រជាពលរដ្ឋ ក្នុងការកាន់កាប់ដីធ្លី និងធានាសុវត្ថិភាពដីធ្លី ។ ការគ្របគ្រងដីធ្លីបានល្អ ជាមូលដ្ឋានឲ្យរដ្ឋ គិតគូរប្រមូលចំណូលចូលថវិកាជាតិ និងផ្តល់លក្ខណៈងាយស្រួលដល់ការជំរុញកិច្ចវិនិយោគ លើកស្ទួយសេដ្ឋកិច្ចជាតិ ។ ម្យ៉ាងទៀត គឺជាការរួមចំណែកយ៉ាងពិតប្រាកដ ក្នុងការអនុវត្តនយោបាយរបស់រាជរដ្ឋាភិបាល ក្នុងការកាត់បន្ថយភាពក្រីក្រ ការអភិវឌ្ឍសង្គមប្រកបដោយចីរភាព ។
លោក សារិន វណ្ណា បានឲ្យដឹងទៀតថា “មុននឹងចេញប័ណ្ណកម្មសិទ្ធិ សម្គាល់អចលនវត្ថុ គឺក្រុមមន្ត្រីជំនាញសូរិយាដីបានចុះមកធ្វើការវាស់វែង ក្បាលដីជូនប្រជាពលរដ្ឋជាច្រើនខែ មកហើយ រហូតមកដល់ពេលនេះ ទើបបងប្អូនទទួលនូវប័ណ្ណកម្មសិទ្ធិជាផ្លូវការ។
លោក ឃួង ស្រេង អភិបាលរាជធានីភ្នំពេញ ក្នុងឱកាសនោះបានមានប្រសាសន៍ថា កម្មសិទ្ធិមួយសន្លឹកនេះ គឺមានតម្លៃស្មើនឹងតម្លៃផ្ទះឬក្បាលដីនីមួយៗ ។ ដូចនេះសូមបងប្អូនថែរក្សាប័ណ្ណ ឲ្យបានល្អ និងមានសុវត្ថិភាពបំផុត។ ជាពិសេសនោះសូមបងប្អូនកុំយកវាទៅអ៊ុតរឹង ពីព្រោះវាអាចធ្វើប័ណ្ណនេះខូច នៅពេលដែលយើងយកប័ណ្ណនេះ ទៅចុះបញ្ជីបន្ត ។
លោកអភិបាលរាជធានីភ្នំពេញ បានស្នើដល់ប្រជាជន ពិចារណាឲ្យបានម៉ត់ចត់ ក្នុងករណីបងប្អូន យកប័ណ្ណកម្មសិទ្ធិនេះយកទៅដាក់ធនាគារ ដើម្បីយកថវិកាទៅប្រើប្រាស់ ឬដោះស្រាយបញ្ហាអ្វីមួយ ។
លោកអភិបាលរាជធានីភ្នំពេញ បានបញ្ជាក់ឲ្យដឹងទៀតថា នេះគឺជាយុទ្ធសាស្ត្រចតុកោណ របស់រាជរដ្ឋាភិបាល លើវិស័យដីធ្លីគឺធ្វើយ៉ាងឲ្យប្រជាពលរដ្ឋ គ្រប់គ្នាទទួលបាននូវប័ណ្ណកម្មសិទ្ធិដីធ្លី និងក៏ជាយុទ្ធសាស្ត្រ កាត់បន្ថយភាពក្រីក្រផងដែរ។
ការដែលចែកប័ណ្ណកម្មសិទ្ធិ ដល់ប្រជាពលរដ្ឋ មានការយឺតយ៉ាវ ដោយសារប្រជាពលរដ្ឋ រស់នៅលើដីកម្មសិទ្ធិរបស់រដ្ឋ ហើយរដ្ឋបាលរាជធានីភ្នំពេញ រងចាំការអនុញ្ញតពីសម្តេចតេជោ ហ៊ុន សែន នាយករដ្ឋមន្ត្រី ដើម្បីធ្វើសម្បទាន ជូនដល់ប្រជាពលរដ្ឋទាំងអស់គ្នា៕ ដោយ ៖ កូឡាប