សារព័ត៌មាន CBS News បានរាយការណ៍កាលពីថ្ងៃអាទិត្យថា ក្មេងជំទង់កាលីហ្វ័រនីញ៉ាម្នាក់ ដែលបានជួយបុរសពិការភ្នែកនិងថ្លង់ម្នាក់ ដែលនៅម្នាក់ឯងនៅលើជើងហោះហើរឆ្លងប្រទេស បានកំពុងទទួលការកោតសរសើរជាខ្លាំងនៅលើអ៊ិនធើរណេត ។
ក្មេងស្រីជំទង់នេះមានឈ្មោះថា Clara Daly កំពុងស្ថិតនៅលើជើងហោះហើរ Alaska Airlines ជាមួយម្តាយរបស់នាងឈ្មោះ Jane កាលពីសប្តាហ៍មុន ។ បន្ទាប់ពីយន្តហោះបានចេញដំណើរ និងនៅពេលនោះ ការប្រកាសមួយត្រូវបានធ្វើឡើងតាមរយៈអូប៉ាល័រ (Speaker) របស់យន្តហោះ ដើម្បីសួរថាតើមានអ្នកណាចេះភាសាគទេ? ។
Clara ដែលបានចាប់ផ្តើមយល់ដឹងពីសញ្ញាភាសាគ បានរយៈពេលប្រហែល១ឆ្នាំមកហើយ ក្នុងការទំនាក់ទំនងជាមួយមនុស្សគយ៉ាងល្អ បានស្ម័គ្រចិត្តជួយដល់ពួកគេ ។
Clara បានប្រាប់ CBS Los Angeles ថា៖ «អ្នកបំរើលើយន្តហោះបានគិតថា បុរសវ័យចំណាស់នោះនឹងអាចត្រូវការអ្វីមួយ ហើយពួកគេពិតជាពុំចេះប្រើភាសាគថ្លង់បានទេ» ។
បុរសពិការភ្នែក និងថ្លង់នោះមានឈ្មោះ Tim Cook កំពុងស្ថិតនៅលើផ្លូវធ្វើដំណើររបស់គាត់ ទៅកាន់ប្រទេសប៉ូឡូញវិញ បន្ទាប់ពីគាត់បានទៅលេងបងស្រីរបស់គាត់នៅ Boston ។ នេះបើយោងតាម CNN ។
Clara បានប្រើសញ្ញាអក្សរនីមួយ ទៅនឹងបាតដៃរបស់បុរសនោះ និងជួយគាត់ទំនាក់ទំនងជាមួយអ្នកបំរើលើយន្តហោះ ដូចជាជួយគាត់ស្នើសុំទឹក និងតើយន្តហោះចាកចេញនៅម៉ោងប៉ុន្មានជាដើម ។
នៅចុងពេលវេលាហោះហើរ ៦ ម៉ោង លោក Cook បានស្នើសុំនាងឲ្យជួយគាត់ម្តងទៀត ។
Clara បាននិយាយថា៖ «គាត់មិនត្រូវការអ្វីៗទេ ។ គាត់គ្រាន់មានអារម្មណ៍ឯកោ និងចង់និយាយទៅកាន់អ្នកដទៃប៉ុណ្ណោះ» ។
Jane ថតរូបនៃសកម្មភាពរបស់ Clara ជួយបុរសវ័យចំណាស់នេះ និងចែករំលែករូបភាពទាំងនោះនៅលើ Facebook បន្ទាប់ពីពួកគេបានចុះចតមកដល់ផ្ទះវិញនៅក្នុងរដ្ឋកាលីហ្វ័រញ៉ា ។
អ្នកដទៃទៀតនៅលើជើងហោះហើរនេះ ក៏បានបង្ហោះរូបភាពអំពីហេតុការណ៍គួរឲ្យសរសើរនេះ នៅលើ Facebook ផងដែរ ក្នុងនោះ អ្នកដំណើរម្នាក់ឈ្មោះ Lynette Scribner ដែលបានថតរូបមួយពីខណៈពេលដែល Clara កំពុងមានទំនាក់ទំនងជាមួយបុរសនោះ ។ រូបភាពបង្ហោះនោះ ត្រូវបានចែករំលែកជាងកន្លះលានដង ៕ ចន្ទី