ភ្នំពេញ៖ នៅថ្ងៃ ទី២៥ ខែមិថុនា ឆ្នាំ២០១៨ លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា អនុញ្ញាតឲ្យ លោកស្រី Pauline Tamesis តំណាងអង្គការសហប្រជាជាតិប្រចាំនៅកម្ពុជា ជួបសម្តែងការគួសម និងពិភាក្សាការងារ នៅទីស្តីការក្រសួង។
លោក វង សូត បានប្រាប់តំណាងអង្គការសហប្រជាជាតិប្រចាំកម្ពុជាថា ក្រសួងបានរៀបចំទីតាំងថ្មីមួយ សម្រាប់ ដាក់អ្នកទោសជាអនិតិជន ដែលបច្ចុប្បន្ននេះ ពួកគេយ៉ាងហោចណាស់មានជាង ១៤០០នាក់កំពុងជាប់ឃុំឃាំងជាមួយអ្នកទោសដែលជាមនុស្សពេញ វ័យនៅតាមពន្ធនាគារនានា។ កន្លែងសម្រាប់ដាក់អ្នកទោសដែលជាអនិតិជននេះមានទីតាំងក្នុងខេត្ត កណ្តាល និងអាចដាក់អោយប្រើប្រាស់ក្នុងឆ្នាំ២០១៩ ខាងមុខ។
លោក វង សូត បានលើកឡើងថា បច្ចុប្បន្ននេះ មានក្មេងមិនទាន់គ្រប់វ័យ ឬ ដែលយើងហៅថាអនិតិជនយ៉ាងហោចណាស់ជាង ១៤០០នាក់ កំពុងជាប់ឃុំឃាំងជាមួយអ្នកទោស ដែលជាមនុស្សពេញវ័យនៅតាមពន្ធនាគារនានា ហើយនៅពេលខាងមុខយើងនឹងញែកពួកអោយទៅនៅ កន្លែងផ្សេងដាច់ដោយឡែកពីអ្នកទោសដែលជាមនុស្សពេញវ័យ ដោយក្រសួងសង្គមកិច្ចត្រូវរៀបចំកន្លែង ថ្មីសម្រាប់ពួកគេនៅក្នុងខេត្តកណ្តាល ហើយអាចនឹងដាក់ឲ្យប្រើប្រាស់នៅឆ្នាំ២០១៩ខាងមុខនេះ។
រដ្ឋមន្ត្រីបានគូសបញ្ជាក់ថា ការដាក់អ្នកទោសជាអនិតិជនអោយនៅដាច់ដោយឡែកពីអ្នកទោស ជាមនុស្សពេញវ័យគឺជារឿងសំខាន់ គឺជារឿងដែលយើងត្រូវធ្វើ ព្រោះជាការផ្តល់ឱកាសអោយយើងអាច អប់រំគេបានច្រើន ដើម្បីកុំអោយគេប្រព្រឹត្តបទល្មើសជាថ្មីម្តងទៀតនៅក្រោយការរួចទោសទណ្ឌ ឬក្រោយ ការចាកចេញពីមណ្ឌលអប់រំកែប្រែ។
លោកស្រី Pauline Tamasis តំណាងអង្គការសហប្រជាជាតិថ្មីប្រចាំកម្ពុជាបាន បានថ្លែង កោតសសើរចំពោះការបំពេញកិច្ចការសង្គមកិច្ចបានយ៉ាងល្អរបស់ក្រសួងសង្គមកិច្ច។ ភាគីសហប្រជាជាតិនឹងនៅតែបន្តកិច្ចសហការជាមួយក្រសួងជាបន្តទៀតដើម្បីរក្សានិរន្តរភាព ការងារ និងការផ្តល់អត្ថប្រយោជន៍ទៅដល់ក្រុមជនដែលជាគោលដៅ ៕ ដោយ៖បញ្ញាស័ក្តិ