ខេត្តមណ្ឌលគិរី៖ នាយផ្នែករដ្ឋបាលព្រៃឈើកែវសីមា ខេត្តមណ្ឌលគិរី ឈ្មោះ លោក ជុយ សុឃាង ដែលតែងមានរឿងអាស្រូវ និងរងការចោទប្រកាន់ថាចំរិតទារប្រាក់ពីឈ្មួញរកស៊ីបទល្មើសព្រៃឈើជាបន្តបន្ទាប់នោះ បានរងការចោទប្រកាន់ជាថ្មីម្ដងទៀត ដោយមានប្រភពមួយចំនួនបានអះអាងថា លោក ជុយ សុឃាង នាយផ្នែករដ្ឋបាលព្រៃឈើកែវសីមា បានលួចយក វត្ថុតាងល្មើសដែលបង្ក្រាបបាន យកទៅលក់ជាថ្នូរនិងផលប្រយោជន៍ផ្ទាល់ខ្លួន។
យោងតាមប្រភពច្បាស់ការមួយបានបង្ហើបឲ្យដឹងថា លោក ជុយ សុឃាង ដែលមានតួនាទីជានាយផ្នែករដ្ឋបាល ព្រៃឈើកែវសីមា កាលពីពេលថ្មីៗនេះបានប្រើមនុស្សជិតស្និត ឲ្យយកវត្ថុតាងល្មើសដែលផ្នែករដ្ឋបាលព្រៃឈើកែវសីមា បង្ក្រាបបានតែមិនចុះបញ្ជីនោះ យកទៅលក់ជាបន្តបន្ទាប់ចំនួន៣លើក ដោយលើកទី១ លោក ជុយ សុឃាង បានប្រើ មនុស្សម្នាក់នោះ ឲ្យយកឈើប្រភេទធ្នង់ ទំហំ១២ជុំ ៤តឹង ចំនួន៣ឡាន កាមរីបាឡែន យកទៅលក់ឲ្យឈ្មួញវៀតណាម ហើយរំលងបានប៉ុន្មានថ្ងៃទៀតលោកបានប្រើមនុស្សដដែលឲ្យយកឈើប្រភេទបេង ចំនួន១ឡានកាមរីហើមកែច្នៃ យកទៅលក់ឲ្យឈ្មួញវៀតណាមម្ដងទៀត។ ចំណែកលើកចុងក្រោយ លោកបានចាត់ឲ្យមនុស្សម្នាក់នោះ យកឡានកាមរី ហើមកែច្នៃ ០១គ្រឿង ពណ៌សំបកឪឡឹក ពាក់ស្លាកលេខ កណ្ដាល ២A ១៦៤៦ ទៅលក់ឲ្យបុគ្គលម្នាក់ក្នុងស្រុកកែវសីមា ដែលសរុបទឹកប្រាក់ដែលលោក ជុយ សុឃាង ទទួលបានពីការលក់វត្ថុតាងល្មើសនេះ គឺបានប្រហែល២០លានរៀល ។
ពាក់ព័ន្ធនិងករណីនេះ លោក ជុយ សុឃាង នាយផ្នែករដ្ឋបាលព្រៃឈើកែវសីមា មិនទាន់អាចសុំការបកស្រាយ លើការចោទប្រកាន់ខាងលើបានទេ ។ ចំណែកនាយខណ្ឌរដ្ឋបាលព្រៃឈើមណ្ឌលគិរី លោក អ៊ុំ វ៉ាន់សុភៈ បានថ្លែងថា ករណីនេះលោកពុំបានដឹង នោះទេ ប៉ុន្តែទោះជាយ៉ាងណា លោកមិនគាំទ្រមន្ត្រីខិលខូចជាដាច់ខាត ប្រសិនបើលោក ជុយ សុឃាង ពិតជាបានប្រព្រឹត្តមែននោះ គឺបុគ្គលនេះត្រូវទទួលខុសត្រូវចំពោះមុខច្បាប់ដោយខ្លួន ហើយរឿងពិតយ៉ាងណានោះ ត្រូវរងចាំស្ថាប័នតុលាការស្រាវជ្រាវ សិន។
ជាមួយគ្នានេះដែរ លោក ម៉ម វណ្ណដា ព្រះរាជអាជ្ញារង និងជាអ្នកនាំពាក្យសាលាដំបូងខេត្តមណ្ឌលគិរី បានថ្លែងថា ពាក់ព័ន្ធនិងករណីនេះលោកពុំបានដឹងទេ ហើយលោកបញ្ជាក់យ៉ាងខ្លីថា មិនអាចឆ្លើយតបជុំវិញករណីនេះបាន៕ ដោយ៖ សមុទ្រឈើ