ខេត្តព្រះសីហនុ៖ ប្រជាពលរដ្ឋរស់នៅសង្កាត់លេខ១ ក្រុង-ខេត្តព្រះសីហនុ បង្ហាញការសង្ស័យថា ទីតាំងដីមួយកន្លែង ដែលពួកគាត់ធ្លាប់រស់នៅ ប៉ុន្តែក្រោយមកត្រូវបានអាជ្ញាធររដ្ឋបាលខេត្តបណ្តេញចេញ និងគំរាមចាប់ដាក់គុក ដោយចោទថា ពួកគាត់បានទៅរស់នៅលើដីរដ្ឋខុសច្បាប់។ ប៉ុន្តែពេលនេះពួកគាត់មានចម្ងល់ថា ហេតុអ្វីបានជាទីតាំងដី ដែលបណ្តេញពួកគាត់ចេញនោះ បែរជាធ្លាក់ទៅដល់ដៃអង្គភាពតំបន់ប្រតិបត្តិការសឹករងខេត្តព្រះសីហនុទៅវិញ។ ពិសេសជាងនេះទៀត ដីទីតាំងដីដដែលនោះ កំពុងត្រូវបានគេពុះច្រៀកដីឡូត៍ៗ និងប្រកាសដាក់លក់បន្តឲ្យអតិថិជននៅតាមបណ្តាញសង្គមហ្វែសប៊ុកទៅវិញ..?។
ផ្តើមពីបញ្ហានេះ ប្រជាពលមួយចំនួនដែលអះអាងថា ធ្លាប់បានរស់នៅលើដីទីតាំងក្នុងសង្កាត់លេខ១ ហើយត្រូវបានអាជ្ញាធរបង្ខំឲ្យរុះរើផ្ទះចេញពីទីតាំងធ្លាប់រស់នៅ ក៏បានបន្តនាំគ្នាប្រមូលផ្តុំតវ៉ាដល់មុខសាលាខេត្តព្រះសីហនុជាបន្តបន្ទាប់ ដើម្បីស្នើជួបឯកឧត្តម យន្ត មីន អភិបាលខេត្តព្រះសីហនុ ជួយបំភ្លឺលើករណី រឹបអូសយកដីពីពួកគាត់យកទៅពុះច្រៀកជាឡូត៍ និងប្រកាសដាក់លក់នៅតាមបណ្តាញសង្គមហ្វែសប៊ុក។
ក្រុមប្រជាពលរដ្ឋ បានសំណូមពរដល់ ឯកឧត្តម យន្ត មីន អភិបាលខេត្តព្រះសីហនុ និងថ្នាក់ដឹកនាំស្ថាប័នពាក់ព័ន្ធថ្នាក់ជាតិ ពិសេសក្រសួងការពារជាតិ ឲ្យចុះអង្កេតលើករណីខាងលើនេះឲ្យច្បាស់លាស់ និងបង្ហាញការពិតជូនប្រជាពលរដ្ឋឲ្យបានដឹងជាសាធារណៈ ព្រោះវាអយុត្តិធ៌មបំផុតសម្រាប់ប្រជាពលរដ្ឋពួកគាត់។
ទាក់ទិនបញ្ហានេះ ប្រជាពលរដ្ឋមានមន្ទឹលថា ទីតាំងដីដែលអាជ្ញាធររដ្ឋបាលខេត្តព្រះសីហនុបណ្តេញពួកគាត់ចេញ ឬបានយកដីនោះទៅផ្តល់ជូនអង្គភាពតំបន់ប្រតិបត្តិការសឹករងខេត្តព្រះសីហនុបានអះអាងថា ទំនងជាមានអ្នកធំមានឋានៈបុណ្យស័ក្តិពាក់ផ្កាយព្រោងព្រាតលើស្មា ជាអ្នកនៅពីក្រោយខ្នង ឬយកដីមានទីតាំងនៅម្តុំតំបន់អូរអារ៉េវ ស្ថិតក្នុងសង្កាត់លេខ១ ក្រុងព្រះសីហនុ យកទៅលក់បន្តឲ្យឈ្មួញ ព្រោះបានឃើញពុះច្រៀកជាឡូត៍ៗ និងបានប្រកាសដាក់លក់នាពេលកន្លងមកនេះ។
យ៉ាងណាកដ៏ដោយចុះ យោងតាមលិខិត របស់លោកនាយឧត្តមសេនីយ៍ទោ សាវិន វិបុល មេបញ្ជាការ នៃតំបន់ប្រតិបត្តិការសឹករងខេត្តព្រះសីហនុ យោធភូមិភាគទី៣ ចុះថ្ងៃទី១៩ ខែមិថុនា ឆ្នាំ២០១៨។ លោកបានបដិសេធទាំងស្រុងចំពោះការចោទប្រកាន់ដែលថា អង្គភាពលោកបានស្នើសុំដីរដ្ឋពី ឯកឧត្តម យន្ត មីន អភិបាលខេត្តព្រះសីហនុ ដើម្បីយកទៅពុះច្រៀកជាឡូត៍ៗលក់ដូរបន្ត មានទីតាំងនៅភូមិ២ សង្កាលេខ១ ក្រុង-ខេត្តព្រះសីហនុជារឿងមិនពិតទេ។
ផ្ទុយទៅវិញ នាយឧត្តមសេនីយ៍ទោ សាវិន វិបុល បានអះអាងថា ដីដែលពុះឡូត៍នោះ គឺទុកសម្រាប់ ចែកជូននាយទាហាន នាយទាហានរង និងពលទាហានចំនួន២៤០នាក់ ឬស្មើ៨០ឡូត៍ ដោយក្នុង១ឡូត៍មានទំហំ ៥ម៉ែត្រគុណ២០ម៉ែត្រ។
នៅក្នុងលិខិតបំភ្លឺផ្ញើជូន ឯកឧត្តម យន្ត មីន អភិបាលខេត្តព្រះសីហនុ លោក សាវិន វិបុល បញ្ជាក់ថា អង្គភាពខ្លួនពិតជាបានធ្វើការពុះដីស្នើសុំនោះជាឡូត៍ៗ ដើម្បីត្រៀមចែកជូនដល់នាយទាហាន នាយទាហានរង និងពលទាហានចំនួន២៤០នាក់ ឬស្មើ៨០ឡូត៍ ដោយក្នុង១ឡូត៍ៗមានទំហំ ៥ម៉ែត្រគុណនឹង២០ម៉ែត្រពិតមែន ប៉ុន្តែមិនមែនពុះឡូត៍លក់ដូចការចោទប្រកាន់នោះទេ។
លិខិតបដិសេធរបស់ លោកនាយឧត្តមសេនីយ៍ទោ សាវិន វិបុល មេបញ្ជាការ នៃតំបន់ប្រតិបត្តិការសឹងរងខេត្តព្រះសីហនុ យោធភូមិភាគទី៣ខាងលើនេះ បានធ្វើឡើងបន្ទាប់ពីមានប្រជាពលរដ្ឋមួយចំនួន ដែលអះអាងថាធ្លាប់រស់នៅលើដីខាងលើ ប៉ុន្តែក្រោយមកត្រូវបានអាជ្ញាធរបណ្តេញចេញទាំងបង្ខំ ដោយអះអាងរស់នៅលើដីរដ្ឋខុសច្បាប់។ ប៉ុន្តែពេលនេះ ពួកគាត់សង្ស័យថា ទំនងជាមានបុគ្គលមានអំណាចពាក់ផ្កាយដាបស្មា នៅក្នុងជួរស្ថាប័នកងកម្លាំងប្រដាប់អាវុធម្នាក់ ឬពីរនាក់ បម្រុងយកទីតាំងដីទីតាំងខាងលក់ឲ្យឈ្មួញដី ដើម្បីពុះឡូត៍លក់ដូរបន្ត ដោយសំអាងថា ទីតាំងដីនោះ គឺជាដីកម្មសិទ្ធិស្របច្បាប់របស់ឯកជន ដែលបានទិញពីប្រជាពលរដ្ឋ ឬទិញពី នាយទាហាន នាយទាហានរង និងពលទាហាន នៅតំបន់ប្រតិបត្តិការសឹករងខេត្តព្រះសីហនុកន្លងមក។
ទាក់ទិនបញ្ហានេះដែរ រដ្ឋបាលខេត្តព្រះសីហនុ បានឲ្យដឹងដែថា ក្រុមការងារសាលាខេត្ត ក៏កំពុងចុះអង្កេតពីភាពមិនប្រក្រតីខាងលើនេះដោយយកចិត្តទុកដាក់។ ប៉ុន្តែយ៉ាងណានោះ គឺមិនទាន់បង្ហាញលទ្ធផលឲ្យប្រជាពលរដ្ឋ ឬសាធារណៈជនបានដឹងនៅឡើយទេនៅថ្ងៃច័ន្ទ ទី២៥ ខែមិថុនា ឆ្នាំ២០១៨៕ ដោយ ៖ ដែនសីមា