ភ្នំពេញ ៖ ពាក់ព័ន្ធព័ត៌មានក្លែងក្លាយលើ Facebook ថាមាន ISIS ដើរចាក់បញ្ចូលមេរោគអេដស៍ ដល់ពលរដ្ឋកម្ពុជានោះ នៅថ្ងៃទី២៥ខែមិថុនា អគ្គស្នងការដ្ឋាននគរបាលជាតិ បានសេចក្តីជូនដំណឹងថា បើបងប្អូនប្រជាពលរដ្ឋជួបហេតុការណ៍បែបនេះ សូមកុំជឿឲ្យសោះ ព្រោះវាជាហេតុការណ៍មិនពិត ហើយប្រញ៉ាប់រាយការណ៍ មកអគ្គស្នងការដ្ឋាននគរបាលជាតិ ដើម្បីចាត់វិធានការ ។
សូមបញ្ជាក់ថា ហេតុការណ៍នេះត្រូវបានគេបង្ហោះនៅតាមបណ្តាប្រទេសផ្សេងៗ ហើយបច្ចុប្បន្នបានហូរចូលមកដល់ប្រទេសកម្ពុជា ក៏ប៉ុន្តែហេតុការណ៍នេះ គឺវាមិនពិតនោះទេ វាជាហេតុការណ៍ក្លែងក្លាយ។
អគ្គស្នងការដ្ឋាននគរបាលជាតិ នៅថ្ងៃទី២៥ ខែមិថុនា ឆ្នាំ២០១៨នេះ បានសេចក្តីផ្សព្វផ្សាយ កុំឱ្យប្រជាពលរដ្ឋ ជឿចំពោះការចែកចាយតាមបណ្តាញសង្គម Facebook នាថ្មីៗនេះដែលថា មានក្រុមរដ្ឋឥស្លាម (ISIS) កំពុងដើរចាក់បញ្ចូលមេរោគអេដស៍ ដល់ប្រជាពលរដ្ឋ នៅតាមផ្ទះសម្បែងនៅក្នុងប្រទេសកម្ពុជា។
ប្រតិកម្មរបស់អគ្គស្នងការដ្ឋាននគរបាលជាតិ បានធ្វើឡើងបន្ទាប់ពីមានព័ត៌មានដែលបានបង្ហោះតាមបណ្តាញសង្គម Facebook ដើម្បីបំភាន់ដល់ប្រជាពលរដ្ឋខ្មែរ។
ខ្លឹមសារបោកប្រាស់នោះ បានបញ្ជាក់យ៉ាងដូច្នេះថា៖ “សូមប្រុងប្រយ័ត្ន….ប្រសិនបើនរណាម្នាក់មកគោះទ្វារផ្ទះរបស់អ្នក ហើយនិយាយថា យើងមកពីមហាវិទ្យាល័យវេជ្ជសាស្ត្រចង់សាកល្បងជាតិស្ករក្នុងឈាមរបស់អ្នកដោយ ឥតគិតថ្លៃនោះ សូមលោកអ្នកកុំផ្តល់ការអនុញ្ញាតឱ្យគេធ្វើតេស្តឱ្យសោះ។ សូមហៅទូរស័ព្ទទៅកាន់ប៉ូលិសភ្លាមៗ។ ពួកគេគឺជាភេរវកម្ម I.S.I.S ពួកគេគឺដើម្បីចាក់ H.I.V មេរោគអេដស៍ចូលទៅក្នុងឈាមរបស់លោកអ្នក។ សូមចែករំលែកព័ត៌មាននេះ ទៅមិត្តភក្តិ និងសាច់ញាតិរបស់លោកអ្នក។ សូមអរគុណពីប៉ូលិស” ៕ ដោយ៖កូឡាប
