ថ្មីៗនេះ អ្នកនិយមមុជទឹកនៅបាតសមុទ្រម្នាក់ឈ្មោះ Eli Wolpin បានឆ្លងកាត់នូវការភ័យស្ទើជ្រុះសក់គ្រាដែលមុជចុះទឹកសមុទ្រនៅតំបន់ងងឹត នា British Columbia ប្រទេសកាណាដា ។
តាមព័ត៌មានដែលបង្ហោះផ្សាយឲ្យដឹងថា នៅពេលដែល Eli មុជចុះទៅក្នុងតំបន់សមុទ្រងងឹត ស្រាប់តែត្រូវមឹកយក្សដ៏ធំមួយសម្លឹងឃើញនិងតាមដាន ។ វាគិតថា Eli គឺជាចំណីយ៉ាងឆ្ងាញ់របស់វា ។
នៅពេលដែល Eli ពុំទាន់យល់ពីរឿងអ្វីផងនោះ មឹកមួយក្បាលនេះបានហែលសំដៅយ៉ាងលឿន រួចចូលកៀកគាត់ ។ បន្ទាប់មកវាបានប្រើប្រម៉ោយរបស់វាហ៊ុមព័ទ្ធរាងកាយទាំងមូលរបស់ Eli ។
រហូតទល់ពេលដែលមឹកយក្សនេះចាប់ផ្តើមក្របួចជាប់ក្បាលរបស់គាត់ ទើបគាត់ភ្ញាក់ខ្លួន ស្វែងរកវិធីរំដោះខ្លួនចេញ ។
សំណាងល្អណាស់ដែល Eli បានមុជទឹកចុះសមុទ្រងងឹតជាមួយមិត្តភក្តិដទៃទៀត ។ យ៉ាងនេះក្តីពួកគេត្រូវចំណាយពេលវេលាមួយដើម្បីធ្វើការតតាំងជាមួយប្រម៉ោយដែលមានថាមពលដ៏ខ្លាំងរបស់មឹកនេះ ។
ទិដ្ឋភាពដែល Eli ត្រូវមឹកយក្សប្រមាញ់ជាប់ បានធ្វើឲ្យមនុស្សម្នាភ្ញាក់ផ្អើលព្រោះពុំនឹកស្មានដល់ ។
ឥឡូវពួកគេបានយល់ច្បាស់ពីកម្លាំងដ៏ខ្លាំងក្លារបស់ពួកមឹកយក្សនេះ ។ វាពុំខុសអ្វីនឹងពពួកថ្លាន់ធំៗនៅអាម៉ាហ្សូនឡើយ ៕ ចន្ទ្រា