ខេត្តកំពត ៖ ប្រភពពីមន្ត្រីអាជ្ញាធរមូលដ្ឋានថ្នាក់ និងប្រជាពលរដ្ឋរស់នៅស្រុកជុំគីរី ខេត្តកំពត បានឲ្យដឹងថា មូលដ្ឋានស្រុកជុំគីរី ក៏មានបទល្មើសព្រៃឈើអនាធិបតេយ្យកើតមានរាល់ថ្ងៃ ដូចបណ្តាខេត្តមួយចំនួនទៀតដែរ។ ជាក់ស្តែងរាល់ថ្ងៃនេះ គេឃើញមានឈ្មួញឈើឈ្មោះ ប៊ុន ទូច មានតួនាទីជាគ្រូបង្រៀន បានដើរប្រមូលទិញឈើពីក្រុមឈ្មូញតូចកាច នៅស្រុកឈូក និងស្រុកជុំគីរី ដើម្បីនាំចេញទៅលក់បន្តទៅកាន់កន្លែងផ្សេងៗទៀត។
ប្រភពពីមន្ត្រីរាជការមានឋានៈទាប បានអះអាងថា រាល់ថ្ងៃនេះ ឈ្មួញឈើឈ្មោះ ប៊ុន ទូច បានបន្តដើរប្រមូលទិញឈើពីឈ្មួញឈើតូចតាចដទៃទៀត ដើម្បីដឹកចេញទៅលក់នៅតាមបណ្តាស្រុកមួយចំនួនដោយរលូន ដោយមិនឃើញមានមន្ត្រីពីស្ថាប័នពាក់ព័ន្ធផ្នែកណាមួយរួមមាន៖ មន្ត្រីជំនាញសង្កាត់រដ្ឋបាលព្រៃ និងខណ្ឌរដ្ឋបាលព្រៃឈើស្រុកជុំគីរី ព្រមទាំងសមត្ថកិច្ចពាក់ព័ន្ធទាំងនគរបាល និងកងរាជអាវុធហត្ថប្រចាំការ នៅស្រុកជុំគីរី និងស្រុកឈូកជាដើម ចេញមុខបង្ក្រាបនោះទេ។
ចំណែកប្រជាពលរដ្ឋរស់នៅស្រុកជុំគីរី ក៏បានអះអាងថា រាល់ថ្ងៃនេះឈ្មួញឈើឈ្មោះ ប៊ុន ទូច បានបន្តប្រមូលទិញឈើដែលឈ្មួញតូចតាចដឹកមកពីតំបន់ផ្សេងៗ យកមកស្តុកទុកនៅចំណុចភូមិត្រពាំងវែង ឃុំត្រពាំងរាំង ស្រុកជុំគីរី ខេត្តកំពត។
ពលរដ្ឋចោទថា សកម្មភាពប្រមូលទិញឈើរបស់ឈ្មួញឈើ ឈ្មោះ ប៊ុន ទូច នាមូលដ្ឋានស្រុកជុំគីរី និងស្រុកឈូក អាចដំណើរការទៅបានរលូន វាទាល់តែមានការបើកដៃពីមន្ត្រីជំនាញស្ថាប័នពាក់ព័ន្ធមួយចំនួន ជាថ្នូរចែករំលែកផលប្រយោជន៍ឲ្យគ្នាទៅវិញទៅមក។ ពលរដ្ឋបន្តថា បើមិនដូច្នេះទេបទល្មើសព្រៃអនាធិបតេយ្យ កំពុងកើតមាននៅស្រុកជុំគីរី និងស្រុកឈូក ខេត្តកំពត គឺមិនអាចមានដំណើរការរលូនបានទេ។
ប្រជាពលរដ្ឋស្រុកជុំគីរីបានកត់សម្គាល់ទៀតថា កន្លងមកសកម្មភាពទិញលក់ និងដឹកឈើស្ទើរខូងផ្លូវថ្នល់នាមូលដ្ឋានស្រុកជុំគីរី គឺមិនឃើញមានសមត្ថកិច្ចពាក់ព័ន្ធណាមួយចេញមុខបង្ក្រាបរថយន្តដឹកឈើ របស់ឈ្មួញឈើ ឈ្មោះ ប៊ុន ទូច ម្តងណាទេ។
ត្រង់ចំណុចនេះ ទាំងសមត្ថកិច្ចថ្នាក់ទាប និងពលរដ្ឋស្រុកជុំគីរី ចោទថា មូលហេតុមន្ត្រីជំនាញស្ថាប័នខ្លះមិនបង្ក្រាបបទល្មើសព្រៃឈើនៅមូលដ្ឋាននេះ គឺទំនងជាមន្ត្រីស្ថាប័នមួយចំនួននោះ ទទួលបានផលប្រយោជន៍លុយកាក់ប្រចាំថ្ងៃ ឬប្រចាំខេត្តពីឈ្មួញឈើឈ្មោះ ប៊ុន ទូច ដែលមានតួនាទីជាគ្រូបង្រៀន នៅស្រុកជុំគី ជាបន្តបន្ទាប់ ជាថ្នូរមិនបង្ក្រាបបទល្មើសព្រៃឈើកន្លងមក។
ពលរដ្ឋស្រុកជុំគីរី ខេត្តកំពត បានឲ្យដឹងថា រយៈពេលចុងក្រោយនេះគេឃើញឈ្មួញឈើឈ្មោះ ប៊ុន ទូច បានប្រមូលទិញឈើគ្រប់ប្រភេទចេញពីបណ្តាស្រុកផ្សេងៗយកមកស្តុកទុក នៅផ្ទះរបស់គាត់ មានទីតាំងនៅខាងត្បូងទីប្រជុំជនផ្សារជុំគីរី ខេត្តកំពត។
ផ្តើមពីបញ្ហានេះ ប្រជាពលរដ្ឋ និងមន្ត្រីរាជការមានឋានៈតូចតាច នៅស្រុកជុំគីរី ខេត្តកំពត បានសំណូមពរដល់ ថ្នាក់ដឹកនាំមន្ទីរកសិកម្មរុក្ខាប្រមាញ់ និងនេសាទ ជាពិសេសថ្នាក់ដឹកនាំរដ្ឋបាលព្រៃឈើ នៃក្រសួងកសិកម្មថ្នាក់ជាតិជួយចុះអង្កេត និងមានវិធានការទៅលើមន្ត្រីថ្នាក់ក្រោម ដែលអនុញ្ញាត ឲ្យមានបទល្មើសព្រៃឈើអាចធ្វើសកម្មភាពនៅមូលដ្ឋានស្រុកឈូក និងស្រុកជុំគីរី អនាធិបតេយ្យរាល់ថ្ងៃនេះឲ្យបានឆាប់។ ជាពិសេសត្រូវអង្កេតទៅលើសកម្មភាព របស់នាយសង្កាត់- នាយខណ្ឌព្រៃឈើស្រុកជុំគីរី និងស្រុកឈូក ត្រូវអនុវត្តការងារឲ្យបានត្រឹមត្រូវឡើងវិញ។
ទោះជាបែបនេះក្តី អ្នកយកព័ត៌មានគេហទំព័រ cen.com.khប្រចាំខេត្តកំពតមិនទាន់ទាក់ទង ឈ្មោះ ប៊ុន ទូច ដែលត្រូវប្រជាពលរដ្ឋ និងមន្ត្រីរាជការឋានៈទាបចោទប្រកាន់ថា ជាឈ្មួញព្រៃឈើនៅស្រុកជុំគីរិ ដើម្បីបំភ្លឺជុំវិញការចោទប្រកាន់បានទេតាមទូរស័ព្ទ នៅថ្ងៃអង្គារ៍ ទី២៦ ខែមិថុនា ឆ្នាំ២០១៨៕ ដែន សីមា