ខេត្តព្រះសីហនុ៖ នាវា ឬកប៉ាល់ដឹកភ្ញៀវទេសចរបរទេសចម្រុះជាតិសាសន៍ជិត ៤ ពាន់នាក់ ឈ្មោះ GENTING DREAM បានចូលចតនៅកំពុងផែអន្តរជាតិក្រុងព្រះសីហនុ វេលាម៉ោង ៨ និង៤៥នាទីព្រឹកថ្ងៃអង្គារ៍ ទី២៦ ខែមិថុនា ឆ្នាំ២០១៨ ក្នុងដំណើរធ្វើទស្សនកិច្ចរយៈពេល១ថ្ងៃ មកកាន់ប្រទេសកម្ពុជា។
លោកវរសេនីយ៍ឯក កៅ សារ៉ាណា នាយប៉ុស្តិ៍ច្រកទ្វារកំពង់ផែអន្តរជាតិក្រុងព្រះសីហនុ បានឲ្យដឹងថា នាវាទេសចរណ៍ខាងលើនេះសញ្ជាតិ BAHAMAS មានបណ្តោយ៣៣៥,៣៥ម៉ែត្រ និងទទឹង៣៩,៧០ម៉ែត្រ។ ហើយភ្ញៀវទេសចរចម្រុះជាតិសាសន៍ធ្វើដំណើរតាមនាវានោះសរុបចំនួន៣៦៧៤នាក់ ស្រី២០៤៩នាក់ និងមាន២១សញ្ជាតិ។ នាវាទេសចរណ៍នេះ មាននាវិកសរុបចំនួន១៨៣១នាក់ ស្រី ៥៤៩នាក់ និងមាន៣៣សញ្ជាតិ។
លោកវរសេនីយ៍ឯក កៅ សារ៉ាណា លោកបន្តថា មុនធ្វើដំណើរមកដល់ប្រទេសកម្ពុជា នាវាទេសចរណ៍ខ្នាតយក្សឈ្មោះ GENTING DREAM បានដឹកភ្ញៀវទេសចរបរទេសទាំងនោះ ចេញពីកំពង់ផែប្រទេសម៉ាឡេស៊ី ហើយចូលមកដល់កំពង់ផែអន្តរជាតិក្រុងព្រះសីហនុ នៅម៉ោង ៨និង៤៥នាទីព្រឹកថ្ងៃអង្គារ៍ ទី២៦ ខែមិថុនា ឆ្នាំ២០១៨។
លោកបន្តថា នាវាទេសចរណ៍ខាងលើនេះ នឹងចាកចេញពីកំពង់ផែអន្តរជាតិក្រុងព្រះសីហនុ នៅម៉ោង៧ល្ងាចថ្ងៃដដែលនេះ រួចបន្តដំណើរឆ្ពោះទៅកាន់ប្រទេសថៃទៀត។
លោកវរសេនីយ៍ឯក កៅ សារ៉ាណា បានឲ្យដឹងដូច្នេះ រួចបញ្ជាក់ថា សញ្ជាតិភ្ញៀវទេសចរបរទេសដែលធ្វើដំណើរតាមនាវាទេសចរណ៍ GENTING DREAMច្រើនជាងគេ គឺភ្ញៀវសញ្ជាតិសាំងហ្គាពួរមានចំនួន១០៣០នាក់- សញ្ជាតិឥណ្ឌូនេស៊ីចំនួន៩៣៥នាក់ – សញ្ជាតិម៉ាឡេស៊ីចំនួន៦៨៣នាក់ ហើយក្រៅពីនោះមានសញ្ជាតិផ្សេងៗ។ ក្នុងនោះក៏មានភ្ញៀវទេសចរបរទេសធ្វើដំណើរមកពីខេត្តសៀមរាបចំនួន២នាក់(ស្រី)មកជិះនាវាទេសចរណ៍នេះចាកចេញពីកម្ពុជាផងដែរ៕ ដែន សីមា