”ពួកយើងសុំទោសដោយសម្លាប់ច្រឡំមនុស្ស” -នោះជាពាក្យស្តាយក្រោយរបស់ក្រុមឧក្រិដ្ឋជនតាមដងផ្លូវដ៏ល្បីឈ្មោះ Trinitarios នៅញូវយ៉ក អាមេរិក ចំពោះគ្រួសារជនរងគ្រោះ ។
នៅម៉ោងប្រមាណ ១១និង៤០នាទី យប់ថ្ងៃទី ២០ ខែមិថុនា ក្មេងជំទង់អាយុ ១៥ឆ្នាំម្នាក់ ឈ្មោះ Lesandro Guzman-feliz ត្រូវបុរស ២នាក់ អូសទាញចេញពីក្នុងហាងលក់ទំនិញនៅសង្កាត់ The Bronx , ញូវយ៉ក ។ ក្នុងពេលនោះមនុស្ស ៣នាក់ ផ្សេងទៀតបានឈរចាំជាស្រេចនៅក្រៅហាង រួចដើរតាមក្រោយជួយដល់បុរស ២នាក់នេះ ។
Lesandro ត្រូវអូសទៅដល់ជ្រុងមួយនៃ Bronx River Parkway និង Gun Hill Road រួចត្រូវពួកវាចាក់រាប់សិបកាំបិត ។ ក្រោយពេលត្រូវចាក់ Lesandro បានប្រឹងប្រែងទៅមន្ទីរពេទ្យ St Barnadas តែដោយសារមុខរបួសធ្ងន់ធ្ងរពេក គេមិនអាចឆ្លងផុតគ្រោះថ្នាក់បាន ។
ក្រោយពេលស៊ើបអង្កេត ប៉ូលិសឲ្យដឹងថា ករណីឃាតកម្មនេះអាចពាក់ព័ន្ធដល់ក្រុមឧក្រិដ្ឋជនតាមដងផ្លូវល្បីឈ្មោះកំណាច Trinitarios នៅញូវយ៉ក ។
មូលហេតុនាំដល់ឃាតកម្មនេះអាចពាក់ព័ន្ធដល់វីដេអូមួយអំពីការ “រួមភេទ” ត្រូវបានបង្ហោះលើ Facebook ថ្មីៗនេះ ។ តាមរយៈនោះនារីនៅក្នុងវីដេអូអាចមានទំនាក់ទំនងជាមួយនឹងជនម្នាក់ក្នុងចំណោមឧក្រិដ្ឋជនទាំងនោះ ហើយជននេះបានបបួលគ្នីគ្នាទៅសម្លាប់ក្មេងប្រុសក្នុងវីដេអូ ដើម្បីសងសឹក ។ ចៃដន្យបុរសក្នុងវីដេអូ មានសក់រួញធ្វើឲ្យពួកឃាតករច្រឡំថា Lesandro ដែលធាតុពិតគេជាក្មេងដ៏ស្អាតស្អំ និងមានបំណងប្រាថ្នាក្លាយជាប៉ូលិសមួយរូបនាថ្ងៃអនាគត ។
បច្ចុប្បន្ន ប៉ូលិសបានចាប់បានជនសង្ស័យទាំង ៥នាក់ ។
គ្រួសារជនរងគ្រោះបានទទួលសារមួយជាវីដេអូប្រវែង ២នាទី ពីបុរសម្នាក់ប្រាប់ថាជាសមាជិករបស់ក្រុម Trinitarios ។ អ្នកដឹកនាំក្រុម Trinitarios បាននិយាយក្នុងវីដេអូថា “ពួកយើងសុំទោស ដោយបានសម្លាប់មនុស្ស ។ ខ្ញុំដឹងថា ឥឡូវនេះរឿងនេះក៏ពុំមានន័យអ្វីឡើយ” ៕ លីសា
ម្តាយរបស់ Lesandro ឱបសពកូនប្រុសលើកចុងក្រោយ ។
