ភ្នំពេញ ៖ និយ័តករទូរគមនាគមន៍កម្ពុជា (ន.ទ.ក) បានប្រកាសប្រាប់ទៅដល់ប្រតិបត្តិករទូរគមនាគមន៍ណាមួយឬបុគ្គលពាក់ព័ន្ធនឹងវិស័យទូរគមនាគមន៍ណាមួយ ឬសាធារណជនជាអ្នកប្រើប្រាស់បណ្តាញ និងសេវាទូរគមនាគមន៍ណាម្នាក់ បានប្រព្រឹត្តផ្ទុយនឹងបទប្បញ្ញត្តិនានា ជាធរមាន ពាក់ព័ន្ធនឹងការអនុវត្តនេះ និងខ្លឹមសារនៃសេចក្តីសម្រេចប្រកាលព័ត៌មាននោះនឹងត្រូវទទួលខុសត្រូវចំពោះមុខច្បាប់ និងបទប្បញ្ញត្តិជាធរមាន។
និយ័តករទូរគមនាគមន៍កម្ពុជា (ន.ទ.ក) បានបញ្ជ្រាប ប្រកាសអន្តរក្រសួងរវាងក្រសួងប្រៃសណីយ៍ និងទូរគមនាគមន៍ និងក្រសួងព័ត៌មាន ស្តីពីការគ្រប់គ្រងការផ្សព្វផ្សាយតាមគេហទំព័រ និងបណ្តាញទំនាក់ទំនងសង្គម ដែលដំណើរការតាមអ៊ីនធើណេតនៅកម្ពុជា និងបទប្បញ្ញត្តិរបស់ ន.ទ.ក ស្តីពីការទុកឱសានុវាទត្រឹមថ្ងៃទី១ ខែកក្កដា ឆ្នាំ២០១៨ ដើម្បីឲ្យក្រុមហ៊ុនទូរស័ព្ទចល័តទាំងអស់ ត្រូវលុបចោលជាបន្ទាន់នូវស៊ីមកាត ដែលគ្មានឯកសារសម្គាល់អត្តសញ្ញាណអ្នកប្រើប្រាស់។
បើតាមសេចក្តីប្រកាសព័ត៌មានរបស់ ន.ទ.ក នៅថ្ងៃទី២៦ ខែមិថុនានេះបានបញ្ជាក់ថា ជាក់ស្តែង កាលពីថ្ងៃទី២៥ ខែមិថុនា ឆ្នាំ២០១៨ន.ទ.ក បានកោះអញ្ជើញបណ្តាប្រតិបត្តិករទូរគមនាគមន៍ និងបុគ្គលពាក់ព័ន្ធនឹងវិស័យ ទូរគមនាគមន៍ទាំងអស់ មកចូលរួមស្តាប់ការផ្សព្វផ្សាយខ្លឹមសារ បទប្បញ្ញត្តិទាំងពីរ នៅសាលប្រជុំ ន.ទ.ក។ នៅក្នុងពិធីប្រកាសផ្សាយនេះ មានការចូលរួមជាអធិបតីរបស់តំណាងអន្តរក្រសួង មកពីអគ្គស្នងការនគរបាលជាតិ នៃក្រសួងមហាផ្ទៃ អគ្គនាយកដ្ឋានព័ត៌មាន និងសោទស្សន៍នៃក្រសួងព័ត៌មាន និងអគ្គាធិការដ្ឋាននៃក្រសួងប្រៃសណីយ៍ និងទូរគមនាគមន៍ ដែលជាភាគីមានភារកិច្ច និងតួនាទីជាអ្នកប្រតិបត្តិលើខ្លឹមសារ ប្រកាសអន្តរក្រសួង។
ការប្រកាសផ្សព្វផ្សាយនេះ មានគោលបំណង និងគោលដៅ លើកកម្ពស់ប្រសិទ្ធភាពក្នុងការអនុវត្តបទប្បញ្ញត្តិ ន.ទ.ក និងប្រកាសអន្តរក្រសួង ស្តីពីការគ្រប់គ្រងការផ្សព្វផ្សាយតាមគេហទំព័រ និងបណ្តាញទំនាក់ទំនងសង្គម ដែលដំណើរការតាមអ៊ីនធើណេត នៅកម្ពុជា សំដៅប្រឆាំង ទប់ស្កាត់ រាល់ការផ្សព្វផ្សាយ ឬចែកចាញខ្លឹមសារព័ត៌មាន ឬសារជាអក្សរ សំឡេង រូបភាព វីឌីអូ និងទម្រង់ផ្សេងៗទៀត ដែលមានចេតនាបង្កជាចលាចលបណ្តាលឲ្យ អន្តរាយដល់វិស័យការពារជាតិ សន្តិសុខជាតិ ទំនាក់ទំនងល្អជាមួយប្រទេសដទៃ សេដ្ឋកិច្ចជាតិ សណ្តាប់ធ្នាប់សាធារណៈ ការរើសអើង និងវប្បធម៌ ប្រពៃណីជាតិ និងលុបបំបាត់ចោលឲ្យអស់ ជាដាច់ខាត នូវរាល់ការប្រើប្រាស់ស៊ីមកាតទូរស័ព្ទចល័តមិនមានតម្កល់ឯកសារសម្គាល់អត្តសញ្ញាណម្ចាស់ប្រើប្រាស់សេវាទូរស័ព្ទចល័តទាំងឡាយណា ផ្ទុយនឹងច្បាប់និងបទប្បញ្ញតិ្តជាធរមាន។
និយ័តករទូរគមនាគមន៍កម្ពុជា (ន.ទ.ក)បានរំលឹកដល់បណ្តាញប្រតិបត្តិករទូរគមនាគមន៍ និងបុគ្គលពាក់ព័ន្ធនឹវិស័យទូរគមនាគមន៍ទាំងអស់ ត្រូវអនុវត្តការងាររបស់ខ្លួនស្របតាមខ្លឹមសារនៃបទប្បញ្ញតិ្តទាំងពីរនេះ ហើយត្រូវប្រុងប្រយ័ត្ននិងចៀសវាងឲ្យបានដាច់ខាត ស្របតាមសិទ្ធិសេរីភាពរបស់ខ្លួន ដែលត្រូវបានកំណត់ដោយច្បាប់ និងបទប្បញ្ញត្តិជាធរមាន៕ ដោយ៖បញ្ញាស័ក្តិ
