ស្វាយរៀង ៖ លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រីរដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច និងជាប្រធានក្រុមការងារចុះជួយខេត្តស្វាយរៀងបាន ថ្លែងអំពាវនាវដល់កម្មករកម្មការិនីទាំងអស់ត្រូវចលនាដល់ប្រជាពលរដ្ឋនៅក្នុងមូលដ្ឋានរបស់ខ្លួន ក៏ដូចជាបងប្អូន នៅក្នុងក្រុមគ្រួសារឲ្យទៅចូលរួមបោះឆ្នោត ជ្រើសតាំងតំណាងរាស្ត្រ អាណត្តិទី៦ ដែលនឹងប្រព្រឹត្តទៅនៅថ្ងៃទី ២៩ ខែកក្កដា ឆ្នាំ ២០១៨ នាពេលខាងមុខឲ្យបានគ្រប់គ្នា និងបោះឆ្នោតជូនគណបក្សប្រជានកម្ពុជាដែលមានលេខរៀងទី២០ ដើម្បីសុខសន្តិភាព កំណើនសេដ្ឋកិច្ច និងការអភិវឌ្ឍន៍របស់ប្រទេសជាតិ។
ថ្លែងបែបនេះខណៈដែលលោកជំទាវតំណាងសម្តេចអគ្គមហាសេនាបតីតេជោហ៊ុនសែននាយករដ្ឋមន្ត្រីនៃប្រទេសកម្ពុជាចុះជួបសំណេះសំណាលជាមួយកម្មករ កម្មការិនី ចំនួន ៤.០១៩នាក់ នៅតំបន់សេដ្ឋកិច្ចឈីលូ ក្រុងស្វាយរៀង ខេត្តស្វាយរៀង ថ្ងៃទី២៧ ខែមិថុនា ឆ្នាំ២០១៨។
លោកជំទាវកិត្តិសង្គហបណ្ឌិតម៉ែនសំអនបានពាំនាំនូវការផ្តាំផ្ញើរសាកសួរសុខទុក និងសេចក្តីនឹករលឹកពី សំណាក់ សម្តេចអគ្គមហាសេនាបតីតេជោ ហ៊ុន សែន ប្រធានគណបក្ស ប្រជាជនកម្ពុជា និងជានាយករដ្ឋមន្ត្រី នៃព្រះរាជាណាចក្រកម្ពុជា និងសម្តេច កិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ជូនដល់អង្គពិធីទាំងមូល និងសូមទទួលបាន នូវសុខភាពល្អ កម្លាំងពលំមាំមួន ដើម្បីបំពេញ ការងារឲ្យសម្រេចបាននូវជោគជ័យគ្រប់ៗគ្នា។
លោកជំទាវកិត្តិសង្គហបណ្ឌិតម៉ែនសំអនបានបញ្ជាក់ថាកន្លងមករាជរដ្ឋាភិបាលបានយើងបានដំណើរការរួមគ្នាដោះស្រាយបញ្ហាក្នុងរយៈពេលកន្លងទៅ ដែលមកពេលនេះបងប្អូនកម្មករ កម្មការិនី អាចយល់ដឹងហើយថា ខ្លួនឯងជាអ្នកទទួលផលទេ។
ការគិតគូរក្នុងការតម្លើងប្រាក់ខែបងប្អូនកម្មករ កម្មការិនី គឺពុំមានវត្តមានរបស់គណបក្សប្រឆាំងនោះទេ ដែលកន្លងកគេតែងនិយាយថា ការតម្លើងបៀវត្សរ៍របស់កម្មករ គឺបានមកពីការទាមទាររបស់គេ។ ការបង្កើតបានរោងចក្រ សហគ្រាសនៅតាមគ្រប់ទីកន្លែង ដែលបានដោះស្រាយការងារឲ្យក្មួយៗធ្វើ គ្មានអ្នកណាក្រៅពីគណបក្សប្រជាជន ដែលដឹកនាំរាជរដ្ឋាភិបាលនោះទេ។ ប៉ុន្តែ គេបែរជាមកអះអាងថា ពួកគេជាអ្នកខិតខំតំឡើងបៀវត្សរ៍ឲ្យកម្មករ តាមរយៈការទាមទាររបស់គេទៅវិញ។
លោកជំទាវបានបន្ថែមថាប្រសិនបើគ្មានសន្តិភាព ក៏មិនអាចមានការអភិវឌ្ឍបានទេ។ ដូច្នេះសូមបងប្អូនក្រឡេកមើលប្រទេសកម្ពុជានៃអតីតកាល សួរជីដូនជីតា ឪពុកម្តាយរបស់ក្មួយៗប្រសិនបើគាត់នៅរស់ ហើយក្រុមគ្រួសារនីមួយៗសុទ្ធតែមានអ្នកដែលបានស្លាប់ក្នុងសង្គ្រាម សុទ្ធតែមានអ្នកបានស្លាប់ក្នុងរបប ប៉ុល ពត។ សង្ឃឹមថាក្មួយៗនឹងរួមដំណើរជាមួយគ្នា ដើម្បីរក្សានូវសន្តិភាព និងការអភិវឌ្ឍឆ្ពោះទៅជាបន្តទៀត។
លោកជំទាវបានបញ្ជាក់ថា វិធីការពារសន្តិភាព និងដើម្បីធានាការអភិវឌ្ឍ ធានានូវមុខរបរ និងប្រាក់ចំណូលរបស់ក្មួយៗ គឺងាយស្រួលទេ បោះឆ្នោតឲ្យគណបក្សប្រជាជន។កម្មករ កម្មការិនី ចូលរួមរក្សាសន្ដិភាព ដើម្បីអភិវឌ្ឍន៍ ធ្វើឲ្យរោងចក្រក្លាយជាសហគមន៍សុខដុមរមនា ធ្វើយ៉ាងណាត្រូវចូលរួមក្នុងការរក្សាសន្ដិភាព ស្ថេរភាពនយោបាយ ដើម្បីធានានូវការអភិវឌ្ឍ ហើយធ្វើយ៉ាងម៉េចប្រែក្លាយរោងចក្រមួយអោយក្លាយទៅជាសហគមន៍សុខដុមរមនាមួយ តាមរយៈ ទំនាក់ទំនងល្អក្នុងវិស័យការងារ រវាងថៅកែរោងចក្រ ប្រធានផ្នែក ប្រធានក្រុម ជាមួយកម្មករ កម្មការិនី។
អត្ថប្រយោជន៍សម្រាប់កម្មករ នឹងបន្តបានជាលំដាប់តទៅ ឆ្នាំ ២០១៩ ក៏ត្រូវដាក់ឲ្យដំណើរការនូវប្រាក់សោធននិវត្តន៍ ដែលពេលនោះ ក្មួយៗដែលជាកម្មករ កម្មការិនី ក៏នឹងទទួលបានប្រាក់សោធននិវត្តន៍បន្ទាប់ពីខ្លួនឈប់ពីការងារ។ ប៉ុន្តែ ក្មួយៗត្រូវចងចាំថា លុះត្រាតែក្មួយៗបំពេញគ្រប់លក្ខខណ្ឌដែលច្បាប់តម្រូវ ទើបអាចទទួលបាននូវប្រាក់សោធននិវត្តន៍នោះ។ មន្ត្រីរាជការក៏ដូចគ្នា លុះត្រាតែធ្វើការងារគ្រប់ឆ្នាំ ទើបអាចទទួលបាននូវប្រាក់ចូលនិវត្តន៍។
នៅក្នុងឱកាសនោះលោកជំទាវកិត្តិសង្គហបណ្ឌិតក៏ចែកថវិកាអំណោយរបស់សម្តេចតេជោហ៊ុនសែននិងម្តេចគតិព្រឹទ្ធបណ្ឌិតប៊ុនរ៉ានីជូនដល់កម្មករកម្មការិនីចំនួន៤០១៩នាក់ក្នងម្នាក់ៗទទួលបានថវិកា២ម៉ឺនរៀលនិងស្ត្រីមានផ្ទៃពោះ១៨២នាក់ ក្នុងម្នាក់ៗទទួលបានថវិកា២០០ដុល្លានិង២ម៉ឺនរៀល ៕ វ៉ៃកូ