ដោយពុំនិយាយឲ្យចំឈ្មោះ តែនាយករដ្ឋមន្ត្រី Prayut Chan-o-cha កាលពីម្សិលមិញ ហាក់ចង់ប្រាប់ទៅលោក ថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីថៃ ឲ្យចូលស្រុកវិញ ដើម្បីតតាំងនឹងករណីរបស់តុលាការប្រឆាំងនឹងរូបគាត់ ប្រសិនបើគាត់អះអាងថាខ្លួនគាត់ពុំមានទោសកំហុសនោះ ។
Prayut បានថ្លែងថា មនុស្សដែលរស់នៅនិរទេសខ្លួននៅឯក្រៅប្រទេស និងគេចខ្លួនចេញពីប្រទេសថៃ គឺគ្រាន់តែជា «ពលរដ្ឋឋានៈទី២» ប៉ុណញណោះ នៅក្នុងបណ្តាប្រទេសជាម្ចាស់ផ្ទះទាំងនោះ ។ គាត់ក៏បានធ្វើការរិះគន់ទៅប្រព័ន្ធផ្សាយចំពោះការបង្កើតឡើងនូវព័ត៌មានអំពី «នរណាម្នាក់ដែលបានប្រព្រឹត្តខុស ហើយគេចខ្លួនពីប្រទេសទៅរស់នៅក្រៅប្រទេសបែបនេះ» ។ លោកក៏បាននិយាយមិនសំដៅឈ្មោះមនុស្សណាម្នាក់ថា៖ «តើហេតុអ្វីបានជាអ្នកខ្វល់ខ្វាយអំពីមនុស្សម្នាក់ហ្នឹងម្លេះ? អ្នកគួរតែយកចិត្តទុកដាក់ចំពោះអ្នកដែលកំពុងបម្រើជូនប្រទេសជាតិនាពេលបច្ចុប្បន្ន!!» ។
លោកបន្តថា៖ «សូមកុំសរសើរចំពោះមនុស្សដែលបានចង់បំផ្លាញប្រទេសជាតិរបស់ពួកគេ ។ ពួកគេកើតនៅក្នុងប្រទេសថៃ ប៉ុន្តែ ឥឡូវនេះ បែរទៅរស់នៅក្នុងប្រទេសដទៃ ក្នុងនាមជាពលរដ្ឋឋានៈទី២» ។
លោកក៏បានបញ្ជាក់ថា៖ «ពួកគេគួរតែវិលត្រលប់ និងប្រឈមនឹងផ្លូវច្បាប់ប្រឆាំងនឹងពួកគេ ។ ប្រព័ន្ធយុត្តិធម៌អាចធានាពួកគេទទួលបានភាពយុត្តិធម៌ត្រឹមត្រូវ ។ ប្រសិនពួកគេជឿជាក់ខ្លួនឯងពុំមានទោសកំហុសនោះៗ ពួកគួរតែវិលចូលស្រុកទៅ» ។
គួរបញ្ជាក់ថា លោក ថាក់ស៊ីន ដែលកំពុងរស់នៅទិរទេសខ្លួនឯក្រៅប្រទេស ចាប់តាំងពីឆ្នាំ២០០៨ មុននេះ បានរិះគន់លោក Prayut និងរដ្ឋាភិបាលរបស់គាត់ផងដែរ ។ ខណៈពេលជាមេទ័ព លោក Prayut នៅក្នុងឆ្នាំ២០១៤ បានដឹកនាំការធ្វើរដ្ឋប្រហារមួយ ដើម្បីផ្តួលរំលំរដ្ឋាភិបាលជាប់ឆ្នោត ដែលដឹកនាំដោយប្អូនស្រីរបស់លោក គឺលោកស្រី យីងឡាក់ ស៊ីណាវ៉ាត្រា ដែលឥលូវនេះ ក៏កំពុងរស់នៅទិរទេសខ្លួនជាមួយលោកនៅក្នុងទីក្រុងឡុងដ៍ផងដែរ ។
លោក Prayut ថ្លែងនៅព្រលានយន្តហោះ Don Mueang បន្ទាប់វិលត្រឡប់ពីដំណើរទស្សនកិច្ចទៅកាន់ចក្រភពអង់គ្លេស និងបារាំង កាលពីម្សិលមិញថា គាត់ទទួល «ស្វាគមន៍ដ៏ខ្ពង់ខ្ពស់» ពីទាំងភាគីអង់គ្លេស និងបារាំង ក្នុងអំឡុងដំណើរទស្សនកិច្ចរបស់លោកថ្មីៗនេះ ៕ ឧត្តម
