បុគ្គលិក ៣រូបនៃស្ថានីយ៍សាំងមួយមានការភ័យតក់ស្លុតយ៉ាងខ្លាំង ពេលឃើញរូបសភាវៈពណ៌បៃតង រូបរាងដូចមនុស្ស កំពុងធ្វើចលនាយ៉ាងយឺតពីមុខពួកគេ ។ ខ្លាចផងងឿងឆ្ងល់ផង ពួកគេបានបោះជំហានចូលកៀកដើម្បីប្រើទូរស័ព្ទថតយកហេតុការណ៍ទាំងនោះ ។
ហេតុការណ៍នេះកើតឡើងនៅចម្ងាយពីរដ្ឋធានី Lima របស់ពេរូ ប្រមាណ ៣០គីឡូម៉ែត្រ ហើយនៅវេលាម៉ោង ៣និង៣០នាទី ទៀបភ្លឺ ។
កាមេរ៉ាសុវត្ថិភាពក៏ថតបានពីរូបភាពនៃសភាវៈដែលអ្នកទាំង៣ខាងលើបានឃើញ ហើយថាជាមនុស្សក្រៅភព ។
រូបរាងវាពុំខ្ពស់ មានក្បាលមូលថ្លុំ រាងរៅស្រដៀងនឹងមនុស្ស ។ ថ្វីត្បិតតែមានទម្រង់ដូចជាដៃ និងជើង ប៉ុន្តែចលនារបស់វាហាក់ដូចជាប៉ែលប៉ោល ហើយជើងក៏ពុំបានជាន់ប៉ះលើដីដែរ។
ពេលឆ្លើយតបនឹងកិច្ចសម្ភាសន៍ លោក Mauricio Moral ក្នុងចំណោមមនុស្ស ៣នាក់នោះនិយាយថា ខ្លួនមានអារម្មណ៍ហាក់គាំងចលនា “បេះដូងខ្ញុំស្ទើរតែមិនលោត ហើយខ្ញុំក៏មិនអាចបោះជំហានទៅមុខបាន” ។ ចំណែកសាក្សី Oliver Erazo អះអាងថា នោះគ្មានអ្វីក្រៅពីមនុស្សមកពីភពដទៃឡើយ ។ អ្នកទាំង ៣ នៅបានអះអាងថា ៖ សភាវៈនេះបានត្រូវកិនកម្ទេចបាត់ ដោយរថយន្តដឹកទំនិញមួយគ្រឿងដែលបើកបរតាមផ្លូវនោះ ។
គួរកត់សម្គាល់ថា ពេរូឈរលំដាប់ទី ៥ លើពិភពលោកចំពោះចំនួនអ្នកដែលបានឃើញថាសហោះរបស់មនុស្សក្រៅភព UFO ឬសភាវៈមកពីភពដទៃ ៕ ចន្ទ្រា
