ភ្នំពេញ៖ ប្រធាននាយកដ្ឋានគ្រប់គ្រងសន្ដិសុខឯកជន នៃអគ្គស្នងការដ្ឋាននគរបាលជាតិ ក្រសួងមហាផ្ទៃ បានបញ្ជាក់ថា ក្រសួងមហាផ្ទៃ តែងតែយកចិត្តទុកដាក់ជំរុញ និងលើកទឹកចិត្តដល់វិស័យសន្តិសុខឯកជន នៅក្នុងប្រទេសកម្ពុជា ឲ្យទទួលបានទំនុកចិត្តក្នុងការប្រកបអាជីវកម្មរបស់ខ្លួន ដោយសុខស្ថិរភាព និងនិត្យានុកូលភាព។
លោកឧត្តមសេនីយ៍ឯក លឹម សុខារស្មី ប្រធាននាយកដ្ឋានគ្រប់គ្រងសន្ដិសុខឯកជន នៃអគ្គស្នងការដ្ឋាននគរបាលជាតិ ក្រសួងមហាផ្ទៃ នៅថ្ងៃទី២៧ ខែមិថុនា ឆ្នាំ២០១៨នេះ ក្នុងឱកាសអញ្ជើញបើកវគ្គបំប៉នជំនាញភ្នាក់ងារសន្ដិសុខឯកជន លើកទី៥ ដែលមានការចូលរួមពី តំណាងក្រុមហ៊ុនសន្តិសុខឯក ជិត២០០នាក់ បានថ្លែងថា រាជរដ្ឋាភិបាលកម្ពុជា បានសម្រេចបង្កើត នាយកដ្ឋានគ្រប់គ្រងសន្តិសុខឯកជន កាលពីឆ្នាំ២០១៦កន្លងទៅនេះ គឺដើម្បីគ្រប់គ្រង គាំពារសហការ និងផ្តល់និត្យានុកូលភាពដល់ក្រុមហ៊ុនផ្តល់សេវា សន្តិសុខឯកជន និងសហគ្រាសគ្រឹះស្ថាន ដែលប្រើប្រាស់សន្តិសុខឯកជនទូទាំងប្រទេសកម្ពុជា។
ជាមួយគ្នានោះ លោកឧត្តមសេនីយ៍ លឹម សុខារស្មី ក៏បានគូសបញ្ជាក់ថា ភ្នាក់ងារសន្ដិសុខឯកជន ទទួលបៀវត្សពីក្រុមហ៊ុនឯកជន តែពួកគេមានកាតព្វកិច្ចជាពលរដ្ឋល្អ ដែលមានតួនាទីមិនត្រឹមតែជាអ្នកការពារទ្រព្យសម្បត្តិឯកជន ឬសហគ្រាស គ្រឹះស្ថានឯកជនប៉ុណ្ណោះទេ តែក៏មានកាតព្វកិច្ចជួយការពារទ្រព្យសម្បត្តិសាធារណៈ សណ្ដាប់ធ្នាប់សង្គមផងដែរ។
លោកឧត្តមសេនីយ៍ឯក លឹម សុខារស្មី បានណែនាំ និងជំរុញឲ្យបណ្ដាក្រុមហ៊ុនសន្ដិសុខឯកជនទាំងអស់ គួរតែបញ្ជូនភ្នាក់ងាររបស់ខ្លួន ឲ្យមកចូលរួមក្នុងវគ្គបណ្ដុះបណ្ដាលបំប៉នជំនាញភ្នាក់ងារសន្តិសុខឯកជន ដើម្បីឲ្យភ្នាក់ងាររបស់ខ្លួនទទួលបាននូវបទពិសោធន៍ និងចំណេះផ្សេងៗ ដើម្បីបង្កើនសមត្ថកិច្ចបន្ថែមទៀត។
លោកឧត្តមសេនីយ៍ឯក បានអំពាវនាវគ្រប់បណ្ដា ក្រុមហ៊ុនសន្ដិសុខឯកជនទាំងអស់ ដែលបានដកយកអត្ដសញ្ញាណប័ណ្ណបុគ្គលិក ពេលចូលធ្វើការ ត្រូវប្រគល់ជូនបុគ្គលិកវិញសិន ដើម្បីឲ្យបុគ្គលិកអាចយកអត្ដសញ្ញាណប័ណ្ណ ទៅប្រើប្រាស់ចូលរួមការបោះឆ្នោតជ្រើសតាំងតំណាងរាស្ដ្រ នៅចុងខែកក្កដាខាងមុខនេះ៕ ដោយ៖បញ្ញាស័ក្តិ
