មន្ត្រីប៉ូលីសពិតមានការរំជួលចិត្ត និងស្ទើរតែលើកដៃធ្វើរឿងនេះពុំរួច ខណៈពេលដែលឃើញក្មេងប្រុសអាយុ ៤ ឆ្នាំ ម្នាក់ យំយ៉ាងអណ្ដឺតអណ្ដក ដោយសុំអង្វរម្តាយកុំឲ្យចាកចេញពីរូបគេ បន្ទាប់ម្តាយត្រូវបានចាប់ខ្លួនដោយដៃជាប់នឹងខ្នោះ ពីបទជួញដូរគ្រឿងញៀន នៅក្នុងទីក្រុង Chon Buri កាលពីយប់ថ្ងៃអាទិត្យ ។
ស្ត្រីដែលគ្រាន់តែប្រាប់ឈ្មោះយ៉ាងខ្លីថា Ple អាយុ ៣១ ឆ្នាំ រូបនេះ ត្រូវបានចាប់ខ្លួននៅវេលាម៉ោង ១១ យប់ ស្ថិតនៅមុខហាងលក់ទំនិញមួយ នៃផ្លូវ Thessaban 17 ក្នុងតំបន់ Tambon Huay Yai សង្កាត់ Bang Lamung នៅក្នុងប្រតិបត្តិការដឹកនាំចៅសង្កាត់ Sattahip លោក Anuchai Intahsorn ខណៈពេលដែលស្ត្រីជាប់ចោទនេះ បានកំពុងនាំយកថ្នាំញៀនប្រភេទម៉ាទឹកកកចំនួន ២.៥៨ ក្រាម ទៅឲ្យមន្ត្រីសម្ងាត់ម្នាក់ ។
លោក Anucha និយាយថា ក្រុមរបស់លោកបានគម្រោងធ្វើប្រតិបត្តិការនេះ បន្ទាប់ពីការចាប់ខ្លួនមុននេះ ទៅលើស្ត្រីម្នាក់ទៀតឈ្មោះ Kalong Sanitphol អាយុ ៣៥ ឆ្នាំ ដែលនាងនិយាយថាបានទិញថ្នាំញៀនទាំងនោះពី Ple ។
ក្មេងប្រុសដែលកំពុងជិះខាងក្រោយម៉ូតូ ខណៈម្តាយរបស់គេកំពុងនាំយកគ្រឿងដើម្បីចែកចាយ បានទ្រហ៊ោទំ និងទទួចអង្វរដដែលៗថា៖ «ម៉ាក់! សូមកុំចាកចោលកូនអីណាម៉ាក់! ត្រឡប់ទៅផ្ទះជាមួយកូនវិញទៅ» ។ ទោះយ៉ាងណា ទាំងម្តាយ និងកូនប្រុសនេះ ត្រូវបានសមត្ថកិច្ចនាំទៅកាន់ប៉ុស្តិ៍ – ជាទីកន្លែងដែលសាច់ញាតិរបស់ស្ត្រីនេះ ត្រូវបានហៅឲ្យមកទទួលយកក្មេងប្រុសនេះត្រឡប់ទៅវិញ ៕ ឧត្តម