បាត់ដំបង ៖ នៅព្រឹកថ្ងៃទី២៨ ខែមិថុនា ឆ្នាំ២០១៨នេះ នៅទីបញ្ជាការយោធភូមិភាគទី៥ មានរៀបចំពិធីអបអរសាទរ នៃការរំលឹកខួបអនុស្សាវរីយ៍លើកទី៣០ឆ្នាំ ថ្ងៃបង្កើតយោធភូមិភាគទី៥ ស្ថិតនៅក្នុងបរិវេណទីបញ្ជាការដ្ឋាន ក្រុងបាត់ដំបង ខេត្តបាត់ដំបង។
ពិធីអបអរសាទររំលឹកខួប៣០ឆ្នាំនេះ ត្រូវបានធ្វើឡើងក្រោមអធិបតីភាព សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងមានការចូលរួមពីសំណាក់នាយទាហាន ពលទាហាន ចំនួន២០៨៨នាក់។
ជាមួយគ្នានេះ ឧត្តមសេនីយ៍ឯក ប៊ុន សេង មេបញ្ជាការយោធភូមិភាគទី៥ បានឱ្យដឹងថា៖ យោធភូមិភាគទី៥ មានចំនួន៤ខេត្ត រួមមាន៖ ខេត្តបាត់ដំបង, ខេត្តប៉ៃលិន, ខេត្តពោធិ៍សាត់,និងខេត្តបន្ទាយមានជ័យ ហើយការប្រារព្ធពិធីរំលឹកខួប៣០ឆ្នាំនេះ មានការចូលរួមពីសំណាក់កងកម្លាំងប្រដាប់អាវុធមកពីបណ្តាលស្ថាប័ន និងកងឯកភាពចំណុះជាច្រើនដូចជា៖ កងព្រំដែន, តំបន់ប្រតិបតិ្តការសឹករងខេត្ត និងកងពលតូចទាំង៣, កងនគរបាលជាតិ, កងរាជអាវុធហត្ថជាដើម។ សូមជម្រាបថា៖ យោធភូមិភាគទី៥ ត្រូវបានបង្កើតឡើងនៅថ្ងៃទី២៨ ខែមិថុនា ឆ្នាំ១៩៨៨ ដើម្បីបុព្វហេតុការពារមាតុភូមិប្រឆាំង និងការឈ្លានពានពីសំណាក់បរទេស និងទប់ស្កាត់សង្គ្រាមនៅផ្ទៃក្នុងប្រទេស ។
សម្តេចពិជ័យសេនា ទៀ បាញ់ ឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ បានបទបញ្ជាទៅគ្រប់បណ្តាមេអង្គភាពនានាទាំងអស់ មិនត្រូវកាត់ប្រាក់បៀវត្សរ៍របស់នាយទាហាន ពលទាហានរបស់ខ្លួននោះជាដាច់ខាត ទោះក្នុងន័យណាក៏ដោយ សូម្បីតែប្រាក់មួយរៀល ក៏មិនបានដែរ។
សម្តេចពិជ័យសេនា រដ្ឋមន្ត្រីក្រសួងការពារជាតិកម្ពុជា បានថ្លែងយ៉ាងដូច្នេះថា៖ មានអង្គភាពខ្លះ កន្លែងខ្លះ មានកិច្ចការផ្ទាល់ខ្លួនមេបញ្ជាការអង្គភាពខ្លះ ទៅកាត់ប្រាក់បៀរវត្ស ប្រាក់របបរបស់បងប្អូនទៅវិញ ក្នុងកិច្ចអ្វីក៏ដោយទោះបីត្រូវធ្វើអ្វី ក៏ដោយមិនត្រូវកាត់ប្រាក់បៀរវត្សរបស់ទាហាននោះទេ សូមចាំឱ្យច្បាស់រឿងនេះ មានច្រើនលើកច្រើនសារហើយ នៅតែមានបញ្ហាហ្នឹងកើតឡើងទៀត។ ត្រង់នេះសូមបញ្ជាក់ឱ្យហើយ សូម្បីតែមួយរៀល ដែលយកទៅបម្រើដល់អង្គភាព គឺហាមដាច់ខាត ទោះធ្វើអ្វីក៏ដោយ គឺមិនត្រូវកាត់ប្រាក់បៀវត្សរ៍ឡើយ ខ្ញុំនិយាយម្តងទៀត។
មានសេចក្តីរាយការណ៍ថា ថ្នាក់ដឹកនាំអង្គភាពខ្លះ នៅក្នុងជួរកងទ័ព បានប្រើអំណាចកាត់ប្រាក់បៀវត្សកូនទាហានតូចតាច ដោយយកលេសថា ប្រាក់ទាំងនោះយកទៅប្រើប្រាស់ក្នុងតម្រូវការផ្សេងៗរបស់អង្គភាព។ ការកាត់ប្រាក់បៀវត្សរ៍បែបនេះ បានធ្វើឱ្យកូនទាហានខ្លះដែលមានតែប្រាក់បៀវត្សតិចតួច មានការបាក់ទឹកចិត្ត និងជួបបញ្ហាក្នុងជីវភាពរស់នៅប្រចាំថ្ងៃ។
ទន្ទឹមនឹងការដាក់បទបញ្ជាជាថ្មីនេះ សម្តេចពិជ័យសេនា ទៀ បាញ់ ក៏បានជំរុញឱ្យគ្រប់បណ្តាអង្គភាពលើកទឹកចិត្តដល់កូនទាហាន តាមរយៈការពង្រឹងកិច្ចការងារកសាងធនធានមនុស្ស អប់រំចិត្តសាស្ត្រ ជំនាញវិជ្ជាជីវៈកងទ័ព និងបទដ្ឋានគតិយុទ្ធផ្សេងៗទៀត ដែលពាក់ព័ន្ធនឹងគោលនយោបាយរបស់រាជរដ្ឋាភិបាលកម្ពុជា ដើម្បីឱ្យក្លាយជាកងទ័ពប្រកបដោយសេចក្តីថ្លៃថ្នូរ និងមានវិជ្ជាជីវៈខ្ពស់ ក្នុងកិច្ចការការពារជាតិមាតុភូមិ និងរាជរដ្ឋាភិបាលស្របច្បាប់។
សម្តេចពិជ័យសេនា បានបន្ថែមទៀតថា កងកម្ពុជា នៅក្នុងបណ្តាអង្គភាពត្រូវតែមានសីលធម៌ល្អ ដើម្បីសហការជាមួយបណ្តា ប្រទេសជាតិខាងគ្នា ចូលរួមរក្សាឱ្យបាននូវសន្តិភាព ស្ថិរភាពរវាងពលរដ្ឋ នៅតាមបណ្តោយព្រំដែន និងបង្កើនទំនាក់ទំនងឱ្យបានល្អបន្ថែមទៀត រវាងកងទ័ពនៅតាមបណ្តាកងពលនានា ចូលរួមសហការជាដោះស្រាយបញ្ហាណាដែលបានកើតឡើងជាយថាហេតុ។ មិនតែប៉ុណ្ណោះគ្រប់បណ្តាលអង្គភាពត្រូវជ្រើសរើសនាយទាហានបន្តវេន នឹងអ្នកមានសមត្ថភាពដើម្បីដឹកនាំអង្គភាព និងគ្រប់គ្រងប្រមូលកិច្ចខិតខំប្រឹងប្រែងលើមូលដ្ឋានកំណែទម្រង់កងទ័ពផងដែរ៕ ដោយ ៖ បញ្ញាស័ក្តិ
