តាម Daily Mail ពួកអ្នកវិទ្យាសាស្ត្រទើបធ្វើការព្រមានថា ដល់ឆ្នាំ ២០៣០ ពិភពលោកនឹងត្រូវជាន់ពន្លិចដោយកាកសំណល់ជ័រប្លាស្ទិក ដែលមានបរិមាណដល់ ១១១លានតោន ព្រោះតែវាប្រឈមនឹងស្ថានភាព ៖ តើត្រូវទៅណាមកណា? ការព្យាករណ៍នេះត្រូវបានផ្អែកលើលទ្ធផលនៃការដែលប្រទេសចិន បានផ្អាកនាំចូលសំរាមជ័រប្លាស្ទិកដើម្បីកែច្នៃឡើងវិញតាំងពីចុងឆ្នាំ ២០១៧ ។ នេះជាការព្យាករណ៍ពិតប្រាកដ ក្រោយពេលប្រទេសចិន បានសម្រេចបិទទ្វារពុំនាំចូលសំរាមជ័រប្លាស្ទិកមកកែច្នៃតទៅទៀត ។
ក្នុងអំឡុងពេលប៉ុន្មានខែប៉ុណ្ណោះ តាមការស្រាវជ្រាវរបស់អ្នកវិទ្យាសាស្ត្រអាមេរិកគំនរសំរាមជ័រប្លាស្ទិកលើពិភពលោកពីមួយថ្ងៃទៅមួយថ្ងៃកាន់តែច្រើនឡើងៗ ។ ដោយឡែកអាមេរិក មានគំរោងនឹងដោះស្រាយសំរាមជ័រប្លាស្ទិក តាមការប៉ាន់ស្មានមានប្រហែល ៣៧លានតោន ដោយកប់ចុះក្នុងដី ឬគ្រីបពន្លិចទៅក្នុងបាតសមុទ្រ ។ ចំណែកទ្វីបអឺរ៉ុប ជប៉ុន នៅពុំទាន់រកឃើញច្រកនាំចេញសំរាមទាំងនោះនៅឡើយ ហើយបណ្តាប្រទេសនៅអាស៊ីអាគ្នេយ៍កំពុងក្លាយជាគោលដៅជំនួសឲ្យ “ទីផ្សារសំរាមជ័រប្លាស្ទិក” នៅចិន ។ មូលហេតុដែលចិនមានការសម្រេចចិត្តបែបនេះព្រោះតែច្រើនទសវត្សរ៍កន្លងមក ក្រុមហ៊ុនកែច្នៃជ័រប្លាស្ទិក ពុំអនុវត្តត្រឹមត្រូវតាមបទដ្ឋាន ជាហេតុបង្កឡើងនូវស្ថានភាពបំពុលបរិយាកាសធ្ងន់ធ្ងរបំផុត ។ គួរកត់សម្គាល់ថា ចិនមិនមែនហាមឃាត់តែសំរាមជ័រប្លាស្ទិកប៉ុណ្ណោះទេ គឺមានដល់ទៅសំរាម ២៤ប្រភេទឯណោះ រាប់តាំងពីដបសូដា ក្រដាសប្រើរួច សំណល់ដែក ។ល។
សំណល់ជ័រប្លាស្ទិកដែលចិននាំចូលកាលពីមុន ។
តាមការព្យាករណ៍របស់អ្នកជំនាញការនោះប្រទេសមួយចំនួននៅអាស៊ីអាគ្នេយ៍ថ្វីត្បិតមាននូវរោងចក្រកែច្នៃប្លាស្ទិក ប៉ុន្តែប្រហែលជាមិនអាចរ៉ាប់រងជំនួសទីផ្សារកែច្នៃរបស់ចិនឡើយ ។
ក្នុងអំឡុងពេល ២៥ឆ្នាំកន្លងមក ប្រទេសចិនបាននាំចូលសំរាមប្លាស្ទិក ១០៦លានតោន (ប្រមាណ ៤៥% នៃសំរាមនេះទូទាំងពិភពលោក) ។ តួលេខគួរឲ្យខ្លាចមួយត្រូវបានទម្លាយចេញ ៖ តាំងពីឆ្នាំ ១៩៥០មក មានជ័រប្លាស្ទិកចំនួន ៩ពាន់លានតោន ត្រូវបានផលិត ប៉ុន្តែមានសំរាមជ័រប្លាស្ទិកតែ ២ពាន់លានតោនប៉ុណ្ណោះ ត្រូវបានយកមកកែច្នៃ ។ ហេតុនេះចំនួនដែលនៅសល់ប្រមាណ ៧ពាន់លានតោន តើវាស្ថិតនៅកន្លែងណា ? ប្រាកដណាស់វានៅរាយប៉ាយពាសពេញពិភពលោក ក្នុងនោះរួមមានទាំងមហាសាគរផងដែរ ។
ប្រទេសនីមួយៗមិនត្រូវយកបរិស្ថានជាថ្នូរសម្រាប់ការអភិវឌ្ឍដូចអតីតកាលរបស់ប្រទេសចិន និងស្ថានភាពបរិស្ថានបច្ចុប្បន្ន ដែលប្រទេសនេះរងទទួល ហើយសម្រេចចិត្តបិទទ្វារលែងនាំចូល ៕ សូយន