បរិភោគឱ្យត្រឹមត្រូវ មិនល្មោភអាហារហួសហេតុ ជាករណីចាំបាច់សម្រាប់អ្នកជំងឺបេះដូង ដែលត្រូវឃ្លាំមើលស្ថានភាពសុខភាពដោយខ្លួនឯង។ អត្រាកូឡេស្ដេរ៉ូល អត្រាទ្រីគ្លីសេរីដ (Les taux de triglyce’rides) អត្រាស្ករ សម្ពាធឈាម ឬទម្ងន់ខ្លួន សុទ្ធតែជាបញ្ហាសំខាន់ៗសម្រាប់ត្រួតពិនិត្យជាចាំបាច់ កាលណាគេជាជនរងគ្រោះដោយគ្រោះថ្នាក់បេះដូង។ ប៉ុន្ដែដំបូន្មាននេះក៏មានសារសំខាន់ដែរចំពោះអ្នកដែលប្រឈមមុខនឹងគ្រោះថ្នាក់។
របបចំណីអាហាររបស់អ្នកជំងឺនេះមិនអាស្រ័យលើការបំបាត់ខ្លាញ់ ស្ករនិងអំបិលនោះទេ ប៉ុន្ដែគួរជ្រើសរើសរកអាហារល្អៗនិងមានសមភាព។ ហេតុនេះគេត្រូវការកាត់បន្ថយខ្លាញ់សត្វដែលជា ប្រភពនៃកូឡេស្ដេរ៉ូលអាក្រក់។ ចៀសវាងការទទួលទានប័រ ក្រែម និងប័រធ្វើពីប្រេងរុក្ខជាតិ។ គួរជ្រើសរើសអាហារក្រែមដែលចម្រាញ់ចេញពីទឹកដោះគោ និងបន្ថយការបរិភោគហ្រូម៉ាចំនួនមួយភាគ ក្នុងមួយថ្ងៃ ត្រូវយកខ្លាញ់ចេញពីសាច់គោនិងបន្ថយចំនួនភាគ១០០ទៅ១២០ក្រាមក្នុងមួយថ្ងៃ យកល្អគួរបរិភោគសាច់មាន់គ្មានស្បែក និងត្រីបីដងក្នុងមួយសប្ដាហ៍។ ត្រូវកាត់បន្ថយអាហារឆ្អិនស្រាប់ លើកលែងតែសាច់ហ្សំបុង(គ្មានខ្លាញ់) ស៊ុត ត្រីចៀន នំផ្អែមដោយម្សៅ។
ទទួលទានអាហារដែលមានខ្លាញ់បន្លែ ដើម្បីរក្សាទុកកូឡេស្ដេរ៉ូលល្អ ដូចជាប័រដែលធ្វើពីប្រេងរុក្ខជាតិ ឬប្រេងបន្លែពីរទៅបីស្លាបព្រាក្នុងមួយថ្ងៃ ប្រើប្រេងអូលីវសម្រាប់ចម្អិនអាហារ។
កាត់បន្ថយស្ករឆាប់រលាយដែលមាននៅក្នុងអាហារ បង្អែម ភេសជ្ជៈលាយស្រា។ ចូរអ្នកនឹកទៅដល់តែចំណី អាហារដែលសម្បូរកាកសរសៃ និងអង់ទីអុកស៊ីដង់។ អ្នកមិនត្រូវបរិភោគអាហារដែលគ្មានបន្លែបៃតងទេ ហើយពិសាផ្លែឈើពីពីរទៅបីផ្លែក្នុងមួយថ្ងៃ។ ជាពិសេសអ្នកត្រូវចម្អិនមុខម្ហូបជាមួយខ្ទឹមបារាំង ខ្ទឹមស និងខ្ទឹមក្រហមឱ្យបានញឹកញាប់។
សូមប្រយ័ត្នប្រយែងចំពោះពេលវេលាបរិភោគអាហារ ការពិសាអាហារបីពេលក្នុងមួយថ្ងៃ។ត្រូវផឹកទឹកឱ្យបានច្រើននៅចន្លោះពេលបរិភោគអាហារនីមួយៗ ហើយអាហារត្រូវសាប អ្នកគួរតែពិសាអាហារផលិតពីទឹកដោះ នំប៉័ងនិងបន្លែជាតិម្សៅ។ នេះជាតារាងមុខម្ហូបប្រចាំថ្ងៃសម្រាប់អ្នកជំងឺបេះដូងៈ
-អាហារពេលព្រឹក
នំប៉័ង១បន្ទះ ស៊ុតចៀនយកតែពណ៌ស ចំនួន៤ ដាក់បន្លែតាមចូលចិត្ត ក្រូចពោធិសាត់១ផ្លែ និងទឹកតែក្ដៅ ១កែវ។
– អាហារថ្ងៃត្រង់
មីសរសៃ ឆាតៅហ៊ូលាយជាមួយខាត់ណា១ចាន និងផ្លែត្របែក១។
-អាហារពេលល្ងាច
បុកល្ហុងលាយជាមួយការ៉ុត១ចាន ត្រីប្រឡាក់គ្រឿងអាំង១ដុំ បន្លែឆាប្រេងខ្យង១ចាន បាយសំរ៉ូប២-៣វែក និងផ្លែស្រកានាគកន្លះផ្លែ។
មុខម្ហូបទាំងនេះផ្ដល់ជាតិសរសៃ (fiber) ទាំងអស់ប្រហែលជា៣០ក្រាម ផលប្រយោជន៍នៃមុខម្ហូបនេះ គឺមានជាតិសរសៃ(fiber) ខ្ពស់ មានជាតិខ្លាញ់ឆ្អែតទាប និងមានវីតាមីន សារធាតុរ៉ែ ធាតុប្រឆាំងអុកស៊ីដង់ (antioxidants) ដែលមានចំណែកជួយការពាររោគគាំងបេះដូងបានខ្ពស់។ ក្រៅពីអាហារនិងការហាត់ប្រាណ ហើយត្រូវរកពេលសម្រាកឱ្យបានគ្រប់គ្រាន់ និងជាពិសេសត្រូវតមបារី ដើម្បីឱ្យរួចផុតពីរោគបេះដូង។
ការរួមរ័កចំពោះអ្នកជំងឺបេះដូង
ជារឿយៗ ទំនាក់ទំនងផ្លូវភេទត្រូវបានគេទទួលស្គាល់ថា អាចបង្កជាការព្រួយបារម្ភសម្រាប់អ្នកជំងឺបេះដូង ឬដៃគូរបស់គេ។ ដើម្បីជាការទុកចិត្ត គេត្រូវដឹងថា ទំនាក់ទំនងភេទម្ដងត្រូវបានចំណាយយកកម្លាំងប្រឹងស្មើនឹងការឡើងជណ្ដើរយ៉ាងលឿនទៅជាន់ទីពីរ។ ហេតុនេះអ្នកឈឺបេះដូងមិនអាចទ្រាំទ្រនឹងការប្រឹងប្រែងបែបនេះទេ។ ក្នុងករណីមានអាការតឹងទ្រូងនាឱកាសនោះ ត្រូវតែលេបថ្នាំ Trinitrine មួយគ្រាប់នៅប៉ុន្មាននាទីមុនពេល រួមភេទ ។ជារួមឱថការពារសម្ពាធឈាមឡើងខ្ពស់ដូចជា Betabloquants អាចជាប្រភពបង្កការលំបាកខាង ផ្លូវភេទសម្រាប់បុរស។ ក្នុងករណីប្រដាប់ភេទមិនដំណើរការ កុំញញើតនឹងនិយាយប្រាប់លោកគ្រូពេទ្យ ពីព្រោះវាអាចមានសារសំខាន់ក្នុងការជ្រើសរើសយកការព្យាបាលមួយសម្រាប់អ្នក៕ លីសា
