បណ្តារូបភាពត្រូវបានចាក់ផ្សាយនៅលើបណ្តាញព័ត៌មានរបស់ឥណ្ឌា បានបង្ហាញឲ្យឃើញអណ្តាតភ្លើង និងផ្សែងខ្មៅហុយចេញពីតំបន់មួយ ដែលស្ថិតនៅជាប់នឹងអគារដ៏ត្រដែតៗជាច្រើន ។
មន្ត្រីគ្រប់គ្រងគ្រោះមហន្តរាយឥណ្ឌា បាននិយាយថា៖ ហេតុការណ៍បង្កការភ្ញាក់ផ្អើលនេះ បានកើតឡើងនៅពេលយន្តហោះធុនតូច១២កៅអី១គ្រឿង បានធ្លាក់បុកចូលក្នុងការដ្ឋានសំណង់មួយ និងបានផ្ទុះឆេះភ្លាមៗតែម្តង ។ ហើយមនុស្ស៤នាក់ស្ថិតនៅលើយន្តហោះនោះ ។
បុរសម្នាក់ត្រូវបានដកស្រង់សម្តីដោយនិយាយនៅលើប៉ុស្តិ៍ព័ត៌មាន NDTV ថា៖ «មានការផ្ទុះដ៏ធំមួយ ហើយដើមឈើនៅក្បែរនោះបានឆេះ ហើយភ្លើងក៏បានរីករាលដាលចូលដងផ្លូវជាច្រើន» ។
បុរសនោះបានបន្ថែមថា៖ «ដំបូង យើងបានសន្និដ្ឋានថា ប្រអប់អគ្គិសនីមួយនៅក្នុងអគារសំណង់ក្រោមដីបានទុស្សសេបង្កការឆាបឆេះ ប៉ុន្តែ នៅពេលយើងបានចូលទៅពិនិត្យកន្លែងកើតហេតុ យើងបានរកឃើញសាកសពបុរសម្នាក់ ដែលកំពុងស្ថិតនៅលើកង់ នៅពេលយន្តហោះធ្លាក់» ។
អគ្គនាយកដ្ឋានអាកាសចរណ៍ស៊ីវិលរបស់ឥណ្ឌា (DGCA) បាននិយាយថា យន្តហោះនោះដែលជាប្រភេទយន្តហោះ turbo-prop King Air C-90 បានកំពុងហោះសាកល្បងចេញពីអាកាសយានដ្ឋាន Juhu ស្ថិតនៅក្បែរនោះ ។
សេចក្តីថ្លែងការណ៍របស់ DGCA បានឲ្យដឹងថា៖ «មានភីឡុត២នាក់ និងវិស្វករថែទាំយន្តហោះ២នាក់ នៅលើយន្តហោះនោះ ។ អ្នកទាំង៤ និងមនុស្សម្នាក់នៅលើដី បានស្លាប់» ៕ ឧត្តម
