Herman Gordon ជាអ្នកអនាម័យធ្វើការនៅសកលវិទ្យាល័យ Bristol ត្រូវបានពួកនិស្សិតគោរពស្រឡាញ់ដោយសារគាត់មានឥរិយាបថរស់នៅសកម្ម និងរីករាយបំផុត ។ ថ្មីៗ
នេះពេលទទួលបានកាដូទឹកប្រាក់ 1.500 ផោនអង់គ្លេស (ជិត ២.០០០ដុល្លារ) ដែលពួកនិស្សិតបានរៃអង្គាសគ្នាធ្វើឲ្យលោក Gordon ស្រក់ទឹកភ្នែក ។
អមជាមួយកាដូជាទឹកប្រាក់នៅមានសារជូនពររបស់ក្រុមនិស្សិតថា ពួកគេថ្លែងអំណរគុណលោក Gordon ដែលបានបញ្ចេញ “ថាមពលសកម្ម” ធ្វើឲ្យអ្នកជុំវិញខ្លួនគាត់មានការ
រីករាយ។ តាមពិតទៅរឿងរ៉ាវនេះផ្តើមចេញពីគេហទំព័រ JustGiving ដែលអំពាវនាវជួយឲ្យលោក Gordon អាចមានប្រាក់សម្រាប់ទៅសួរសុខទុក្ខគ្រួសារនៅប្រទេស Jamaica
ព្រោះគេដឹងថា ១២ឆ្នាំកន្លងហើយ ដែលលោកពុំមានលទ្ធភាពធ្វើបានបំណងប្រាថ្នានេះ ។
រឿងរ៉ាវចាប់ផ្តើមពីអ្នកប្រើប្រាស់ facebook លាក់ឈ្មោះម្នាក់ បានចុះផ្សាយអត្ថបទអំពាវនាវឲ្យនិស្សិតទាំងឡាយរៃអង្គាសជួយដល់ពលករម្នាក់នេះអាចសម្រេចបាន
បំណងប្រាថ្នាដែលពុំធ្វើទៅបានក្នុងអំឡុងពេល ១២ឆ្នាំ កន្លងមក ។ ស្មានពុំដល់ថាក្នុងអំឡុងពេល ៥ថ្ងៃប៉ុណ្ណោះ និស្សិត ២៣០នាក់ បានរួមគ្នារៃអង្គាសផ្តល់ឲ្យបុរសដែលមាន
ឋានៈជាបុគ្គលិកអនាម័យអាចសម្រេចបំណងប្រាថ្នារបស់ខ្លួន រឿងរ៉ាវមួយនេះអាចបញ្ជាក់ថា ក្នុងជីវិតមនុស្សម្នាក់អាចធ្វើនូវរឿងល្អជាច្រើនដោយពុំចាំបាច់ប្រើប្រាស់នូវទឹកប្រាក់
យ៉ាងច្រើននោះឡើយ ៕ ចន្ទ្រា