កំពង់ឆ្នាំង ៖ ក្រសួងប្រៃសណីយ៍ និងទូរគមនាគមន៍ បានគាំទ្រដល់ការបើកដំណើរការកម្មវិធីប្រព័ន្ធឌីជីថលផ្សារភ្ជាប់នឹងសាលារៀន
នៅវិទ្យាល័យហ៊ុនសែន ទួលខ្ពស់ ខេត្តកំពង់ឆ្នាំង កាលពីថ្ងៃទី២៩ ខែមិថុនា ឆ្នាំ២០១៨ ដោយមានការគាំទ្រពី TC និង KT ។ គោលបំណង នៃគម្រោងនេះ គឺដើម្បីនាំមកនូវការតភ្ជាប់ ទៅសាលារៀន នៅទូទាំងប្រទេស តាមរយៈការបង្កើនការតភ្ជាប់អ៊ីនធឺណិតដែលនឹងអនុញ្ញាតឱ្យសាលារៀន ភ្ជាប់ទៅការអប់រំឌីជីថលបន្ថែមទៀត ដើម្បីសម្រាប់សាលាទាំងមូល។ គម្រោង ឌីជីថល Wi-Fiនេះត្រូវបានដាក់ដំណើររួចហើយ នៅសួនច្បារវិមានឯករាជ្យ សួនច្បារមុខព្រះបរមរាជរវាំង ហើយគម្រោងនេះ នឹងបន្តទៅតាមបណ្តាសាលារៀន ជាច្រើនទៀត។
ក្នុងពិធីសម្ពោធដាក់ឲ្យប្រើប្រាស់ជាផ្លូវការ អគារសិក្សា និងសមិទ្ធផលនានា នៅវិទ្យាល័យហ៊ុនសែនទួលខ្ពស់ លោកត្រាំ អ៊ីវតឹក រដ្ឋមន្ត្រីក្រសួងប្រៃសណីយ៍ និងទូរគមនាគមន៍ បានមានប្រសាសន៍ថា ការបើកសម្ពោធកម្មវិធីឌីជីថលសម្រាប់សាលារៀន នៅវិទ្យាល័យហ៊ុនសែនទួលខ្ពល់ គឺជាការតភ្ជាប់សាលារៀនឌីជីថលកម្ពុជា ត្រូវបានអភិវឌ្ឍក្នុងរយៈពេលជាង២០ឆ្នាំមកហើយ ជាមួយនឹងកំណើនផលទុនជាតិសរុប នៅប្រទេសកម្ពុជា (GDP) សរុបជាមធ្យមប្រហែល៧ភាគរយក្នុងមួយឆ្នាំ ហើយត្រូវបានគេព្យាករណ៍ថា នឹងបន្តកំណើនរបស់ខ្លួននាពេលអនាគត។ ការរួមចំណែកសំខាន់ចំពោះកំណើនរហូតមកដល់ពេលនេះ គឺដោយសារមានសុខសន្តិភាព និងស្ថេរភាពនៅក្នុងប្រទេស ជាមួយនឹងការបើកទូលាយនៅក្នុងគោលនយោបាយចំពោះការវិនិយោគពីបរទេស។ ក្នុងជំហានបន្ទាប់នៃការអភិវឌ្ឍប្រទេសកម្ពុជា គឺការផ្តោតទៅលើគុណភាពនៃកំណើន។
លោកត្រាំ អ៊ីវតឹក បានថ្លែងថា ដែលមានន័យថា ប្រទេសកម្ពុជាត្រូវមានយុទ្ធសាស្ត្របន្ថែមទៀត ទៅលើផែនការអភិវឌ្ឍន៍របស់ខ្លួនក៏ដូចជាទាក់ទាញការវិនិយោគ ដែលមានគុណភាពបន្ថែមទៀត ទៅលើវិស័យយុទ្ធសាស្ត្រសំខាន់ៗរបស់ខ្លួន។
ជាក់ច្បាស់ណាស់ថា ការអភិវឌ្ឍនាពេលអនាគត នឹងត្រូវពឹងផ្អែកយ៉ាងខ្លាំងលើបច្ចេកវិទ្យា និងការរួមបញ្ចូលគ្នានៃវិស័យបច្ចេកវិទ្យាដើម្បីជួយកែលម្អការសម្រេចចិត្ត ការរៀបចំផែនការ ការប្រកួតប្រជែង និងគុណភាពដ៏ល្អ នៃជីវិតសម្រាប់មនុស្សគ្រប់គ្នា។ វាច្បាស់ណាស់ថា បច្ចេកវិទ្យា គឺជាអ្នកកំណត់និន្នាការនានា នៅទូទាំងពិភពលោក។ សំខាន់ជាងនេះទៀត បណ្ដារអង្គការអន្តរជាតិដូចជាអង្គការសហប្រជាជាតិ សហភាពអឺរ៉ុប សមាគមន៍អាស៊ាន ITU និង WEF ជាដើម កំពុងលើកទឹកចិត្ត ដល់ប្រទេសទាំងអស់ឱ្យទទួលយកនូវបច្ចេកវិទ្យា ដែលនឹងជះឥទ្ធិពលដល់ការអភិវឌ្ឍន៍ របស់ប្រទេស ក៏ដូចជា ដើម្បីចូលរួមបដិវត្តន៍ឧស្សាហកម្មលើកទី៤។ប្រទេសកម្ពុជាត្រូវមានគំនិតផ្តួចផ្តើមខ្លាំងជាងមុន ដើម្បីចូលរួមសហគមន៍សកលលោក ដើម្បីនាំយកគំនិត និងការគាំទ្រដ៏ល្អបំផុតពីសហគមន៍អន្តរជាតិ ដើម្បីជួយដល់ប្រទេសកម្ពុជា ក្នុងការជំរុញការអភិវឌ្ឍន៍របស់ខ្លួន និងសម្រេចបាននូវសក្ដានុពលភាពរបស់ប្រទេស។ ក្រសួងប្រៃសណីយ៍ និងទូរគមនាគមន៍ កំពុងជួយគាំទ្រដល់ការអភិវឌ្ឍប្រទេស ដោយផ្តោតលើគម្រោង និងកម្មវិធី ដែលកំពុងជួយកម្ពុជាក្នុងការធ្វើទំនើបកម្ម និងរៀបចំសម្រាប់វិស័យសេដ្ឋកិច្ចឌីជីថល និងបដិវត្តន៍ឧស្សាហកម្មលើកទី៤ ។
លោករដ្ឋមន្ត្រី បានបន្ថែមថា ផ្អែកលើយុទ្ធសាស្ត្រ និងគោលនយោបាយចតុកោណ របស់រដ្ឋាភិបាល ការអភិវឌ្ឍវិស័យទូរគមនាគមន៍នឹងក្លាយជាកត្តាគន្លឹះ ក្នុងការគាំទ្រដល់រដ្ឋាភិបាល វិស័យឯកជន សង្គមនិងវប្បធម៌ តាមរយៈការធ្វើឱ្យប្រសើរឡើង នូវការអភិវឌ្ឍន៍និងគុណភាពនៃការអភិវឌ្ឍន៍សម្រាប់វិស័យទាំងអស់នោះ។ ប្រទេសកម្ពុជាបានអភិវឌ្ឍ យ៉ាងឆាប់រហ័ស ក្នុងវិស័យទូរគមនាគមន៍ហើយមានតម្លៃប្រើប្រាស់អ៊ីនធើណិត ក្នុងតម្លៃថោកបំផុត ហើយក៏ជាប្រទេសមួយលឿនបំផុត ក្នុងការទទួលយកបច្ចេកវិទ្យាថ្មីៗប្រៀបធៀបទៅនឹងប្រទេសមួយចំនួន នៅក្នុងតំបន់។ នេះបង្ហាញពីការគាំទ្រ និងថាមវន្តរបស់រាជរដ្ឋាភិបាលកម្ពុជា និងប្រជាជនវ័យក្មេង ដែលបច្ចុប្បន្ន គឺជាកម្លាំងចលករដ៏សំខាន់នៃប្រទេស។
យោងតាមការសិក្សារបស់អង្គការសហប្រជាជាតិ យើងអាចមើលឃើញពីការកើនឡើងចំនួន១០ភាគរយ នៃការតភ្ជាប់ឌីជីថលនៅក្នុងចំណោមប្រជាជន នៅតាមបណ្តាប្រទេសទូទាំងពិភពលោក ដោយផ្តល់នូវការកើនឡើង ដោយផ្ទាល់ដល់ផលិតភាពរបស់ប្រទេសជាតិពី ១,២ភាគរយ -១,៣ភាគរយ នៃផលិតផលក្នុងស្រុកសរុប។ នេះគឺជាសូចនាករដ៏រឹងមាំមួយសម្រាប់ក្រសួងប្រៃសនីយ៍ និងទូរគមនាគមន៍ ដើម្បីជំរុញឱ្យមានគម្រោង តភ្ជាប់បន្ថែមដូចជា គម្រោង Wi-Fiសាធារណៈនិងការតភ្ជាប់ឌីជីថល ទៅកាន់សាលារៀន ជាគម្រោងមួយដែល ក្រសួងប្រៃសនីយ៍ និងទូរគមនាគមន៍ បានផ្តួចផ្តើមឡើងហើយនឹងបន្តគាំទ្រយ៉ាងពេញទំហឹង លើគម្រោងនេះនៅទូទាំងប្រទេស។
សូមបញ្ជាក់ថា នៅថ្ងៃទី៩ ខែឧសភា ឆ្នាំ ២០១៨ ក្រសួងប្រៃសនីយ៍ និងទូរគមនាគមន៍ បានផ្តល់ការគាំទ្រដល់ក្រុមហ៊ុនទូរគមនាគមន៍កម្ពុជា (TC) ដើម្បីដាក់ឱ្យដំណើរការគម្រោង Wi-Fi សាធារណៈនៅក្នុងរាជធានីភ្នំពេញដោយមានការសហការពីក្រុមហ៊ុន Korea Telecom (ខេធី) ។ ក្រុមហ៊ុនខេធី គឺជាក្រុមហ៊ុនទូរគមនាគមន៍ ឈានមុខគេមួយរបស់ពិភពលោក ដែលបានជួយប្រទេសកូរ៉េខាងត្បូង ឱ្យអភិវឌ្ឍខ្លួនក្លាយជាប្រទេសឈានមុខគេនៅក្នុងការអភិវឌ្ឍបច្ចេកវិទ្យាគមនាគមន៍ និងព័ត៌មានវិទ្យា។
យោងតាមចំណាត់ថ្នាក់ពិភពលោក សម្រាប់សន្ទស្សន៍អភិវឌ្ឍន៍ ICT ដោយសហភាពទូរគមនាគមន៍អន្តរជាតិ (ITU) បានឱ្យដឹងថាប្រទេសកូរ៉េ ជាប់ចំណាត់ថ្នាក់លេខ ១ ឬទី ២ នៅលើពិភពលោកក្នុងរយៈ ៨ឆ្នាំចុងក្រោយនេះ។ យើងមានសេចក្តីសោមនស្សរីករាយដែលមាន KT ធ្វើជាដៃគូ ដើម្បីជួយគាំទ្រដល់ការអភិវឌ្ឍ វិស័យឧស្សាហកម្មបច្ចេកវិទ្យា គមនាគមន៍ព័ត៌មានវិទ្យា កម្ពុជា។ គម្រោងWi-Fi សាធារណៈកំពុងប្រើបច្ចេកវិទ្យា Wi-Fi ចុងក្រោយបំផុតពីខេធី។
គម្រោងទាំងនេះ នឹងអនុញ្ញាតឱ្យប្រជាជនកម្ពុជា និងភ្ញៀវទេសចរ កាន់តែច្រើនដែលជាសសរស្តម្ភសេដ្ឋកិច្ច របស់ប្រទេសកម្ពុជាអាចភ្ជាប់អ៊ិនធឺណិត ដោយល្បឿនលឿនបំផុត រហូតដល់ ១ ជីហ្គាបៃ ក្នុងមួយវិនាទី នៅក្នុងតំបន់សាធារណៈធំៗ ដូចជាសួនច្បារសម្តេចហ៊ុនសែន, សួនច្បារមុខព្រះបរមរាជវាំង និងកន្លែងជាច្រើនទៀត ដែលបានតភ្ជាប់ទាំង នៅរាជធានីភ្នំពេញនិងបណ្តាខេត្ត។ ជាមួយគ្នា លោករដ្ឋមន្ត្រី បានបញ្ជាក់ថា “យើងសង្ឃឹមថា នឹងទទួលការគាំទ្រ និងសហការបន្ថែមទៀតជាមួយអ្នកពាក់ព័ន្ធសំខាន់ៗដូចជា ក្រសួងអប់រំ យុវជន និងកីឡា សហភាពសហព័ន្ធយុវជនកម្ពុជា និងអង្គការអប់រំអន្តរជាតិ។
លើសពីនេះទៀតយើងសង្ឃឹមថា នឹងបង្កើតកម្មវិធីអប់រំសាធារណៈបន្ថែមទៀត ដើម្បីជួយលើកកម្ពស់ទីក្រុងស្អាត គ្មានគ្រឿងញៀននិងកម្មវិធីអប់រំស្ទែម (STEM) ។ យើងសង្ឃឹមថា កម្មវិធីសាធារណៈទាំងនេះ នឹងជួយកែលម្អអាកប្បកិរិយានិងការយល់ដឹងរបស់សាធារណជន ដើម្បីជួយលើកកម្ពស់សកម្មភាពរួមគ្នា និងផលប្រយោជន៍របស់យើងទាំងអស់គ្នា”។
លោកបានបន្ថែមថា យើងមានគម្រោងគាំទ្រកម្មវិធីទាំងនេះ តាមរយៈការប្រើមូលនិធិសកល និងមូលនិធិ R&D Fund ដែលត្រូវបានគាំទ្រដោយក្រុមហ៊ុនទូរគមនាគមន៍ និងក្រុមហ៊ុនផ្តល់សេវាអ៊ិនធឺណេតទាំងអស់។ យើងខ្ញុំក៏សង្ឃឹមផងដែរ ដើម្បីលើកកម្ពស់គំនិតបន្ថែមទៀត ដែលនឹងជួយផ្តល់ឱ្យប្រជាជនកម្ពុជា នូវចក្ខុវិស័យច្បាស់លាស់ អំពីការអភិវឌ្ឍន៍របស់ប្រទេសកម្ពុជា និងត្រៀមខ្លួនចូលរួមក្នុងវិស័យសេដ្ឋកិច្ចឌីជីថល យ៉ាងឆាប់រហ័ស និងបដិវត្តន៍ឧស្សាហកម្មលើកទី៤ ដែលនឹងផ្តោតលើបញ្ញាសិប្បនិម្មិតអ៊ីនធឺណិត នៅក្នុងការរស់នៅប្រចាំថ្ងៃ និង ការទាញយកទិន្នន័យធំៗ ។ នៅពេលអនាគត យើងក៏សង្ឃឹមផងដែរ ក្នុងការសហការជាមួយកម្មវិធីអន្តរជាតិ ជាច្រើនទៀត ដូចជាកម្មវិធីទប់ស្កាត់ជំងឺឆ្លងទូទាំងពិភពលោក ដែលនឹងសហការជាមួយប្រទេសជាច្រើន ក្នុងការជួយប្រយុទ្ធប្រឆាំងនឹងគ្រោះថ្នាក់ នៃជំងឺឆ្លងទូទាំងពិភពលោក ដូចជា H1N1, Zika, Ebola … ដែលមានផលប៉ះពាល់ដល់សេដ្ឋកិច្ច និងការអភិវឌ្ឍសង្គម។
ក្រសួងប្រៃសនីយ៍ និងទូរគមនាគមន៍ ប្តេជ្ញាធ្វើការជាមួយអ្នកពាក់ព័ន្ធសំខាន់ៗ ទាំងអស់ក្នុងតំបន់ និងអន្តរជាតិ ដើម្បីធានាថារដ្ឋាភិបាលកម្ពុជា នឹងធ្វើឱ្យកម្មវិធីទាំងនេះ ជាអាទិភាព ក្នុងការជួយធ្វើទំនើបកម្មប្រទេស នៅក្នុងគ្រប់វិស័យទាំងអស់ និងដើម្បីអភិវឌ្ឍប្រកបដោយចីរភាព ជាមួយនឹងការប្តេជ្ញាចិត្ត ចំពោះប្រកបដោយគុណភាព។ អ្វីដែលសំខាន់បំផុតនោះ គឺកម្ពុជាក្លាយទៅជាប្រទេសដ៏ល្អ និងលើកកម្ពស់គុណភាពជីវិត សម្រាប់ប្រជាជនកម្ពុជាគ្រប់ៗជំនាន់៕ ដោយ៖បញ្ញាស័ក្តិ