ខេត្តស្វាយរៀង ៖ នៅព្រឹកថ្ងៃសៅ៣រោច ខែបឋមសាឍ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៣០ ខែមិថុនា ឆ្នាំ២០១៨នេះ លោកប្រធានមន្ទីរ អង្គភាពពាក់ព័ន្ធនានាក្នុងខេត្ត បានរួមដំណើរជាមួយលោក ម៉ែន វិបុល អភិបាល នៃគណៈអភិបាលខេត្តស្វាយរៀង ចុះពិនិត្យទីតាំងភូមិសាស្ត្ររមណីដ្ឋានប្រាសាទបាសាក់ដើម្បីអភិវឌ្ឍន៍អោយទៅជាតំបន់រមណីដ្ឋានទេសចរណ៍ស្ថិតក្នុងភូមិបាសាក់ឃុំបាសាក់ស្រុកស្វាយជ្រំខេត្តស្វាយរៀង។
មានប្រសាសន៍នៅក្នុងការចុះពិនិត្យរមណីដ្ឋាននេះ លោក ម៉ែន វិបុល អភិបាលខេត្ត បានបញ្ជាក់ថា បច្ចុប្បន្នរដ្ឋបាលខេត្តស្វាយរៀង បាននិងកំពុងពិនិត្យរៀបចំដើម្បីអភិវឌ្ឍន៍រមណីដ្ឋានប្រាសាទបាសាក់អោយក្លាយជាតំបន់ដែលទាក់ទាញភ្ញៀវទេសចរណ៍មកទស្សនា ក្នុងនោះបានក៏សាងនូវហេត្ថារចនាសម្ព័ន្ធផ្លូវបេតុងប្រវែងប្រមាណ៤គីឡូម៉ែត្រ ដែលកំពុងដំណើការសាងសង់។
លោកបន្តថា ជាការពិតណាស់គោលបំណងនៃការបង្កើតនូវរមណីដ្ឋានតំបន់ប្រវត្តិសាស្ត្រនេះ ដើម្បីរក្សាការពារនូវទីតាំងវប្បធម៍ប្រវត្តិសាស្ត្រ ដែលដូនតាខ្មែរបានបន្សល់ទុកតាំងពីបុរាណកាលយូលង់មកហើយ។ ក្នុងនោះក៏បានលើកកម្ពស់នូវវិស័យទេសចរណ៍ដែលបានរួមចំណែកយ៉ាងសំខាន់នៅក្នុងសេដ្ឋកិច្ចជាតិ ហើយបានបង្កើតនូវមុខរបរជូនប្រជាពលរដ្ឋក្នុងការស្វែងរកប្រាក់ចំណូលប្រចាំថ្ងៃនៅតំបន់នេះនាពេលបច្ចុប្បន្ន និងទៅអនាគតផងដែរ។
សូមជម្រាបជូនផងដែរថា រមណីដ្ឋានប្រាសាទបាសាក់ មានទីតាំងស្ថិតនៅក្នុងភូមិបាសាក់ ឃុំបាសាក់ ស្រុកស្វាយជ្រុំ ខេត្តស្វាយរៀង ផ្នែកខាង កើតឈាងខាងត្បូង នៃទីរួមខេត្តស្វាយរៀង។ រមណីដ្ឋាននេះមានចំងាយប្រហែល៨គ.ម ពីទីរួមខេត្ត ហើយមានក្រឡាផ្ទៃប្រមាណ៩ហិចតា ដែលមានទីតាំងស្ថិតនៅខាងជើង និងខាងកើត ទល់នឹងទន្លេវ៉ៃគោ ខាងលិច និង ខាងត្បូងទល់នឹងភូមិប្រជាពលរដ្ឋ។
រមណីដ្ឋានប្រាសាទបាសាក់បានស្រូបយកនូវភ្ងៀវទេសចរ មកទស្សនា និងកំសាន្តសប្បាយជាបន្តបន្ទាប់ផងដែរនាពេលបច្ចុប្បន្ននេះ។ ចំពោះទីតាំងភូមិសាស្ត្រនៃរមណីដ្ឋាននេះ ជាដីទួលដ៏ចំណាស់មួយ មានព្រៃឈើជាច្រើនហ៊ុមព័ទ្ធ។ បើតាមការអោយដឹង និងការសិក្សាស្រាវជ្រាវរបស់មន្ទីវប្បធម៌ និងវិត្រសិល្បះខេត្តបានបញ្ជាក់ថា រមណីដ្ឋាននេះមានចាប់ពីសម័យបុព្វកាលមក ហើយក៏មានបន្សល់ទុកនូវប្រាសាទបុរាណមួយផងដែរ ដែលគេគ្រប់គ្នាតែងហៅថា ប្រាសាទព្រៃបាសាក់ ។ ប៉ុន្តែអ្វីគួរឲ្យសោកស្តាយ ប្រាសាទបុរាណនេះ ត្រូវបានបាក់បែកខ្ទេចខ្ទី នៅសល់តែគ្រឹះឥដ្ឋប្រាសាទធ្លាក់រាយប៉ាយ និងគ្រោងជញ្ជាំងនៅសល់បន្តិចបន្ទួចប៉ុណ្ណោះ ហើយបានសន្មតថា ប្រាសាទព្រៃបាសាក់ស្ថិតនៅក្នុងរចនាបទបាខែង ដែលកសាងក្នុងកំឡុងឆ្នាំ៩១៥ ដល់៩២៥ នៃគ.ស។
បច្ចុប្បន្នរមណីដ្ឋានប្រាសាទបាសាក់ក៏មានភ្ងៀវទេសចរជាតិ និងអន្តរជាតិចាប់អារម្មណ៍ពីរមណីដ្ឋាននេះ រដ្ឋបាលខេត្តស្វាយរៀងបានរៀបចំក៏សាងរូបព្រះពុទ្ធបដិមាករសម្រាប់ភ្ញៀវមកទស្សនា និងធ្វើជាកន្លែងសក្ការៈបូជា នៅពេលមាន បុណ្យទាន រឺការកំសាន្តនានាក្នុងតំបន់នេះ ម្យ៉ាងទៀតក៏មានលក់ម្ហូបអាហារយ៉ាងឆ្ងាញ់ពិសារជូនបងប្អូនពីទីជិតឆ្ងាយមកលេងកម្សាន្តនៅទីនេះផងដែរ ៕ វ៉ៃកូ