ការបាត់ខ្លួនក្មេងប្រុសៗក្រុមបាល់ទាត់ជនជាតិថៃ និងគ្រូបង្វឹករបស់ពួកគេ គិតមកទល់ថ្ងៃចន្ទ (០២ កក្កដា) នេះ គឺមានរយៈពេល ១០ ថ្ងៃហើយ ខណៈក្រុមសង្គ្រោះជំនាញៗមកពីអន្តរជាតិ និងជាតិរបស់ថៃ នៅតែបន្តខិតខំប្រឹងប្រែងរុករកពួកគេ មកទល់ម៉ោងនេះ ក៏ពុំទាន់មានពន្លឺនៅឡើយ ដែលធ្វើឲ្យមនុស្សជាច្រើន ក៏បានចេះតែគិតសង្ស័យមិនថាពួកគេនៅមានជីវិត ឬ ក៏បានស្លាប់បាត់បង់ជីវិតទាំងអស់គ្នាទៅហើយនោះទេ បន្ទាប់ពីពួកគេបានបាត់ខ្លួនចូលក្នុងរូងភ្នំ Tham Laung កាលពីរសៀលថ្ងៃសៅរ៍ (២៣ មិថុនា) មក ។
គួរបញ្ជាក់ថា ក្រុមទាហានអាមេរិកចំនួន ៣០ នាក់ មកពីបញ្ជាឥណ្ឌូ-ប៉ាស៊ីហ្វិក នៅហាវ៉ៃ ត្រូវបានបញ្ជូនឲ្យចូលរួមជាមួយក្រុមអ្នកមុជទឹកអង់គ្លេសជាច្រើននាក់ កាលពីថ្ងៃពុធ ដើម្បីជួយសង្គ្រោះក្រុមក្មេងៗសិស្សសាលាថៃទាំងនោះ និងគ្រូបង្វឹករបស់ពួកគេ ដែលបាននិងកំពុងបាត់ខ្លួននៅក្នុងរូបភ្នំវែងបំផុតនេះរបស់ថៃ ចាប់តាំងពីថ្ងៃសៅរ៍ ។ នេះបើតាមសេចក្តីរាយការណ៍របស់ NBC News ។
ខណៈការខិតខំប្រឹងជួយសង្គ្រោះមកពីទាំងអន្តរជាតិ និងជាតិ មកទល់ពេលនេះពុំទាន់ឃើញពន្លឺរបស់ក្រុមបាត់ខ្លួនទាំងនោះ ស្រាប់តែកាលពីពេលថ្មីៗនេះ ព្រះសង្ឃខ្មែរយើង ព្រះគ្រូចាន់ដារ៉ា ស្រោចទឹកដោះអំពើគេរក្សាជំងឺ គង់នៅវត្តសារាវន្ត បានចេញវីដេអូអះអាងថា ក្មេងៗទាំងនោះបានស្លាប់អស់ទៅហើយ ចាប់តាំងពីចូលក្នុងរូងភ្នំនោះប្រហែល ៣ ម៉ោង ប៉ុណ្ណោះ ។
នៅលើគណនីហ្វេសប៊ុករបស់ព្រះអង្គ ព្រះគ្រូចាន់ដារ៉ា ដែលធ្លាប់គង់នៅក្នុងទឹកដីនៃប្រទេសថៃអស់រយៈពេល ១៥ ឆ្នាំ បានមានសង្ឃដីកាអះអាងយ៉ាងដូច្នេះថា៖ «…ក្មេងៗសិស្សសាលាដែលបាត់ខ្លួននៅក្នុងល្អាង ឬ រូបភ្នំនោះ ត្រូវបានពួកបារមី (ហៅផ្លូវក្នុង) ឬ ពួកអមនុស្ស (ហៅផ្លូវងងឹត) លាក់បាំងខ្លួនពួកគេពុំឲ្យឃើញ ហើយពួកគេក៏បានបាត់ស្លាប់អស់ហើយ បន្ទាប់ពីពួកគេបានចូលទៅក្នុងរូងនោះប្រហែល ៣ ម៉ោង ប៉ុណ្ណោះ បន្ទាប់ពីក្មេងៗទាំងនោះបានយក ‘របស់’ ដែលគេដាក់តម្កល់ ឬបូជាឲ្យអ្នកតាភ្នំ ឲ្យពពួកបារមីភ្នំ, ពពួកព្រាយបិសាច អារក្សអ្នកតា ដែលឃុំគ្រងនៅទីនោះ» ។ ព្រះអង្គបន្តថា៖ «លើកទី១ ក្មេងៗទាំងនោះបានចូលទៅក្នុងរូងភ្នំនោះ ដោយបានយក ‘របស់គេ’ ដែលជារបស់អ្នកតាភ្នំជាម្ចាស់ទឹកម្ចាស់ដីដែលថែរក្សានៅទីនោះ យកមកផ្ទះរបស់ពួកគេ ប៉ុន្តែ នៅពេលពួកគេប៉ុនប៉ងចូលទៅយករបស់ទាំងនោះជាលើកទី២នេះ ក៏ត្រូវគេស្ទាក់ចាប់ធ្វើបាបតែម្តង ។ ហើយប្រសិនបើឪពុកម្តាយរបស់ក្មេងៗទាំងនោះ ចង់រកឃើញសាកសពកូនៗរបស់ពួកគេ គឺត្រូវតែនាំយក ‘របស់’ ដែលក្មេងទាំងអស់ហ្នឹងយកមកផ្ទះ ទៅបូជា និងខមាទោសឲ្យគេវិញ ទើបអាចរកឃើញសាកសពអ្នកទាំងអស់ហ្នឹង…» ។
ទន្ទឹមនោះផងដែរ អ្នកលេងអ៊ិនធឺណេតមួយចំនួន ដែលពុំយល់ស្របទៅនឹងការអះអាងរបស់លោក ក៏បានជេរប្រទេចដាក់លោកយ៉ាងចាស់ដៃ ដោយសារពួកគេចោទប្រកាន់ «ប្រមាថជីវិតរបស់គេ» បែបនេះ និងថា តើលោកគិតយ៉ាងណា ប្រសិនបើក្មេងៗទាំងអស់នោះនៅមានជីវិត!! ៕ ឧត្តម
ចុះប្រិយមិត្តវិញ អាចយល់ឃើញយ៉ាងណាដែរ?
