Paul Chauhan គឺជាម្ចាស់ហាងលក់ទំនិញមួយនៅខេត្ត Alberta ភាគខាងលិចកាណាដា នៅថ្ងៃទី ២៥ ខែមិថុនា គាត់បានទូរស័ព្ទហៅប៉ូលិសបន្ទាប់ពីឃើញគូស្នេហ៍មួយគួរឲ្យសង្ស័យថាបានលួចប័ណ្ណឥណទានយកមកទិញទឹកក្រូច។ ទិដ្ឋភាពពីកាមេរ៉ាសុវត្ថិភាព បានបញ្ជាក់ពីសកម្មភាពគួរឲ្យសង្ស័យរបស់ជនទាំងពីរ ។
បន្ទាប់ពីធ្វើការតដៃជាមួយប៉ូលិស ជនល្មើសលួចប័ណ្ណឥណទាននៅកាណាដា បានត្រូវចាប់ខ្លួន ។
ជនល្មើសឈ្មោះ Richard Pariseau អាយុ ២៦ឆ្នាំ បានច្រានមិត្តស្រី Brittany Burke អាយុ ២៩ឆ្នាំ ទៅលើប៉ូលិសម្នាក់ រួចសម្រុកចេញពីទ្វារ ប៉ុន្តែប៉ូលិសបានតោងដៃជាប់ធ្វើឲ្យជនល្មើសទាំងពីដួលគរលើគ្នា ។
ចោរប្រុសបានដោះអាវដើម្បីព្យាយាមគេចខ្លួនតាមច្រកមួយផ្សេង ប៉ុន្តែទ្វារនោះត្រូវបានចាក់សោរជាប់ វាក៏បែរថយក្រោយ ហើយចាប់យកកញ្ចប់ទំនិញ ប៉ងគប់លើប៉ូលិស ប៉ុន្តែប៉ូលិសបង្ក្រាបបានដោយប្រើកាំភ្លើងអគ្គិសនី ។
ក្នុងពេលនោះចោរស្រីបានចេញតាមទ្វារក្រោយ ហើយឡើងលើក្រាហ្វុង ហើយអស់ល័ក្ខណ៍ ព្រោះក្រាហ្វុងនោះបានបាក់ រួចនាងចោរធ្លាក់ចំកន្លែងដែលប៉ូលិសពីរនាក់កំពុងនៅពីក្រោយ ។ ចោរស្រីក៏បានក្រាប់លើដីសុំចុះចាញ់ ៕ ចន្ទ្រា