ក្រៅពីរងការពិន័យជាប្រាក់ នារីទេសចរចិនពីររូបនេះនៅត្រូវបានបណ្តេញចេញពីម៉ាឡេស៊ី បន្ទាប់ពីពួកគេ ធ្វើការថតវីដេអូ ដោយលោតរាំសិចស៊ីនៅពីមុខព្រះវិហារអ៊ីស្លាមមួយ ។
តាមកាសែត South China Morning Post ផ្សាយថា ខ្សែវីដេអូខ្លីមួយដែលថតរូបភាពរបស់ Wan Han អាយុ ៣៧ឆ្នាំ និង Zhang Na អាយុ ២៥ឆ្នាំ មកពីប្រទេសចិន កំពុងលោតរាំបែបសិចស៊ី នៅមុខព្រះវិហារអ៊ីស្លាមមួយ នាទីក្រុង Kota Kinabalu ។ គេបានដាក់ចំណងជើងឃ្លីបនេះថា “របាំក្តៅសាច់” រួចធ្វើការចែករំលែកលើបណ្តាញសង្គម ។ ក្រោយពេលបង្ហោះ ២ថ្ងៃ ឃ្លីបនេះមានអ្នកទស្សនាដល់ទៅ ១.៧០០.០០០នាក់ ។ ហេតុការណ៍នេះបានបង្កនូវកំហឹងយ៉ាងខ្លាំងរបស់ប្រជាពលរដ្ឋកាន់សាសនាអ៊ីស្លាមនៅប្រទេសនេះ ។
ចុងក្រោយប៉ូលិសម៉ាឡេស៊ីបានតាមរកឃើញ រួចធ្វើការពិន័យរដ្ឋបាលជាប្រាក់តែ ២៥ ringgit (ប្រមាណ ៧ USD) ប៉ុន្តែពួកគេបានចាត់កំលាំងនាំខ្លួននារី “សិចស៊ី” ទាំងពីរឲ្យឡើងយន្តហោះវិលត្រឡប់ទៅប្រទេសខ្លួនវិញភ្លាម ៕ ចន្ទ្រា