ស្វាយរៀង ៖ លោកស្រី ដួង វណ្ណា អនុប្រធានកិត្តិយសសាខា និងសហការី នាថ្ងៃទី២ ខែកក្កដា ឆ្នាំ២០១៨នេះ បាននាំយកអំណោយមនុស្សធម៌ទៅចែកជូនគ្រួសារមានជីវភាពខ្វះខាត ចំនួន៧០គ្រួសារ និងចាស់ជរា៣០គ្រួសារ មកពី៦ឃុំ ក្នុងស្រុកស្វាយជ្រំ គឺឃុំក្រោលគោ៤០គ្រួសារ, ឃុំគ្រួស៣៣គ្រួសារ, ឃុំស្វាយអង្គ១០គ្រួសារ, ឃុំស្វាយធំ៨គ្រួសារ, ឃុំធ្លក៤គ្រួសារ និងឃុំចំបក់៥គ្រួសារ សរុប១០០គ្រួសារ ដែលពិធីនេះបានរៀបចំឡើងនៅទីស្នាក់ការអនុសាខាកាកបាទក្រហមកម្ពុជាស្រុកស្វាយជ្រំ ក្រុមការងារសាខាកាកបាទក្រហមកម្ពុជាខេត្តស្វាយរៀង ។
នាឱកាសនោះ លោកស្រី ដួង វណ្ណា អនុប្រធានកិត្តិយសសាខា បានពាំនាំនូវសេចក្ដីនឹករលឹកពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែគិតគូរពីសុខទុក្ខដល់ប្រជាពលរដ្ឋក្រីក្រ ពិសេស ចាស់ជរាគ្មានទីពឹង កុមារកំព្រា ស្ត្រីមេម៉ាយ និងបានផ្ដាំផ្ញើដល់ពួកគាត់ឲ្យខិតខំថែរក្សាសុខភាព មានអនាម័យក្នុងការរស់នៅ ហើយត្រូវប្រកាន់ខ្ជាប់នូវការហូបស្អាត ផឹកស្អាត និងរស់នៅស្អាត ដើម្បីការពារជំងឺឆ្លងនានា ដែលបណ្តាលមកពីការកង្វះអនាម័យ ហើយប្រឹងប្រែងប្រកបរបរបន្ថែមទៀត ដើម្បីលើកស្ទួយកម្រិតជីវភាពគ្រួសារ ត្បិតអំណោយដែលបានផ្តល់ជូននាពេលនេះ គឺបានជួយសម្រាលការលំបាកមួយគ្រាតែប៉ុណ្ណោះ ។
អំណោយដែលចែកជូនទាំង១០០គ្រួសារ ក្នុង១គ្រួសារ ទទួលបាន អង្ករ៣០គីឡូក្រាម, កន្ទេលបត់១, មី១កេស, ត្រីខ១០កំប៉ុង, ទឹកស៊ីអ៊ីវ៦ដប, មុង១, ភួយ១, ក្រមា១, សារុង១ និងថវិកា៤ម៉ឺនរៀល។ ក្នុងឱកាសនោះដែរ លោកស្រី ហៅ ចន្ទសិរីទេពី ចៅ ភិរុណ បានឧបត្ថម្ភថវិកាផ្ទាល់ខ្លួន ក្នុង១គ្រួសារ ចំនួន១ម៉ឺនរៀល បន្ថែមទៀតផងដែរ៕ វ៉ៃកូ
