ក្រុមមន្ត្រីជួយសង្គ្រោះម៉ាឡេស៊ី បាននិយាយថា ក្រុមអ្នកជួយសង្គ្រោះកំពុងរុករកនៅដែនសមុទ្រភាគខាងត្បូង នៃប្រទេសម៉ាឡេស៊ី នៅពីថ្ងៃចន្ទ (២ កក្កដា) នេះសម្រាប់មនុស្ស ១៨ នាក់ ដែលកំពុងបាត់ខ្លួន បន្ទាប់ពីទូកដឹកជនអន្តោប្រវេសន៍មួយ មកពីប្រទេសឥណ្ឌូណេស៊ី បានលិច និងសម្លាប់ស្ត្រីម្នាក់ ។
បណ្តាផ្លូវទឹកខាងត្បូងរបស់ម៉ាឡេស៊ី ដែលជាប់នឹងប្រទេសឥណ្ឌូនេស៊ី និងសិង្ហបុរី រួមមានផ្លូវដឹកជញ្ជូនអន្ដរជាតិដ៏មមាញឹក និងតំបន់នេសាទដ៏សម្បូរបែបផងដែរ ។ ហើយទូកអន្តោរប្រវេសន៍ផ្ទុកលើសចំណុះជាច្រើន ក៏បានចរាចរណ៍ឆ្លងកាត់ដែនទឹកនេះ និងជួនកាលក៏ជួបបញ្ហាផងដែរ ។
លោក Abu Bakar Idris មន្ត្រីនៃទីភ្នាក់ងារអនុវត្តដែនសមុទ្រម៉ាឡេស៊ី បាននិយាយថា មនុស្ស ២៥ នាក់ ក្នុងនោះមានស្ត្រីម្នាក់ ត្រូវបានជួយសង្គ្រោះ បន្ទាប់ទូកនោះដែលត្រូវបានគេជឿថា ដឹកជនអន្តោរប្រវេសន៍ខុសច្បាប់ ៤៤ នាក់ បានលិចនៅព្រឹកព្រលឹមថ្ងៃចន្ទនេះ ។
លោកបន្ថែមថា ការស្វែងរកអ្នកនៅមានជីវិត បានចាប់ផ្តើម បន្ទាប់ពីកម្មករកំពុងស្ថិតនៅលើទូកឯនាយសមុទ្រសមុទ្រ បានជូនដំណឹងទៅអាជ្ញាធរម៉ាឡេស៊ីថា ពួកគេបានឃើញជនជាតិឥណ្ឌូនេស៊ី២នាក់កំពុងហែលទឹកសំដៅពួកគេ ៕ ឧត្តម
