ភ្នំពេញ៖ កងកម្លាំងសមត្ថកិច្ចបើកកិច្ចប្រតិបត្តិការបង្ក្រាបករណីជួញដូរគ្រឿញៀន នៅចំណុចដងផ្លូវក្បែរស្ថានទូតចិន ក្នុងសង្កាត់ទួលទំពូងទី២ ខណ្ឌចំការមន ជាលទ្ធផលរឹបអូសគ្រឿងញៀនជាង១៦គីឡូក្រាម។
ប្រតិបត្តិការកាលពីថ្ងៃទី១កក្កដា មានការបញ្ជាដឹកនាំដោយផ្ទាល់ ពីនាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិ និងលោក ឡឹក វណ្ណៈ នាយកមន្ទីរប្រឆាំងគ្រឿងញៀន កម្លាំងជំនាញ នៃមន្ទីរប្រឆាំងគ្រឿងញៀន ក៦ ដឹកនាំដោយលោកឧត្តមសេនីយ៍ត្រី ហម គន្ធី នាយករងមន្ទីរ ក្រោមការសម្របសម្រួលពីលោក សៀង សុខ ព្រះរាជអាជ្ញារងអមសាលាដំបូងរាជធានីភ្នំពេញ។
ពាក់ព័ន្ធករណីនេះមន្ត្រីមន្ទីរប្រឆាំងគ្រឿងញៀន បានឱ្យដឹងនៅល្ងាចថ្ងៃទី២ ខែកក្កដា ឆ្នាំ២០១៨នេះថា ប្រតិបត្តិការនៅរសៀលថ្ងៃម្សិលមិញ កម្លាំងសមត្ថកិច្ច បានឃាត់ខ្លួនជនសង្ស័យម្នាក់ឈ្មោះ ម៉េង រតនា ហៅខ្វៃ អាយុ៤១ឆ្នាំ។
ជាមួយគ្នានេះ កម្លាំងសមត្ថកិច្ចបានចាប់យកវត្ថុតាងគ្រឿងញៀនសរុប 16kg 514.43g ក្នុងនោះ៖ ថ្នាំញៀនប្រភេទ មេតំហ្វេតាមីន (ICE ) ទម្ងន់ 15kg 812.69g ថ្នាំញៀនប្រភេទហេរ៉ូអ៊ីន(Heroine)701.74g៕ ដោយ៖បញ្ញាស័ក្តិ