ក្មេងប្រុស១២នាក់ និងគ្រូបង្វឹកបាល់ទាត់របស់ពួកគេ ត្រូវបានរកឃើញនៅមានជីវិតទាំងអស់ បន្ទាប់ពីជាប់គាំងនៅក្នុងរូងភ្នំ Tham Luang អស់រយៈពេល ៩ ថ្ងៃ នឹងទទួលការផ្គត់ផ្គង់អាហារ និងការហ្វឹកហាត់មុជទឹក រហូតដល់រយៈពេល ៤ ខែ ខណៈពេលនេះ ក្រុមសង្គ្រោះកំពុងផ្តោតទៅលើការផ្លាស់ប្តូរជម្លៀសពួកគេប្រកបដោយសុវត្ថិភាព តាមរយៈប្រព័ន្ធរូងភ្នំក្រោមទឹកដ៏ស្មុគស្មាញ ដែលកំពុងពេញប្រៀបទៅដោយទឹក ។ នេះបើតាមមន្ត្រីជាន់ខ្ពស់ទ័ពជើងទឹកម្នាក់និយាយនៅថ្ងៃអង្គារនេះ ។
យោងតាមសេចក្តីថ្លែងការណ៍របស់កងកម្លាំងប្រដាប់អាវុធថៃ, មេក្រុមទ័ពជើងទឹក លោក Anand Surawan និយាយថា៖ «យើងខ្ញុំនឹងរៀបចំដើម្បីបញ្ជូនអាហារបន្ថែម ដើម្បីផ្គត់ផ្គង់ក្នុងរយៈពេលយ៉ាងតិច ៤ ខែ និងការហ្វឹកហាត់ពួកគេទាំង១៣នាក់ ឲ្យចេះមុជទឹក ខណៈពេលកំពុងបន្តបង្ហូរទឹក» ។
លោកឧត្តមសេនីយ៍ Arpakorn Yukongkaew មេបញ្ជាការកងទ័ពជើងទឹក Navy SEAL និយាយថា ច្រកចេញដ៏សំខាន់របស់រូងភ្នំនេះ មានតំបន់តូចៗចង្អៀតយ៉ាងច្រើន ដែលនៅតែលិចទឹក ហើយវាពុំអាចឲ្យឆ្លងកាត់បាន សម្រាប់អ្នកដែលពុំដែលឆ្លងកាត់ការហ្វឹកហាត់មុជទឹក ។
លោកបន្តថា ក្រុមសង្គ្រោះបានផ្តល់នូវអាហាររូបត្ថម្ភកាឡូរីខ្ពស់ ដល់ក្រុមជនរងគ្រោះក្មេងៗទាំងនោះ ដើម្បីស្តារកម្លាំងកំហែងរបស់ពួកគេឡើងវិញ និងព្រមទាំងព្យាយាមបង្រៀនពួកគេឲ្យចេះមុជទឹក ។
ក្រុមអ្នកមុជទឹក ក៏បានរំពឹងថានឹងនាំយកគ្រូពេទ្យទៅកាន់តំបន់នោះ ដើម្បីផ្តល់ការត្រួតពិនិត្យសុខភាពសមាជិកក្រុមក្មេងៗរងគ្រោះ នៅចុងយប់ថ្ងៃអង្គារនេះផងដែរ ៕ ចន្ទី
