កណ្ដាល៖ គ្រោះថ្នាក់ចរាចររវាងរថយន្ដហ៊ីយ៉ាន់ដាយធុនធំ បុករថយន្ដហ៊ីយ៉ាន់ដាយធុនតូច ពីក្រោយពេញមួយទំហឹង បណ្តាលឲ្យមនុស្ស២នាក់ស្លាប់ និង៣នាក់ទៀតរងរបួសធ្ងន់ស្រាល នៅម៉ោង១និង២០នាទីរំលងអធ្រាត្រ ឈានចូលថ្ងៃទី៣ ខែកក្កដា ឆ្នាំ២០១៨ លើផ្លូវជាតិលេខ១ ក្នុងចន្លោះគីឡូម៉ែត្រ១៨-១៩ ស្ថិតក្នុងភូមិទួលក្របៅ ឃុំគគីរ ស្រុកកៀនស្វាយ ខេត្តកណ្តាល ។
មន្ដ្រីនគរបាលចរាចរណ៍ស្រុកកៀនស្វាយ បានឲ្យដឹងថា ជនរងគ្រោះស្លាប់បាត់បង់ជីវិតមាន២នាក់ ទី១-ឈ្មោះ គ្រឿន សំនាង ភេទប្រុស អាយុ២៤ឆ្នាំ មានទីលំនៅភូមិស្ទឹង ឃុំសំរោងធំ ស្រុកកៀនស្វាយ ខេត្តកណ្តាល និងទី២-ឈ្មោះ កក វិចិត្រ ភេទប្រុស អាយុ៣២ឆ្នាំ មានទីលំនៅភូមិទួលត្នោត ឃុំគគីរ ស្រុកកៀនស្វាយ ខេត្តកណ្តាល ។ ជនរងគ្រោះទាំង២នាក់ជាអ្នករួមដំណើរក្នុងរថយន្ដម៉ាកហ៊ីយ៉ាន់ដាយ ប្រភេទដឹកទំនិញធុនតូច ពណ៌ខៀវ ពាក់ស្លាកលេខ ច -3035 ភព2 បើកបរដោយឈ្មោះ កក សារឿន ភេទប្រុស អាយុ៣៥ឆ្នាំ មានទីលំនៅភូមិទួលត្នោត ឃុំគគីរ ស្រុកកៀនស្វាយ (របួសស្រាល) ,ឈ្មោះ សុខ រី ភេទប្រុស អាយុ៣៨ឆ្នាំ មានទីលំនៅភូមិទួលក្របៅ ឃុំគគីរ ស្រុកកៀនស្វាយ (របួសធ្ងន់ជាអ្នករួមដំណើរ) ។ ចំណែករថយន្ដម្ខាងទៀតម៉ាកហ៊ីយ៉ាន់ដាយ ធុនធំ ប្រភេទដឹកទំនិញ ពណ៌ស ពាក់ស្លាកលេខ ភ្នំពេញ 3B-7384 បើកបរដោយឈ្មោះ ស៊ិន ស៊ីណា ភេទប្រុស អាយុ៣១ឆ្នាំ មានទីលំនៅភូមិគួកប៉ែល ឃុំចេក ស្រុកស្វាយរៀង ខេត្ដស្វាយរៀង ដោយមានអ្នករួមដំណើរចំនួន០២នាក់ ទី១-ឈ្មោះ ស៊ូ ចាន់ថន ភេទប្រុស អាយុ២៩ឆ្នាំ របួសស្រាល និងឈ្មោះ ត្រេន ធិ ភេទប្រុស អាយុ៣០ឆ្នាំ ។ អ្នករួមដំណើរទាំង២នាក់មានទីលំនៅភូមិប្រោះស្វា ឃុំបន្ទាយចក្រី ស្រុកព្រះស្តេច ខេត្តព្រៃវែង ។
នៅមុនពេលកើតហេតុ រថយន្ដម៉ាកហ៊ីយ៉ាន់ដាយធុនតូច ពាក់ស្លាកលេខ ច -3035 ភព2 ធ្វើដំណើរក្នុងទិសដៅពីភ្នំពេញឆ្ពោះទៅអ្នកលឿង លុះបើកមកដល់ចំណុចកើតហេតុ រថយន្ដក៏ខូច រួចក៏ឈប់លើចិញ្ចើមផ្លូវហើយធ្វើការជួសជុល ខណៈដែលជួសជុលនោះ គឺពុំបើកភ្លើង ឬស្លាកសញ្ញាសម្គាល់ណាមួយនោះទេ ភ្លាមនោះក៏មានរថយន្ដហ៊ីយ៉ាន់ដាយមួយគ្រឿងទៀត ធុនធំ ពាក់ស្លាកលេខភ្នំពេញ 3B-7384 បើកដោយល្បឿនលឿន ក្នុងទិសដៅស្របគ្នា ដោយមិនប្រយ័ត្ន ក៏បុករថយន្ដពាក់ស្លាកលេខ ច -3035 ភព2ពីក្រោយពេញមួយទំហឹង បណ្ដាលឲ្យមនុស្ស២នាក់ស្លាប់និង៣នាក់ទៀតរបួសធ្ងន់ស្រាល ។
ការសន្និដ្ឋានរបស់សមត្ថកិច្ចជំនាញបានឲ្យដឹងថា ករណីនេះបណ្តាលមកពីរថយន្ដពាក់ស្លាកលេខ ភ្នំពេញ 3B-7384 ធ្វេសប្រហែស ខ្ជីខ្ជាមិនប្រុងប្រយ័ត្ន មិនមើលស្ថានភាពផ្លូវខាងមុខមានឧបសគ្គ បើកដោយល្បឿនលឿន ។ ចំណែករថយន្តពាក់ស្លាកលេខ ច -3035 ភព2 ធ្វេសប្រហែស ខ្ជីខ្ជាមិនប្រុងប្រយ័ត្នឈប់គ្មានដាក់ភ្លើងបំភ្លឺអោយសញ្ញាដល់អ្នកប្រើប្រាស់ផ្លូវ ទើបបានជាមានហេតុការណ៍គ្រោះថ្នាក់កើតឡើង ៕ ដោយ៖បញ្ញាស័ក្តិ
