ព្រះវិហារ៖ ជនសង្ស័យម្នាក់ ពាក់ព័ន្ធករណីជួញដូរ នូវសារធាតុញៀន និងកាន់កាប់អាវុធខុសច្បាប់ ត្រូវបានកម្លាំងជំនាញ កងរាជអាវុធហត្ថខេត្តព្រះវិហារ កសាងសំណុំរឿង ដើម្បីបញ្ជូនទៅសាលាដំបូង បន្តតាមនីតិវិធី នៅថ្ងៃទី៣ខែកក្កដានេះ។
កងរាជអាវុធហត្ថខេត្តព្រះវិហារ បានបញ្ជាក់ថា នៅវេលាម៉ោង ១២ និង ៣០នាទី ថ្ងៃអាទិត្យ ទី១ ខែកក្កដា ឆ្នាំ២០១៨ នៅចំណុចភូមិអន្លង់វែង ឃុំកន្ទួត ស្រុកជាំក្សាន្ត ខេត្តព្រះវិហារ កម្លាំងមូលដ្ឋានកងរាជអាវុធហត្ថស្រុក និងស្នាក់ការសន្តិសុខ ដឹកនាំដោយលោកអនុសេនីយ៍ឯក ជុន បូរ៉ា មេញ្ជាការរងកងរាជអាវុធហត្ថស្រុកជាំក្សាន្ត សហការជាមួយកម្លាំងការិយាល័យទី២ កងពលតូចលេខ៨ បានចុះបង្ក្រាបករណីរក្សាទុក ឬជួញដូរនូវសារធាតុ ញៀនដោយខុសច្បាប់ និងឃាត់ខ្លួនជនសង្ស័យម្នាក់ឈ្មោះ ទន់ ឈាន ភេទប្រុស អាយុ ៣៥ឆ្នាំ មុខរបរមិនពិតប្រាកដ រស់នៅភូមិអន្លង់វែង ឃុំកន្ទួតស្រុកជាំក្សាន្ត ខេត្តព្រះវិហារ រួមទាំងដកហូតវត្ថុតាងម្សៅក្រាមពណ៌សថ្លា (ម៉ាទឹកកក)ចំនួន ១០ កញ្ចប់តូច ស្មើនឹង ១,១៩ក្រាម កាំភ្លើងច្នៃចំនួន ២ ដើម កាំភ្លើងckcកាត់ស្វ័យចំនួន ១ ដើម គ្រាប់AK47 ចំនួន ៣២ គ្រាប់ សាក់កាដូ (កាបូប) ដាក់កាំភ្លើង១ លុយរៀលចំនួន ៥ម៉ឺនរៀល ម៉ូតូចំនួន ១គ្រឿង និងសម្ភារៈសម្រាប់សេព និងវេចខ្ចប់ គ្រឿងញៀនមួយចំនួនទៀត៕ ដោយ៖បញ្ញាស័ក្តិ
