ភ្នំពេញ ៖ ពលការិនីម្នាក់ដែលបានចាញ់បោកមេខ្យល់ បានបញ្ជូននាងទៅបម្រើការងារដោយខុសច្បាប់ នៅប្រទេសអារ៉ាប៊ីសាអូឌីតអស់រយៈពេលជាង៤ឆ្នាំដោយខុសច្បាប់ ត្រូវបានអន្តរាគមន៍ជួយសង្គ្រោះ បានទាន់ពេលវេលាហើយកំពុងវិលត្រឡប់មកប្រទេសកំណើតវិញ។
លោក អូស្មាន ហាស្សាន់ រដ្ឋមន្ត្រីប្រតិភូអមនាយករដ្ឋមន្ត្រី រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានអន្តរាគមន៍ជួយដល់ពលការិនីម្នាក់ឈ្មោះ កែន ចន្ថា ដែលបានចាញ់បោកមេខ្យល់ បានបញ្ជូននាងទៅបម្រើការងារដោយខុសច្បាប់នៅអារ៉ាប៊ីសាអូឌីត អស់រយៈពេលជាង៤ឆ្នាំដោយខុសច្បាប់។
ការផ្តល់កិច្ចអន្តរាគមន៍នេះ ឆ្លើយតបនឹងការទទូចស្នើសុំជំនួយពី ពលការិនី កែន ចន្ថា នៅលើបណ្តាញសង្គមហហ្វេសប៊ុក ដែលបានរៀបរាប់ពីដំណើរដើមទង នៃការដែលខ្លួន ត្រូវបានចាញ់បោកមេខ្យល់ មកធ្វើជាពលការិនីបម្រើការងារផ្ទះនៅប្រទេសអារ៉ាប៊ីសាអូឌីត ដោយរងការកេងប្រវ័ញ្ចកម្លាំងពលកម្ម ការធ្វើទុក្ខបុកម្នេញ ពីថៅកែ និងការមិនផ្តល់ប្រាក់បៀវត្សរ៍ជាដើម។
ពលការិនីរងគ្រោះរូបនេះ កំពុងនៅលើយន្តហោះធ្វើដំណើរពីទីក្រុងជុដះ ប្រទេសអារ៉ាប៊ីសាអូឌីត ឆ្ពោះមកកាន់ទីក្រុងបាងកក ដើម្បីបន្តដំណើរត្រឡប់មកកម្ពុជា ដែលនឹងមកដល់អាកាសយាន្តដ្ឋាន អន្តរជាតិភ្នំពេញ នៅព្រឹកថ្ងៃទី៤ ខែកក្កដានេះ។ ពលការិនីខ្មែរ ឈ្មោះ កែន ចន្ថា មានទីលំនៅកំណើត ភូមិវត្តបូព៌ ឃុំសៀមរាប ស្រុក សៀមរាប ខេត្តសៀមរាប ដែលបានទៅធ្វើការបម្រើតាមផ្ទះនៅប្រទេសអារ៉ាប៊ីសាអ៊ូឌីត រយៈជាង៤ឆ្នាំ ដោយចាញ់បោកពួកមេខ្យល់។
បើតាមលោក អូស្មាន ហាស្សាន់ នេះជានារីរងគ្រោះទី៤ហើយ ដែលលោកបានដោះស្រាយឲ្យបានវិលត្រឡប់មកកម្ពុជាវិញនោះដោយសារតែ នៅប្រទេសអារ៉ាប់នោះ មិនទាន់មានស្ថានទូត ឬស្ថានកុងស៊ុលរាល់ការដោះស្រាយ បញ្ហាម្ដងៗមានការលំបាកយឺតយ៉ាវ៕ ដោយ៖បញ្ញាស័ក្តិ
