ភ្នំពេញ៖ នារសៀលថ្ងៃអង្គារ ទី៣ ខែកក្កដា ឆ្នាំ២០១៨ លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលបានអនុញ្ញាតឱ្យលោក Jeong Yun IL ប្រធានអង្គការ KOICA ចូលជួបសម្តែងការគួរសមនិងពិភាគ្សាការងារលើកិច្ចសហប្រតិបត្តិការវិស័យសុខាភិបាល។ ថ្លែងក្នុងឱកាសនោះ លោករដ្ឋមន្ត្រី បានសម្តែងការស្វាគមន៍យ៉ាងកក់ក្តៅជូនចំពោះលោកប្រធានអង្គការ KOICA និងថ្លែងអំណរគុណដល់រដ្ឋាភិបាលនិងប្រជាជនកូរ៉េ ដែលបានជួយដល់វិស័យសុខាភិបាល ជាពិសេសក្នុងពេលថ្មីៗនេះទើបតែដាក់សម្ពោធឱ្យប្រើប្រាស់ជាផ្លូវការអគារថ្មីមួយខ្នងនៅក្នុងបរិវេណមន្ទីពេទ្យកុមារជាតិ ក្រោមអធិបតីភាពដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា។
លោកប្រធានអង្គការ KOICA ប្រចាំកម្ពុជាបានជម្រាបជូន លោកមរដ្ឋមន្ត្រី ថាគម្រោងមួយចំនួនដែល ក្រសួងសុខាភិបាលបានដាក់ស្នើសុំទៅភាគីកូរ៉េ ត្រូវបាននឹងកំពុងពិនិត្យ និងវាយតំលៃដោយស្នាក់ការកណ្តាល របស់ KOICA ហើយបានអនុម័តខ្លះហើយ គម្រោងខ្លះនឹងអាចត្រូវបានអនុម័តនាចុងឆ្នាំ២០១៨នេះ មានដូចជាគម្រោងពង្រឹងកម្មវិធីគាំពារមាតានិងទារក តាមរយៈសេវាចុះមូលដ្ឋាន នៅខេត្តរតនគិរី និងមណ្ឌលគិរី និងគម្រោងពង្រឹងសេវាសុខាភិបាលនៅមន្ទីរពេទ្យបង្អែកខេត្តសៀមរាប ដែលរួមមានការសាងសង់អគារសង្គ្រោះបន្ទាន់ ការបំពាក់សម្ភារៈបរិក្ខារពេទ្យ និងការបណ្តុះបណ្តាល មន្ត្រីជំនាញ ដែលជាគំនិតលើកស្នើសុំផ្ទាល់ដោយលោករដ្ឋមន្ត្រីកាលពីឆ្នាំមុនៗ។ លោកប្រធានអង្គការ KOICA បានគូសបញ្ជាក់បន្ថែមថា គម្រោងពង្រឹងកម្មវិធីត្រចៀក ច្រមុះ និងបំពង់កនៃមន្ទីរពេទ្យព្រះអង្គឌួងអាចនឹងត្រូវចាប់ផ្តើមអនុវត្តន៍នាដើមឆ្នាំ២០១៩ខាង មុខនេះ ព្រមទាំងគម្រោងសម្រាប់ជួយលើការ បណ្តុះ បណ្តាលនៃសាកលវិទ្យាល័យវិទ្យាសាស្ត្រសុខាភិបាល គម្រោងជួយលើផ្នែកសុខភាពមាតានិងទារកនៅខេត្តកំពង់ស្ពឺ និងគម្រោងសុខភាពសហគមន៍និងអនាម័យនៅខេត្តសៀមរាបផងដែរ ដោយមានសាកលវិទ្យាល័យអេវ៉ា និងកុងយ៉ាងនៃសាធារណរដ្ឋកូរ៉េ ព្រមទាំងអង្គការក្រៅរដ្ឋាភិបាលចូលរួមអនុវត្តគម្រោងទាំងនេះផងដែរ។
ជាការឆ្លើយតប លោករដ្ឋមន្ត្រី បានមានប្រសាសន៍ថ្លែងអំណរគុណ ដល់លោកប្រធានអង្គការ KOICA ប្រចាំកម្ពុជា និងសហការីរបស់លោកទាំងអស់ ចំពោះការខិតខំប្រឹងប្រែងជំរុញឱ្យគម្រោងទាំងអស់នេះ អាចទទួលបានការអនុម័តយ៉ាងឆាប់រហ័ស ដែលនេះសបញ្ជាក់នូវទំនាក់ទំនងល្អរវាងប្រទេសទាំងពីរ ហើយសមិទ្ធផលទាំងអស់នេះក៏ទទួលបានមកដោយសារមានការដឹកនាំដ៏ត្រឹមត្រូវប្រកបដោយគតិបណ្ឌិតនិងភាពឈ្លៀសវៃប៉ិនប្រសព្វរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាដែលបានធ្វើឲ្យប្រទេសមានសុខសន្តិភាពរួមទាំងការអភិវឌ្ឍន៌ប្រទេសដែលមានសព្វថ្ងៃ។ លោករដ្ឋមន្ត្រី បានបន្តថា ក្រសួងសុខាភិបាលនឹងសហការឱ្យបានជិតស្និទ្ធជាមួយអង្គការ KOICA ដើម្បីអនុវត្តន៍គម្រោងទាំងនេះឱ្យបានសម្រេចជោគជ័យ៕ ដោយ៖កូឡាប