ភ្នំពេញ ៖ សម្តេចពិជ័យសេនា ឧបនាយករដ្ឋមន្ត្រី បានបញ្ជាក់ថា កិច្ចប្រជុំបូកសរុបឆមាសទី១ និងទិសដៅឆមាសទី២ ឆ្នាំ ២០១៨ នឹងត្រិះរិះពិចារណាលើការកែទម្រង់ថ្មីៗ ក្នុងការអនុវត្តនៅឆមាសទី២ ឆ្នាំ២០១៨ ដែលជាឆ្នាំមួយ មានសារសំខាន់ដ៏ខ្លាំងក្លាសម្រាប់មាតុភូមិកម្ពុជា ជាពិសេសសម្រាប់កងយោធពលខេមរភូមិន្ទ កងកម្លាំងប្រដាប់អាវុធមន្ត្រីរាជការគ្រប់លំដាប់ថ្នាក់ និងប្រជាពលរដ្ឋកម្ពុជា ដែលមានតួនាទីភារកិច្ចចូលរួមទ្រទ្រង់ និងអនុវត្តនូវនយោបាយរបស់ជាតិ នៅក្នុងព្រឹត្តិការណ៍ នៃការបោះឆ្នោតជ្រើសរើសតំណាងរាស្ត្រ នីតិកាលទី៦ នៅថ្ងៃទី២៩ កក្កដា ឆ្នាំ២០១៨ ឲ្យបានរលូនត្រឹមត្រូវ និងយុត្តិធម៌ពេញលេញទៅតាមផ្លូវច្បាប់។
ក្រសួងការពារជាតិ បានប្រជុំផ្សព្វផ្សាយរបាយការណ៍បូកសរុបការងារឆមាសទី១ និងលើកទិសដៅអនុវត្តឆមាសទី២ ឆ្នាំ២០១៨ នៅព្រឹកថ្ងៃទី៣ ខែកក្កដានេះ ស្ថិតក្រោមអធិបតីភាពសម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ ។
នៅក្នុងឱកាសបើកកិច្ចប្រជុំនោះ សម្តេចពិជ័យសេនា ទៀ បាញ់ បានថ្លែងនូវការវាយតម្លៃខ្ពស់ ចំពោះកិច្ចខិតខំប្រឹងប្រែង របស់នាយទាហាន និងពលទាហាន នៃកងយោធពលខេមរភូមិន្ទ ក្នុងរយៈពេល៦ខែ នៃឆ្នាំ២០១៨កន្លងទៅនេះ ទទួលបានជោគជ័យនៅគ្រប់ការបំពេញការងារ។
កិច្ចប្រជុំក៏បានតាមស្តាប់ដោយការយកចិត្តទុកដាក់ក្នុងរបាយការណ៍បូកសរុប ដែលអានដោយ លោក នាយឧត្តមសេនីយ៍ សំវណ្ណថន អគ្គលេខាធិការ នៃអគ្គលេខាធិការដ្ឋាន ក្រសួងការពារជាតិ, បានឲ្យដឹងថា៖ ក្នុងឆមាសទី១ ឆ្នាំ២០១៨កន្លងទៅនេះ កងយោធពលខេមរភូមិន្ទបានយកចិត្តទុកដាក់ប្រមូលផ្តុំអនុវត្តសកម្មភាពការងាររបស់ខ្លួន ក្នុងវិស័យការពារជាតិ តាមកម្មវិធីនយោបាយយុទ្ធសាស្ត្រចតុកោណ ដំណាក់កាលទី៣ បទបញ្ជាអនុសាសន៍របស់ប្រមុខរាជរដ្ឋាភិបាល។ យកចិត្តទុកដាក់ពង្រឹងខឿនការពារជាតិនៅតាមតំបន់ព្រំដែន និងបណ្តាកោះមួយចំនួន កែសម្រួលកម្លាំងការពារព្រំដែន ធ្វើការតាមដានក្តាប់នូវរាល់សភាពការណ៍ប្រែប្រួល និងធ្វើការល្បាតត្រួតពិនិត្យការពារភូមិសាស្ត្រទទួលខុសត្រូវរបស់ខ្លួនជាប់ជាប្រចាំ ព្រមទាំងបានបន្តកិច្ចសហប្រតិបត្តិការល្អ ជាមួយប្រទេសជិតខាង ដោះស្រាយបញ្ហាផ្សេងៗដែលកើតឡើងដោយសន្តិវិធី។ ទន្ទឹមនឹងនេះ បានបន្តបញ្ជូនកម្លាំងទៅបំពេញបេសកកម្មរក្សាសន្តិភាពក្រោមឆ័ត្ររបស់អង្គការសហប្រជាជាតិ នៅសាធារណរដ្ឋស៊ូដង់ខាងត្បូង, លីបង់, ម៉ាលី នៅសាធារណរដ្ឋអាហ្វ្រិកកណ្តាល។
ក្រៅពីនេះបានម្ចាស់ការ និងសហការចូលរួមពង្រឹងការអនុវត្តច្បាប់ កសាងភូមិ-ឃុំមានសុវត្ថិភាព ធ្វើការបង្ការ និងបង្រាបនូវរាល់បទល្មើសគ្រប់ប្រភេទ ភាពអនាធិបតេយ្យនានាការពារសន្តិសុខ សណ្តាប់ធ្នាប់សាធារណៈ ការពារគណៈប្រតិភូជាតិ និងអន្តរជាតិនានា បានល្អប្រសើរ។
អង្គប្រជុំក៏បានពិភាក្សាផ្លាស់ប្តូរយោបល់ ដោយមានយកចិត្តទុកដាក់ខ្ពស់ ទៅលើផែនការទិសដៅអនុវត្តឆមាសទី២ ឆ្នាំ២០១៨ ដោយផ្តោតសំខាន់លើការពង្រឹងខឿនការពារជាតិនៅតាមតំបន់ព្រំដែន បន្តកិច្ចសហប្រតិបត្តិការល្អជាមួយប្រទេសជិតខាង ចូលរួមពង្រឹងសន្តិសុខ សុវត្ថិភាព សណ្តាប់ធ្នាប់សាធារណៈសង្គម និងត្រៀមលក្ខណៈសម្បត្តិ ចូលរួមការពារសន្តិសុខ សុវត្ថិភាពឲ្យយុទ្ធនាការឃោសនា និងបោះឆ្នោតជ្រើសរើសតំណាងរាស្ត្រ នីតិកាលទី៦ នៅខែកក្កដា ឆ្នាំ២០១៨ខាងមុខនេះ ៕ ដោយ ៖ កូឡាប