Forest Record បានបញ្ចេញឃ្លីបថ្មីមួយទៀត ពីក្នុងបន្ទប់រូងភ្នំ Tham Luang ដើម្បីបង្ហាញពីស្ថានភាពបច្ចុប្បន្នរបស់ក្មេងៗ និងគ្រូបង្វឹកបាល់ទាត់របស់ពួកគេទាំង១៣នាក់ ដែលកំពុងបន្តជាប់គាំងនៅក្នុងនោះ ។ ខណៈពេលនោះផងដែរ គ្រូពេទ្យម្នាក់បានយកថ្នាំ លាបទៅលើផ្នែកមួយចំនួននៃខ្លួនប្រាណរបស់ពួកគេម្នាក់ៗ ដែលទទួលរងរបួសបន្តិចបន្តួច ដោយសារប៉ះទង្គិចនឹងផ្ទាំងថ្ម ។
ទាំងគ្រូបង្វឹក និងកូនៗសិស្សទាំងអស់គ្នា គឺពួកគេម្នាក់ៗសុទ្ធតែបង្ហាញនូវរូបរាងស្គមស្គាំង ប៉ុន្តែ ពួកគេនៅតែបង្ហាញស្នាញញឹម បន្ទាប់ពីទទួលបានការជួយសង្គ្រោះដ៏កក់ក្តៅនេះ ។ ហើយខណៈពេលនេះ ទាំងអាហារ និងភួយ ក៏ត្រូវបានផ្តល់ជូនដល់ពួកគេបានគ្រប់ៗគ្នាផងដែរ ។
ឪពុកម្តាយដែលបានមើលឃើញឃ្លីបនេះ ពួកគាត់ពិតជាមានការសប្បាយចិត្តយ៉ាងខ្លាំង ដែលបានឃើញកូនៗរបស់ពួកគាត់មានសុវត្ថិភាព ។
សម្រាប់បរិយាកាសនៅឧទ្យាន Tham Khun Nam នៅថ្ងៃទី៤ នេះ មន្ត្រីមកពីគ្រប់ផ្នែក បានបន្តធ្វើការងារសង្គ្រោះយ៉ាងសស្រាក់សស្រាំ ដើម្បីនាំយកក្រុមក្មេងៗរងគ្រោះទាំង១៣នាក់ ដែលកំពុងតែបន្តជាប់គាំងនោះក្នុងរូងភ្នំនេះ ។ មន្ត្រីឧទ្យានបានរៀបចំបណ្តាសម្ភារៈផ្គត់ផ្គង់ ចេញទៅកាន់ប្រហោងនានា ដើម្បីស្វែងរកវិធីចូលខាងក្នុង ក៏ដូចជា «ជីកខួង» ពីកំពូលភ្នំតែម្តង បន្ទាប់ពីពុំមានដំណោះស្រាយរំដោះក្មេងៗទាំង១៣នាក់ ចេញតាមច្រកមុខរបស់រូងនេះ ។
ទោះយ៉ាងណា នៅថ្ងៃនេះ ការរំដោះទឹកចេញពីក្នុងរូង ក៏នៅតែបន្ត ទៅតាមលទ្ធភាពដែលអាចធ្វើទៅបាន ដើម្បីនាំយកពួកគេចេញក្រៅវិញងាយស្រួល ។ ចំណែកអាកាសធាតុនៅថ្ងៃនេះវិញ គឺមេឃមានសភាពអាប់អួរ ប៉ុន្តែ ពុំមានភ្លៀងនោះទេ ៕ ឧត្តម
