ក្មេងស្រីសញ្ជាតិអង់គ្លេសម្នាក់ បានត្រូវខ្យល់ផ្ទុះច្រានឡើងទៅក្នុងលំហ រួចធ្លាក់ចុះដីវិញពេលនាងតូចកំពុងលេងល្បែងរំអិលខ្លួនពីឧបករណ៍ពោងខ្យល់ ។
ឧបករណ៍លេងធ្វើពីពោងខ្យល់ នៅឆ្នេរសមុទ្រ Gorleston អង់គ្លេស ពេលមិនទាន់ផ្ទុះ ។
ហេតុការណ៍នេះកើតឡើងនៅឆ្នេរសមុទ្រ Gorleston ប្រទេសអង់គ្លេស កាលពីថ្ងៃទី ០១ ខែកក្កដា ។ តាម Telegraph ប៉ូលិសត្រូវបានគេហៅឲ្យទៅកន្លែងកើតហេតុនៅវេលាម៉ោង ១និង១៥នាទី គឺ ៤នាទី ក្រោយគ្រោះថ្នាក់កើតឡើង ។ ក្រុមសង្គ្រោះបានទៅដល់ហើយប្រឹងធ្វើចលនាបេះដូង រួចបញ្ជូនទៅមន្ទីរពេទ្យ តែនៅពុំអាចសង្គ្រោះជីវិតបាន។
ក្មេងស្រីរងគ្រោះ Ava-May អាយុ ៣ឆ្នាំ ។
ប៉ូលិសប្រាប់ថា ខណៈពេលដែលកើតហេតុនេះ ម្តាយក្មេងស្រីក៏នៅឈរនិយាយលេងក្បែរនោះ ។ ចំណែកនាងតូច បានឡើងទៅដើម្បីរំអិលចុះមកពីលើពោងខ្យល់នោះ ស្រាប់តែវាផ្ទុះតែម្តង ។
សមាជិកសភាម្នាក់ កំពុងថ្លឹងថ្លែងដើម្បីធ្វើច្បាប់ហាមឃាត់មិនឲ្យដាក់ឧបករណ៍កម្សាន្តសម្រាប់ក្មេងនៅកណ្តាលថ្ងៃក្តៅ ៕ ចន្ទ្រា
