ដំបូងឡើយ អ្នកទស្សនានឹកស្មានថា ទង្វើនេះបំណងអួតបង្ហាញពីភាពមានបាន តែអមជាមួយឃ្លីបនេះគឺជាសំណេរពីរឿងពិតនៃស្នេហាមួយ ស្តាប់ទៅគួរឲ្យរំភើបចិត្ត ។ បុរសនោះបានសរសេរថា ៖ “ថ្ងៃនេះជាទិវាអនុស្សាវរីយ៍នៃពេលដែលយើងស្រឡាញ់គ្នា នៅក្នុងឱកាសនេះដែរ ពួកយើងចង់បញ្ចប់របបស្រឡាញ់គ្នាជាសង្សារ ដើម្បីប្តូរទៅកាន់របបមង្គលការវិញ ។ ចាប់ពីថ្ងៃស្រឡាញ់គ្នាមកពួកយើងមានបាតដៃទទេស្អាត អូនបានលំបាកច្រើនណាស់ហើយ ។ បងនៅចាំថ្ងៃដំបូងដែលពួកយើងចាប់ផ្តើមបង្កើតហាង យើងបានដើរខ្ចីបុលលុយគេឯងមួយចំនួន ។ យើងទាំងពីរនាក់ ត្រូវទិញរបស់ របរ ជួលហាង និងកន្លែងសម្រាប់ស្នាក់នៅ ។ ពីនោះមកថ្ងៃណាក៏ដូចជាថ្ងៃណា ត្រូវធ្វើការពីម៉ោង ៨ព្រឹក ដល់ម៉ោង ១២យប់ ។ អំឡុងពេលវេលាដ៏លំបាកលំបិននេះ បងចាំជានិច្ចគ្មានពេលបំភ្លេចបាន ។ ឥឡូវទទួលបានសមិទ្ធផលបន្តិចបន្តួច បងចង់ប្រគល់ឲ្យអូនទាំងអស់ ។ សង្ឃឹមថា ពីថ្ងៃនេះទៅ បន្ថយការខឹងច្រឡោត កុំងរង៉ក់ជ្រុលពេក… ។
នៅថ្ងៃណាមួយនោះ អូននឹងយល់ថា មួយជីវិតនេះឲ្យតែមនុស្សយើង មាននូវមនុស្សម្នាក់ ដែលឃើញមុខភ្លាមចង់ផ្ទុះសំណើចបាត់ទៅហើយ វាកម្ររកបែបណា ពីស្វាមីរបស់អូន ៕ ចន្ទ្រា
