ភ្នំពេញ ៖ ស្ថានទូតជប៉ុន រួមសហការជាមួយមជ្ឈមណ្ឌលសហប្រតិបត្តិការកម្ពុជា-ជប៉ុន(CJCC) បានរៀបចំការប្រឡងចម្រៀងណូដូជីម៉ាន់លើកទី៩ សម្រាប់សិស្សនិស្សិតសិក្សាភាសាជប៉ុននៅប្រទេសកម្ពុជា។
ឆ្នាំនេះ ការប្រឡងចម្រៀងណូដូជីម៉ាន់ បានផ្លាស់ប្តូរទៅជាការប្រកួតរវាងសាលា និងសាលា មិនមែនជាលក្ខណៈបុគ្គលទេ ហើយមានបេក្ខជនចំនួន១៧រូប ឬក្រុម មកពីគ្រឹះស្ថានសិក្សា ឬសាកលវិទ្យាល័យចំនួន១០ បានចូលរួមប្រឡងប្រជែងដណ្តើមយកជ័យ លាភីជូនសាលារៀងៗខ្លួន កាលពីថ្ងៃទី៦ ខែកក្កដា ឆ្នាំ២០១៨ នៅCJCC ក្នុងពិធីបុណ្យតាណាបាតា។
ការប្រឡងចម្រៀងបានប្រព្រឹត្តិទៅក្រោមបរិយាកាសយ៉ាងសប្បាយរីករាយ ជាមួយនិងអ្នកចូលរួម គាំទ្រ និងលើកទឹកចិត្តដល់បេក្ខជនចំនួនជាង៤០០នាក់។
ស្ថានទូតជប៉ុនប្រចាំកម្ពុជា បានប្រកាសលទ្ធផលការប្រឡងចម្រៀងណូដូជីម៉ាន់លើកទី៩។ ស្ថានទូតជប៉ុន មានសេចក្តីសោមនស្សរីករាយ ជម្រាបជូនថា ការប្រឡងចម្រៀងណូដូជីម៉ាន់លើកទី៩ បានប្រព្រឹត្តិយ៉ាងរលូន នៅថ្ងៃទី៦ ខែកក្កដា នៅCJCC។ បេក្ខជនប្រឡងទាំង១៧រូប ឬក្រុមបានប្រកួតប្រជែងយ៉ាងស្វិតស្វាញ និងបានបញ្ចេញសមត្ថភាពដ៍អស្ចារ្យរៀងៗខ្លួន។
លទ្ធផលនៃបេក្ខជនជ័យលាភីមានដូចខាងក្រោម៖ ១- ជ័យលាភីលេខ១ គឺ ក្រុមមកពីសមាគមបង្កើតឋានសួគ៌កុមារកម្ពុជា (ក្នុងនោះរួមមាន កុមារី ពេជ្រ ស្រីយ៉ា កុមារី រ៉េត ស្រីចិន កុមារ៉ា យឿន មេសា កុមារី រ៉េត ដាវិន កុមារី ពេជ្រ ស្រីប៉ុច កុមារី ពេជ្រ ស្រីពៅ កុមារី រ៉េត ធាវី និងកុមារី ខន លីល្សា) ២- ជ័យលាភីលេខ២ គឺ កញ្ញា លី សោភ័ណ្ឌ មកពីសាលាពាណិជ្ជសាស្ត្រ តាយ៉ាម៉ា ៣- ជ័យលាភីលេខ៣ គឺ លោក ញ៉ ដាំ មកពីសាលាអូអេស។ យើងសង្ឃឹមថា អ្នកទាំងអស់គ្នារីករាយនឹងការប្រឡងនេះ ព្រមទាំងបង្កើនការចាប់អារម្មណ៍លើចម្រៀង និងភាសាជប៉ុន។
បេក្ខជនជ័យលាភីលេខ១ ពីការប្រកួតទទួលបាននូវពានកុលាលភាជន៍ ពានគ្រីស្ទាល់ វិញ្ញាបនបត្រ និងម៉ាស៊ីនTablet មួយគ្រឿង។ រង្វាន់ជ័យលាភីលេខ២ ទទួលបាននូវវិញ្ញាបនបត្រ និងម៉ាស៊ីន Tablet មួយគ្រឿង ចំណែករង្វាន់ជ័យលាភីលេខ៣ ទទួលបាននូវវិញ្ញាបនបត្រ និងនាឡិកាដៃមួយគ្រឿង។
ការប្រលងចម្រៀងណូដូជីម៉ាន់ត្រូវបានរៀបចំឡើងជារៀងរាល់ឆ្នាំក្នុងគោលបំណងលើកទឹកចិត្តដល់សិស្សនិស្សិតសិក្សាភាសាជប៉ុន រីករាយក្នុងការសិក្សាភាសា តាមរយៈការច្រៀងចម្រៀងជប៉ុន។
តាមរយៈកម្មវិធីនេះ យើងរំពឹងថាការយល់ដឹងពីប្រទេសជប៉ុន និងវប្បធម៌ជប៉ុនក្នុងចំណោមសិស្សនិស្សិតសិក្សាភាសាជប៉ុនគឺត្រូវបានជំរុញបន្ថែមទៀត។
ឯកអគ្គរាជទូតជប៉ុនប្រចាំកម្ពុជាលោក ហូរីណូអ៊ុជី ហ៊ីដេហ៊ីសា ដែលអញ្ជើញ ជាអធិបតីភាពក្នុងកម្មវិធីនេះ បានថ្លែងថា ការប្រឡងចម្រៀងណូដូជីម៉ាន់ (Nodojman) ចម្រៀងភាសាជប៉ុន ត្រូវបានប្រារព្ធជារៀងរាល់ឆ្នាំ ក្នុងគោលបំណងលើកកម្ពស់អ្នកសិក្សា ភាសាជប៉ុន តាមរយៈការបញ្ចេញសំនៀងចម្រៀងភាសាជប៉ុន។ លើសពីនេះទៀត ការប្រឡង ក៏មានគោលបំណងពង្រឹងពង្រីកចំណង មិត្តភាព និងជំរុញការយល់ដឹងអំពីគ្នាទៅវិញទៅ មករវាងប្រជាជនជប៉ុន និងកម្ពុជា តាមរយៈចម្រៀងភាសាជប៉ុននេះផងដែរ។
លោក ឯកអគ្គរាជទូតបានថ្លែងអំណរគុណ យ៉ាងជ្រាលជ្រៅបំផុត ចំពោះភ្ញៀវកិត្តិយស និងក្មួយៗ សិស្ស និស្សិត ដែលបានចូលរួមទស្សនាក្នុងការប្រឡងចម្រៀងភាសាជប៉ុន បង្ហាញដោយ បេក្ខជននូវទឹកដមសំឡេងពីរោះៗ៕ ដោយ៖កូឡាប
