កាលពីរសៀលថ្ងៃអង្គារ ទី១៤ ខែវិច្ឆិកា ឆ្នាំ២០១៧ ប្រតិភូអគ្គលេខាធិការដ្ឋាន នៃគណៈកម្មាធិការជាតិសន្តិសុខលម្ហសមុទ្រ ចំនួន ០៨រូប ដឹកនាំដោយ ឯកឧត្តម ឧត្តមនាវីឯក ទៀ សុខា មេបញ្ជាការរងកងទ័ពជើងទឹក និងជាមេបញ្ជាការទីបញ្ជាការជួរមុខ អគ្គលេខាធិការដ្ឋាន នៃគណៈកម្មាធិការជាតិសន្តិសុខលម្ហសមុទ្រ និងលោកជំទាវ បានអញ្ជើញទៅចូលរួមប្រជុំពិភាក្សាអំពីការបង្កើតប្រព័ន្ធទំនាក់ទំនងទាន់ហេតុការណ៍ ស្តីពីការចែកចាយព័ត៌មាន និងដោះស្រាយបញ្ហាដែលកើតមានទ្បើងលើផ្ទៃសមុទ្រ រវាងអគ្គលេខាធិការដ្ឋាន នៃគណៈកម្មាធិការជាតិសន្តិសុខលម្ហសមុទ្រ ជាមួយទីបញ្ជាការតំបន់៤ របស់ឆ្មាំសមុទ្រវៀតណាម នៅទីក្រុងហាណូយ សាធារណរដ្ឋសង្គមនិយមវៀតណាម។
គោលបំណង នៃកិច្ចពិភាក្សាគ្នានេះ ដើម្បីឈានទៅចែករំលែក ឬផ្តល់ព័ត៌មាន ទាក់ទងបទល្មើសផ្សេងៗ ដែលកើតមាននៅលើលម្ហសមុទ្រ រួមសហការគ្នា រវាងកម្លាំងជំនាញលម្ហសមុទ្រប្រទេសទាំងពីរ ចេញប្រតិបត្តិការចុះបង្ក្រាប អោយបានទាន់ពេល និងមានប្រសិទ្ធិភាព៕ ដោយ៖ ដែន សីមា
