ត្បូងពេជ្រ១គ្រាប់មានពណ៌ D ថ្លាឈ្វេងត្រូវបានច្នៃយ៉ាងល្អិតល្អន់ត្រូវបានលក់ក្នុងតម្លៃ ៣៤លានដុល្លារ ដែលជាតម្លៃឯកទគ្គកម្មមួយលើពិភពលោក នៃប្រភេទត្បូងពេជ្រនេះ។ត្បូងពេជ្រ ១៦៣,៤១Carat ពណ៌ D ត្រូវបានភ្ជាប់នឹងខ្សែកដាំត្បូងមរកត និងពេជ្រមានឈ្មោះថា “The Art of Grisogono”។ លក់បានតម្លៃជិត៣៤លានដុល្លារ ក្នុងការដេញថ្លៃ នៃក្រុមហ៊ុន Christie’s នៅ Genera (ស្វីស) កាលពីម្សិលមិញ។
ពណ៌ D ជាក្រុមពណ៌ខ្ពស់បំផុត នៃត្បូងពេជ្រ ពោលគឺត្បូងពេជ្រនោះវាថ្លាឈ្វេង ហើយសស្គុះ។ ពេជ្រប្រភេទនេះ កម្រប្រទះណាស់។ ជាមួយតម្លៃចាប់ផ្តើម ២០លានដុល្លារ ចុងក្រោយវាបានជួបម្ចាស់ថ្មីដែលមិនបញ្ចេញឈ្មោះតាមរយៈទូរស័ព្ទ។
ប៉ុន្តែចំពោះអ្នកឯកទេសវិញតម្លៃ ៣៤លានដុល្លារ សម្រាប់ “រចនាបថដ៏ស្អាត តាមរយៈទឹកដៃដ៏ប៉ិនប្រសប់” គឺនៅទាបទេ។ តាមលោក Tobias Korminel ជាមេដឹកនាំក្រុមហ៊ុនពេជ្រចំនួន ៧៧ បានមានប្រសាសន៍ថា តាមពិតទៅលោកស្មានថា នឹងមានតម្លៃដល់ទៅជិត ៥០លានដុល្លារឯណោះ។
គួររំលឹកថា មុនពេលច្នៃ វាមានទំហំ ៤០២,២ carat ត្រូវគេរកឃើញនៅរ៉ែពេជ្រ Lulo ប្រទេស Angola ។ គេបានប្រើពេល ៦ខែ ៕ សូយន
