ព្រះសីហនុ៖ កម្លាំងជំនាញ នៃស្នងការដ្ឋាននគរបាល ខេត្តព្រះសីហនុ បានត្រៀមកម្លាំង និងរង់ចាំតែបទបញ្ជា របស់ថ្នាក់ដឹកនាំ ដើម្បីការពារសុខសវត្ថិភាពជូនប្រជាពលរដ្ឋ ប្រសិនបើមានផ្នែកពាក់ព័ន្ធក្រុមណាមួយ ប្រមូលផ្តុំគ្នាប៉ុនប៉ងផ្តួលរំលំរដ្ឋាភិបាលស្របច្បាប់។
កាលព្រឹកថ្ងៃពុធ ទី១៥ ខែវិច្ឆិកា ឆ្នាំ២០១៧ លោក ជួន ណារិន្ទ ស្នងការនគរបាលខេត្ត ព្រះសីហនុ បានប្រមូលកម្លាំងដើម្បីរង់ចាំ អនុវត្តតាមសេចក្តីជូនដំណឹង របស់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ចុះថ្ងៃទី១៣ ខែវិច្ឆិកា ស្តីពីការរៀបចំក្រុមការងារប្រចាំបញ្ជា សម្រាប់តាមដាន និងដោះស្រាយបញ្ហានានា ពាក់ព័ន្ធនឹងឧបាយកល ផ្តួលរំលំរដ្ឋអំណាចស្របច្បាប់នៅកម្ពុជា។
ព្រមគ្នានេះ លោក ជួន ណារិន្ទ បានដាក់បទបញ្ជាឲ្យកម្លាំងកងអន្តរាគមន៍ពិសេសឲ្យប្រមូលផ្តុំ ហ្វឹកហាត់ រំលឹកមេរៀនឡើងវិញ ទាំងបច្ចេកទេសសមយុទ្ធ និងការប្រើប្រាស់អាវុធគ្រប់ប្រភេទ ដើម្បីពង្រឹងសមត្ថភាព ក្នុងកិច្ចការពារ ថែរក្សាសន្តិសុខសណ្តាប់ធ្នាប់ និងរបៀបរៀបរយសង្គម ឈានទៅការពារ សេចក្តីសុខជូនប្រជាពលរដ្ឋ អ្នកវិនិយោគទុន និងភ្ញៀវទេសចរជាតិ-អន្តរជាតិ ដែលចូលមកទស្សនាខេត្តព្រះសីហនុ ឲ្យមានសុវត្ថិភាព។
លោក ជួន ណារិន្ទ ស្នងការនគរបាលខេត្តព្រះសីហនុ បានដាក់បទបញ្ជាទៅ កងកម្លាំងក្រោមឱវាទ ត្រូវទប់ស្កាត់ និងប្រឆាំងដាច់ខាត រាល់ឧបាយកលទាំងឡាយណា របស់ពួកប្រឆាំងមានបំណងទុច្ចរិត ធ្វើបដិវត្តន៍ពណ៌ ញុះញង់ បំបែកបំបាក់ បំផ្លាញ សន្តិសុខជាតិ និងសេចក្តីសុខក្សេមក្សាន្ត របស់ប្រជាជនកម្ពុជា៕ ដោយ៖ ដែន សីមា 
