ភ្នំពេញ៖ ក្នុងវេទិការផ្សព្វផ្សាយនិងពិគ្រោះយោបល់របស់ក្រុមប្រឹក្សារាជធានីភ្នំពេញនៅខណ្ឌសែនសុខ កាលពីព្រឹកថ្ងៃទី១៥ វិច្ឆិកានេះ អភិបាលខណ្ឌសែនសុខ លោកម៉ូវ ម៉ានិត បានធ្វើការណែនាំអោយមេប៉ុស្តិ៍ទាំងអស់ បំបាត់លើបញ្ហាគ្រឿងនិងល្បែងស៊ីសងនៅក្នុងមូលដ្ឋាន ដើម្បីឆ្លើយតបទៅតាមការស្នើសុំរបស់បងប្អូនប្រជាពលរដ្ឋ ។
ដោយឡែកបញ្ហាបរិស្ថានលោកអភិបាលខណ្ឌក៏បានជម្រុញអោយមានការរួមគ្នាទាំងអាជ្ញាធរនិងប្រជាពលរដ្ឋទាំងអស់ ដើម្បីធ្វើយ៉ាងណាអោយមូលដ្ឋានយើងស្អាតគ្មានសំរាមនិងមានបរិស្ថានល្អ។ ចំពោះការផ្តល់សេវាសាធារណៈ លោកបញ្ជាក់ថា អោយយកទៅតាមច្បាប់កំណត់នៅច្រកចេញចូលតែមួយ មិនអាចបន្លំទេ។
លោកម៉ូវ ម៉ានិត បានដាក់បញ្ជាផ្ទាល់មាត់ដល់នាយប៉ុស្តិ៍ទាំងអស់ក្នុងខណ្ឌសែនសុខ ដោយទុករយៈពេលមួយខែត្រូវតែបង្ក្រាបឲ្យអស់ ហើយកន្លែងទាំងនោះសុទ្ធធ្លាប់បង្ក្រាបនាពេលកន្លងមក និងនៅតែបន្តលួចបើកអាជីវកម្មហ្គេមបាញ់ត្រី គ្រឿងញៀន មាន់ជល់ ជាដើម។ ក្នុងវេទិកាសាធារណៈនេះ ប្រជាពលរដ្ឋបានស្នើអោយមានការដាក់បង្គោលភ្លើង ដោះស្រាយបញ្ហាទឹកលិចនៅអូបែកក្អម ។
លោកស្រី អ៊ុម សុភាព ប្រជាពលរដ្ឋរស់នៅលើប្រឡាយនៅភូមិទំនប់ សង្កាត់ភ្នំពេញថ្មី បានស្នើសុំអោយអាជ្ញាធរជួយជម្រុញការធ្វើប្លង់កម្មសិទ្ធិ ខណៈដែលពួកគាត់រស់នៅលើមាត់ប្រឡាយ ដោយយោងថាប្រឡាយនោះ ទឹកលែងហូរ ទៅហើយ។បញ្ហាអ្នកមានងារ ជាឧកញ៉ា បិទផ្លូវ២០១៨នៅក្នុងសហគមន៍ថ្មីខណ្ឌសែន សុខ និងការជម្រុញអោយជួយបង្ក្រាបគ្រឿងញៀន និងល្បែងស៊ីសង។ចំណែក ព្រះសង្ឃគង់នៅវត្តក្រាំងធ្នង់ ខណ្ឌសែន សែន លោកស្នើសុំ បញ្ហាសំរាម ដោយក្នុងរយៈពេល២ឆ្នាំចុងក្រោយនេះមានគេយកសម្រាមមកបោះចោលនៅតាមផ្លូវ ហើយដុតចោលធ្វើអោយប៉ះពាល់សុខភាពប្រជាពលរដ្ឋ។ស្នើសុំធ្វើប្រព័ន្ធលូនៅផ្លូវលេខ ១០០៧ និងសុំធ្វើផ្លូវនៅ សង្កាត់ក្រាំងធ្នង់ ។
លោកហោ វាសនា បញ្ហា មេភូមិបុរីកម្មករក៏ បានលើកឡើងថា គ្រឿងញៀន កម្លាំងមានសមត្ថកិច្ចបង្ក្រាបបានប្រមាណ៩០ភាគរយហើយ លោកជម្រុញអោយបង្ក្រាបអោយបាន១០០ភាគរយ។
ចំពោះ បញ្ហាដែលបានលើកឡើងរបស់ប្រជាពលរដ្ឋខាងលើនេះត្រូវបានមន្ទីរពាក់ព័ន្ធធ្វើការបកស្រាយនិងដោះស្រាយជូនប្រជាពលរដ្ឋភ្លាមៗដែរ ។ជាក់ស្តែងបញ្ហាដីធ្លី ការផ្តល់កម្មសិទ្ធិត្រូវបានលោក សារិន វណ្ណា មន្ទីរដែនដី នគរូបនីយកម្មនិងសំណង់ រាជធានីភ្នំពេញបានបញ្ជាក់ថា តាមអនុសាសន៍ដ៏ខ្ពង់ខ្ពស់របស់សម្តេចតេជោហ៊ុន សែន បានសម្រេចការប្រទានកម្មជូនប្រជាពលរដ្ឋបានច្រើនសហគគមន៍ហើយ ដោយអភិវឌ្ឍន៍នៅហ្នឹងកន្លែង ហើយសកម្មភាពនេះពិតជាទទួលបានការដឹងគុណយ៉ាងជ្រាលជ្រៅពីសំណាក់ប្រជាពលរដ្ឋ។
ដោយឡែកលោក សាំ ពិសិដ្ឋ ប្រធានមន្ទីរសាធារណការនិងដឹកជញ្ជូនរាជធានីភ្នំពេញបានឡើងធ្វើការបញ្ជាក់ពីលក្ខណៈបច្ចេកទេសនិងការធ្វើលូ ផ្លូវនៅក្នុងមូលដ្ឋានខណ្ឌសែន សុខអោយប្រជាពលរដ្ឋបានយល់ផងដែរ ដោយលោកបញ្ជាក់ថា រាល់សំណើរសំណូមពររបស់ប្រជាពលរដ្ឋ ក្នុងនាមរដ្ឋបាលរាជធានីភ្នំពេញ ត្រូវតែអនុវត្ត គ្រាន់តែប្រើប្រាស់ពេលវេលាយូឬក៏ឆាប់ប៉ុណ្ណោះ។
មន្ត្រីរដ្ឋបាលរាជធានីភ្នំពេញបានអោយដឹងថា វាទិការផ្សព្វផ្សាយនិងពិគ្រោះយោបល់របស់ក្រុមប្រឹក្សារាជធានីនៅព្រឹកនេះផ្តោតសំខាន់ពាក់ព័ន្ធបញ្ហា៣ចំណុច ដែលទាក់ទងនឹងកង្វល់ផ្ទាល់របស់ប្រជាពលរដ្ឋ ក្នុងនោះរួមមាន បញ្ហាសន្តិសុខ សណ្តាប់ធ្នាប់ បញ្ហាបរិស្ថាន និងបញ្ហាអភិវឌ្ឍមូលដ្ឋាន៕ ដោយ៖កូឡាប