នៅវ័យ ១១ឆ្នាំ ក្មេងៗគ្រប់គ្នាប្រាកដជាគ្មានខ្វល់ខ្វាយអ្វីឡើយ ក្រៅតែពីទៅសាលារៀន និងលេងជាមួយមិត្តភក្តិរបស់ពួកគេនោះទេ ប៉ុន្តែសម្រាប់ក្មេងប្រុសម្នាក់នេះ ត្រូវទទួលបន្ទុកជីវិតយ៉ាងធំ និងគ្មានជំរើសអ្វីឡើយ ក្រៅតែពីត្រូវមើលថែប្អូនរបស់ពិការរបស់ខ្លួន ទាំងយកគេទៅសាលារៀនជាមួយផង។
ក្មេងប្រុសអាយុ ១១ឆ្នាំ ឈ្មោះ Alexis Peralta មិនមានឱកាសបានលេងសប្បាយជាមួយនឹងមិត្តភក្តិ ដូចក្មេងៗដទៃនោះទេ ពីព្រោះកុមារកំសត់ដែលត្រូវសាច់ញាតិបោះបង់ចោលនេះ ត្រូវទទួលខុសត្រូវមើលថែប្អូនប្រុសពិការរបស់ខ្លួន ដែលមានអាយុ ៤ឆ្នាំ។ ប្អូនប្រុសរបស់គេឈ្មោះ AJ ពិការរាងកាយ ដោយគេមិនអាចនិយាយ និងដើរបាននោះទេ។
ក្មេងប្រុសគួរឲ្យអាណិតទាំងពីរនេះ ត្រូវបានឪពុកម្តាយពួកគេបោះបង់ចោល នៅពេលពួកគេនៅក្មេងៗម្លេះ ដូច្នេះ វាធ្វើឲ្យ Alexis Peralta ត្រូវទទួលរងបន្ទុកជីវិតទាំងវ័យក្មេង ដើម្បីមើលថែប្អូនទាំងយកគេទៅរៀនជាមួយផងដែរជារៀងរាល់ថ្ងៃ។
បើតាមសេចក្តីរាយការណ៍ បានបង្ហាញថា ក្មេងប្រុសកំសត់ទាំង ២នាក់នេះ មានបងប្អូនម្នាក់រស់នៅសាលារៀន និងមាន ២នាក់ទៀត កំពុងរស់នៅជាមួយនឹងម្តាយរបស់ពួកគេ។
ម្តាយរបស់ពួកគេឈ្មោះ Luna Boloy បានចាកចេញទៅរស់នៅទីក្រុងម៉ានីល ប្រទេសភីលីពីន ដើម្បីធ្វើជំនួយការងារផ្ទះ ហើយទុកឲ្យប្តីទី ២របស់ខ្លួននៅមើលថែកូនទាំង ២នោះ។
ទោះយ៉ាងណា ក្មេងគួរឲ្យអាណិតទាំងពីរ ត្រូវបានឪពុកខ្វះការទទួលខុសត្រូវបោះបង់ចោល។
ជារៀងរាល់ថ្ងៃ កុមារ Alexis Peralta ត្រូវពរប្អូនរបស់ខ្លួន ដើរទៅសាលារៀនចំងាយ ៣គីឡូម៉ែត្រ។ ឲ្យមានការអាណិតដល់កុមារកំសត់នេះ លោកនាយកសាលា បានឲ្យកុមារនោះ ទុកប្អូនរបស់ខ្លួន នៅក្នុងការិយាល័យរបស់គាត់ ដូច្នេះ កុមារានោះ អាចមានពេលបោកខោអាវ និងធ្វើប្ហូបនៅសាលាឲ្យប្អូនរបស់គេហូប។
ទោះបីត្រូវរ៉ាប់រងការលំបាកយ៉ាងណា កុមារាម្នាក់នេះមិនដែលត្អូញត្អែរឡើយ ហើយគាត់មានក្តីប្រាថ្នាមួយផងដែរ គឺចង់បានជួបជុំជាមួយនឹងម្តាយរបស់គាត់វិញ៕ សុភ័ក្ត្រ
ប្រភព៖ Good Times
