ភ្នំពេញ ៖ លោក ខៀវ កាញារីទ្ធ រដ្ឋមន្ត្រីក្រសួងព័ត៌មាន ទទួលជួបពិភាក្សាការងារជាមួយ គណៈប្រតិភូវៀតណាមដឹកនាំដោយ លោក Tran Nhat Thanh អគ្គនាយកទទួលបន្ទុកសហប្រតិបត្តិការអន្តរជាតិ នៃសាធារណរដ្ឋសង្គម និយមវៀតណាម លើការជួយប្រព័ន្ធផ្សព្វផ្សាយនៅកម្ពុជា ទាំងផ្នែក បច្ចេកទេស និងការបណ្ដុះបណ្ដាលធនធានមនុស្ស។
លោករដ្ឋមន្ត្រីបានថ្លែងថា “ក្រសួងព័ត៌មានសុំអោយខាងក្រសួងព័ត៌មានវៀតណាមជួយដាក់បញ្ចូលជាឌីជីថលនូវឯកសាររបស់ទូរទស្សន៍(រូបនិងសំលេង) របស់វិទ្យុជាតិ (សំលេង) និង អាកាប៉េ (រូប និង ទិន្នន័យ) ហើយនឹង ជួយបណ្តុះបណ្តាលមន្ត្រីក្រសួងព័ត៌មានអោយចេះជួសជុលនិងសំអាតរូបនិងសំលេងចាស់ៗអោយបានល្អដូចដើមឡើងវិញ ។ នេះជាកិច្ចការដែលទាមទារចំនាយលើសពី ៦ ទៅ១០ លានដុល្លារ ហើយកន្លងមកក្រសួងបានសុំក្រសួងហិរញ្ញវត្ថុច្រើនឆ្នាំហើយ តែដោយបន្ទុកថវិការដ្ឋត្រូវចំនាយលើអាទិភាពផ្សេងៗទើបយើងមិនដែលបានទទួលលុយដើម្បីការពារ និង ស្តារឯកសារទាំងនេះ” ។
ថ្លែងនៅក្នុងកិច្ចប្រជុំជាមួយគណៈប្រតិភូវៀតណាម កាលពីថ្ងៃទី១៥ ខែកក្កដា ឆ្នាំ២០១៨ នៅទីស្ដីការក្រសួងព័ត៌មាន លោក ខៀវ កាញារីទ្ធបានមានប្រសាសន៍ ស្នើឱ្យភាគីវៀត ណាម ជួយក្រសួងព័ត៌មាននូវគម្រោងប្រព័ន្ធគ្រប់គ្រង E-Archive ដើម្បីថែរក្សា និងជួសជុល នូវរាល់ឯកសារសំខាន់ៗ របស់ក្រសួងព័ត៌មាន ដែលបានបន្សល់ទុកតាំងពីឆ្នាំ១៩៧៨មកម្ល៉េះ ហើយមក ទល់ពេលនេះ ឯកសារទាំងនោះមានដូចជា ហ្វីលរូបថត កាសែតវីដេអូ កាសែតសំឡេង និងឯកសារផ្សេងៗទៀត បានខូចខាត និងប្រើការលែងកើតជាបណ្តើរៗ ដែលតម្រូវឱ្យមាន ការថែរក្សា និងជួសជុលជាបន្ទាន់។ ឯកឧត្តម ក៏បានជំរុញឱ្យភាគីវៀតណាមបន្តជួយដំឡើង ម៉ាស៊ីនផ្សាយសំឡេងឱ្យបានគ្រប់២៥រាជធានី-ខេត្ត បើទោះបីជាម៉ាស៊ីនផ្សាយសំឡេងមាន កម្លាំងត្រឹមតែ២គីឡូវ៉ាត់ និងម៉ាស៊ីនផ្សាយទូរទស្សន៍ មានកម្លាំងតែ៥គីឡូវ៉ាត់ ប៉ុន្តែក្រសួង ព័ត៌មានបានប្រើវិធីសាស្ត្រផ្សាយបណ្តាក់គ្នា។
លោក រដ្ឋមន្ដ្រីបានអះអាងថា វិធីសាស្ត្រនេះពិតជាផ្តល់ផលល្អប្រសើរដោយប្រព័ន្ធ ផ្សព្វផ្សាយរបស់វិទ្យុជាតិកម្ពុជា ទូរទស្សន៍ជាតិកម្ពុជា និងទីភ្នាក់ងារសារព័ត៌មានកម្ពុជា ដោយបានផ្តល់ព័ត៌មានពិត បានទៅដល់ស្ទើរតែគ្រប់ប្រជាពលរដ្ឋទូទាំងប្រទេស ដើម្បីឆ្លើយ តបទៅនឹងព័ត៌មានបំពុលផ្សេងៗជាពិសេសគឺព័ត៌មានដែលបណ្តាលឱ្យមានការរើសអើងជាតិសាសន៍រវាងប្រទេសទាំងពីរជាដើម។
លោក ខៀវ កាញារីទ្ធ ក៏បានថ្លែងអំណរគុណចំពោះភាគីវៀតណាម ដែលបាន ផ្តល់ជំនួយដល់ក្រសួងព័ត៌មានកន្លងមក ជាពិសេសគឺការដំឡើងម៉ាស៊ីនផ្សាយសំឡេងដល់ វិទ្យុជាតិ និងទូរទស្សន៍ជាតិកម្ពុជា ក៏ដូចជាមន្ទីរព័ត៌មានតាមបណ្តារាជធានី ខេត្ត របស់ព្រះរាជា ណាចក្រកម្ពុជា ដើម្បីធ្វើឱ្យប្រសើរឡើង ទាំងការផ្សាយ ការផលិតកម្មវិធីផ្សេងៗ ឆ្លើយតបទៅនឹងសេចក្តីត្រូវការរបស់ប្រជាពលរដ្ឋ។
លោ Tran Nhat Thanh អគ្គនាយក ទទួលបន្ទុកសហប្រតិបត្តិ ការអន្តរជាតិ កម្ពុជា-ឡាវ នៃក្រសួងផែនការ និងវិនិយោគសាធារណ រដ្ឋសង្គមនិយមវៀត ណាម បានវាយតម្លៃខ្ពស់ចំពោះកិច្ចសហប្រតិបត្តិការរវាងព្រះរាជាណាចក្រកម្ពុជា និងវៀត ណាម នាពេលកន្លង មកគឺពិតជាបានសម្រេចបានជាលទ្ធផលល្អប្រសើរ ដោយក្នុងនោះភាគីរដ្ឋាភិបាលវៀតណាម បានជួយក្រសួងព័ត៌មានចាប់ តាំងពីឆ្នាំ២០០៨មក តាមរយៈវិទ្យុ ផ្សាយសំឡេងវៀតណាម (VoV) ក្នុងការដំឡើងម៉ាស៊ីនផ្សាយសំឡេង និងស្ថានីយផ្សាយ ទូរទស្សន៍ នៅក្នុងព្រះរាជាណាចក្រកម្ពុជា បានចំនួន២២ខេត្តរួចមកហើយ ក្នុង២៥រាជធានីខេត្តនៅក្នុងប្រទេសកម្ពុជា។ ទន្ទឹមនេះ ភាគីវៀតណាម ក៏បានជួយបណ្តុះបណ្តាលមន្ត្រីបច្ចេក ទេសគ្រប់គ្រងស្ថានីយផ្សាយទាំងក្នុងប្រទេសកម្ពុជា និងនៅក្នុងវៀតណាមផងដែរ តាមរយៈ ការផ្លាស់ប្តូរទស្សនកិច្ចការងារដែលធ្វើឡើងជារៀងរាល់ឆ្នាំ។ ឯកឧត្តមបានបន្ដទៀតថា ចំពោះគម្រោងគ្រប់គ្រងប្រព័ន្ធ E-Archive របស់ក្រសួងព័ត៌មាន គឺត្រូវបានដាក់គម្រោង នេះចូលទៅក្នុងគម្រោងវិនិយោគរបស់រដ្ឋាភិបាលវៀតណាមរួចហើយ ដើម្បីធ្វើការសម្រេចនៅពេលក្រោយ៕ ដោយ ៖ បញ្ញាស័ក្តិ
