តាកែវ ៖ អជីវករលក់ដូរក្នុងផ្សារសំរោងយោងថា ការលក់ដូរមុខម្ហូបឬបង្អែមផ្លែឈើទាំងនេះគ្មានអ្នកណាម្នាក់ចង់ដាក់នៅសារធាតុគីមីចូលធ្វើអោយប៉ះពាល់ដល់សុខភាពអ្នកបរិភោគទេ តែពួកគាត់លក់ដូរគឺតម្រូវតាមចិត្តរបស់អតិថិជន ព្រោះថាអ្នកទិញទាំងនោះមួយចំនួនធំ បើសិនជាបន្លែមិនស្រស់ ខ្ញីមិនល្អ បង្អែមលូតមិនស្វីត គឺពួកគាត់មិនទិញឬញុំនោះទេ ក៏ប៉ុន្តែពួកគាត់ដែលជាអ្នកទិញនោះភាគច្រើនមិនបានគិតឡើយថា បន្លែដែលស្រស់ ខ្ញីដែលល្អ និងលតដែលស្វិតនោះសុទ្ធសឹងតែមានការដាក់បញ្ជូលនៅសារធាតុគីមីទាំងអស់ ដែលធ្វើអោយអ្នកបរិភោគទៅប៉ះពាល់ដល់សុខភាព នេះបើតាមសម្តីរបស់អុំស្រី ញែម ផុល ជាអ្នកលក់បង្អែមនៅក្នុងផ្សារសំរោងយោង និយាយប្រាប់បន្ទាប់ ពីក្រុមមន្ត្រីជំនាញកាំកុងត្រូលខេត្តតាកែវ បានចុះត្រួតពិនិត្យមើលមុខម្ហូប បន្លែផ្លែឈើ ជា ពិសេសបង្អែមលត ដែលមានដាក់ចូលទឹកអន្សារកម្រិតខ្ពស់ ដែលគេហៅថា សារធាតុគីមីបូរ៉ាក់នោះ ។ អុំស្រី ញែម ផុល បាននិយាយទៀតថា បន្ទាប់ពីមានក្រុមមន្ត្រីជំនាញកាំកុងត្រូលចុះមកពិនិត្យ ជាញឹកញាប់ នៅតាមទីផ្សារជាច្រើននៅក្នុងស្រុកនោះ ទាំងអាជីវករ និងអ្នកទិញមួយ ចំនួន បានយល់ដឹងច្រើនលើផលប៉ះពាល់សុខភាព ដែលបណ្តាលមកពីការដាក់បញ្ចូលនៅសារធាតុគីមី លើបន្លែ មុខម្ហូប និងបង្អែមផ្សេងៗ ។ ហើយមកដល់ពេលនេះ គ្រប់អាជីវករទាំងអស់មួយចំនួន ធំ គឺមិនលក់ដាច់ខាតចំពោះ មុខម្ហូប និងបន្លែ ដែលមានសារធាតុគីមីទៅអោយអ្នកបរិភោគឡើយ ព្រោះខ្លាចប៉ះពាល់ដល់សុខភាពរបស់ពួកគាត់ ។
លោក ប៉ោ លាងគង់ ប្រធានសាខាកាំកុងត្រូលខេត្តតាកែវ បានអោយដឹងថា ក្នុងការចុះពិនិត្យលើមុខម្ហូប បន្លែផ្លែឈើ ជាពិសេសបង្អែមលត នៅក្នុងផ្សារសំរោងយោង នៅស្រុកបាទី ខេត្តតាកែវ នេះគឺក្រុមមន្ត្រីជំនាញរបស់យើង បានធ្វើតេសបឋមលើមុខម្ហូបចំនួន ៦មុខ ដែលផ្តោតសំខាន់រកមើលសារធាតុគីមីបូរ៉ាក់ រួមមានសរសៃគុយទាវធំ សរសៃគុយទាវតូច ទំពាំងជ្រក់ បន្លែទំពាំង ខ្ញី ចាហ៊ួយ ខ្មៅ គឺមិនមានដាក់បញ្ចូលនៅសារធាតុគីមីអ្វីឡើយ ។ ដោយឡែកសម្រាប់បង្អែមលតស្វិតវិញ គឺមន្ត្រីជំនាញយើងបានរកឃើញថា មានដាក់បញ្ចូលនៅសារធាតុគីមីបូរ៉ាក់កម្រិតខ្ពស់ ដែលអាចធ្វើអោយអ្នកបរិភោគវាទៅប៉ះពាល់ដល់សុខភាពធ្ងន់ធ្ងរ ។ លោកប្រធានសាខាកាំកុងត្រូលខេត្តបានបន្តថា បន្ទាប់ពីរកឃើញនៅសារធាតុគីមីបូរ៉ាក់នេះនៅលើបង្អែមលតស្វិតរួច លោកក៏បានធ្វើការណែនាំ អោយអ្នកផលិតនោះបញ្ឈប់ការផលិតលតដែលដាក់បញ្ចូលនៅទឹកអន្សារ ដែលគេហៅថា បូរ៉ាក់នេះ តទៅទៀត និងសូមអំពាវដល់បងប្អូនប្រជាពលរដ្ឋទាំងអស់ ត្រូវមានការប្រុងប្រយត្ន័ចំពោះការពិសារបង្អែមលតស្វិតនេះ ព្រោះអាចធ្វើប៉ះពាល់ដល់សុខភាព បើសិនជាម្ចាស់អាជីវករលក់ដូរទាំងនោះ ដាក់នៅសារធាតុគីមីបូរ៉ាក់នេះទៀត ។
បន្ទាប់ពីចុះត្រូតពីនិត្យមុខម្ហូបនៅតាមផ្សាររួច លោកប៉ោ លាងគង់ រួមជាមួយនិងមន្ត្រីជំនាញមន្ទីរពាណ្ជិកម្មខេត្ត បានធ្វើការចុះពិនិត្យនិងផ្ទៀងផ្ទាត់លើតម្លៃប្រេង នៅតាមស្ថានីយ៏ជាច្រើនកន្លែងនៅតាមបណ្តោយផ្លូវជាតិលេខ ២ បន្ថែមទៀត ដើម្បីជៀសវាងការដាក់លក់ខុសតម្លៃរបស់ស្ថានីយ៍ប្រេង ដែលក្រសួងពាណ្ជិកម្មបានកំណត់ ៕ តាកែវ