នារីអាយុ ២១ ឆ្នាំម្នាក់មកពី Weinan ខេត្ត Shaanxi ភាគពាយព្យនៃប្រទេសចិន បានធ្លាក់ទៅក្នុងសភាពសន្លប់ និងត្រូវបានគេប្រកាសថា ខួរក្បាលនាងបានស្លាប់ បន្ទាប់ពីត្រូវបានចឹកដោយសត្វពស់ពិសដែលនាងបានទិញតាមអ៊ីនធឺណិត ។
យោងតាមប្រភពព័ត៌មាន បានឲ្យដឹងថា ស្ត្រីម្នាក់ដែលគេស្គាល់មានឈ្មោះ Xiaofang ត្រូវបានចឹកដោយពស់ពិសនៅលើដៃឆ្វេង នៅឯផ្ទះរបស់នាងស្ថិតក្នុង Weinan ។ នេះបើយោងតាម South China Morning Post ។
ឪពុកម្តាយរបស់នាងនិយាយថា Xiaofang ក្រោយមក បានស្វែងរករកជំនួយប្រហែល១ម៉ោង បន្ទាប់ពីត្រូវពស់ចឹក ហើយបានប្រាប់ថា នាងមានអាការៈវិលមុខ និងសន្លប់ ។ ជាអកុសល នារីវ័យក្មេងនេះបានធ្លាក់ក្នុងសភាពសន្លប់បាត់បង់ស្មារតី បន្ទាប់ពីនាងត្រូវបានបញ្ជូនទៅមន្ទីរពេទ្យនៅថ្ងៃទី៩ ខែកក្កដា ។
ទោះជាយ៉ាងណា ខាងមន្ទីរពេទ្យមិនមានការផ្តល់ថ្នាំបន្សាបពិសណាមួយ ដើម្បីព្យាបាលពីររបួសចឹករបស់ពស់វែកនោះទេ ដែលជាប្រភេទសត្វដែលមិនមានលក្ខណៈធម្មតានៅក្នុងតំបន់ និងស្ថិតនៅក្នុងបញ្ជីសត្វដែលជិតផុតពូជនៅក្នុងប្រទេសចិន ។
Asia Times បានរាយការណ៍ថា នាងពុំត្រូវបានគេចាក់ថ្នាំបង្ការអ្វីទេ រហូតដល់ពេលល្ងាចជិតយប់ និងបានទទួលការផ្តល់ថ្នាំចំនួន ៤ ផ្សេងគ្នា ដែលត្រូវបានផ្ញើពីមន្ទីរពេទ្យមួយ នៅក្នុងទីក្រុងសៀងហៃ ។
Xiaofang ត្រូវបានគេរាយការណ៍ថា បានទិញពស់នោះតាមរយៈហាងអនឡាញដែលមិនមានបញ្ជាក់ច្បាស់លាស់មួយ ដើម្បីប្រើក្នុងរូបមន្ត «ស្រាពស់» ។ ទោះយ៉ាងណា ដោយសារតែហេតុផលពុំបានដឹងច្បាស់អំពីវា នាងក៏បានសម្រេចរក្សាទុកវាជាសត្វចិញ្ចឹម ។
សេរ៉ូមមិនបានព្យាបាលនាងឲ្យសះស្បើយពីជាតិពិសទេ ។ ក្រោយមក នាងត្រូវបានភ្ជាប់ទៅនឹងម៉ាស៊ីន ដើម្បីជួយនាងដកដង្ហើម ហើយគ្រូពេទ្យបានប្រកាសថា ខួរក្បាលរបស់នាងស្លាប់នៅថ្ងៃទី១១ ខែកក្កដា ។
នៅទីបំផុត Xiaofang ត្រូវបានបញ្ជូនទៅផ្ទះជាមួយឪពុកម្តាយ និងម៉ាស៊ីនអុកស៊ីហ្សែនជំនួយ ។ គ្រួសាររបស់នាងបានបោះបង់ចោលការស្វែងរកជំនួយផ្នែកវេជ្ជសាស្ត្រ សម្រាប់កូនស្រីរបស់ពួកគេ ។
ឪពុកម្តាយរបស់នាងបានប្រាប់ប៉ូលីសថា ពស់នោះបានបាត់ខ្លួន ។ ហើយសត្វនេះត្រូវបានគេរាយការណ៍ថា បានរកឃើញងាប់នៅជិតផ្ទះរបស់គ្រួសារមួយ នៅថ្ងៃដដែលនោះ ។
ឧបទ្ទវហេតុនាពេលថ្មីៗនេះ បានធ្វើឱ្យមានការជជែកវែកញែកលើអ៊ីនធឺណិត ក្នុងចំណោមអ្នកលេងអ៊ិនធើណែត ថាតើរដ្ឋាភិបាលគួរបង្កើនកិច្ចខិតខំប្រឹងប្រែងរបស់ខ្លួនយ៉ាងណា ដើម្បីបញ្ឈប់ការលក់សត្វតាមអនឡាញ ព្រោះច្បាប់ប្រៃសណីយ៍របស់ចិន បានចែងថាការលក់បែបនេះគឺខុសច្បាប់ ។
ទោះបីបែបនេះក៏ដោយ អ្នកលក់អនឡាញជាច្រើន បានបន្តផ្តល់សត្វពស់រស់ដូចជាសត្វពស់, បង្គួច, ខ្ទួយ ឬ ខ្យាដំរី និងកណ្តុរ ផងដែរ ៕ ឧត្តម (ប្រភព៖ Nextshark)