ភ្នំពេញ ៖ លោក ប៊ុន ធី ចៅក្រមស៊ើបសួរសាដំបូងរាជធានីភ្នំពេញ នៅរសៀលថ្ងៃទី១៩ ខែកក្កដា ឆ្នាំ២០១៨នេះ បានចេញដីកាបង្គាប់ឲ្យឃុំខ្លួនជនជាតិចិនចំនួន៣នាក់ ដាក់ពន្ធនាគារ PJ លើករណីវាយប៉ុនប៉ង សម្លាប់ស្ត្រីខ្មែរ នៅខណ្ឌពោធិ៍សែនជ័យ ។
លោក លោក ស៊ិន វីរៈ ព្រះរាជអាជ្ញារងអមសាលាដំបូងរាជធានីភ្នំពេញ បានចោទប្រកាន់បុរសជាតិចិនទាំង៣នាក់ ពីបទ ប៉ុនប៉ងឃាតកម្ម តាមមាត្រា២៧ និងមាត្រា១៩៩ នៃក្រមព្រហ្មទណ្ឌ។
ស្ត្រីរងគ្រោះឈ្មោះ ហង់ ចាន់នី អាយុ២៦ឆ្នាំ មុខរបរបុគ្គលិករោងចក្រស្បែកជើង មានទីលំនៅ ផ្ទះ165Eoz ផ្លូវ93 សង្ហាត់មនោរម្យ ខណ្ឌ៧មករា រងរបួសធ្ងន់ ត្រូវបានបញ្ជូនចូលសង្គ្រោះនៅគ្លីនិកភ្លាមៗ។ ជនរងគ្រោះបើករថយន្តមួយគ្រឿងម៉ាក កាមរីបាឡែន ពណ៌ស ពាក់ស្លាកលេខ ភ្នំពេញ2AN-1659។
ចំណែកជនបង្កជាជនជាតិចិនគ្នា៣នាក់ ក្នុងនោះមានឈ្មោះ ចូ ហ្វីលីប អាយុ៤២ឆ្នាំ ធ្លាប់មានគំនុំជាមួយជនរងគ្រោះ និងបានព្យាយាមលួងលោមចាប់រំលោភជនរងគ្រោះជាច្រើនលើក តែមិនបានសម្រេច។
ក្រុមជនជាតិចិនទាំង៣នាក់នេះ បានយកដែកគាស់ ហើយជិះរថយន្តមួយគ្រឿង ធ្វើសកម្មភាពដេញវាយស្ត្រីរងគ្រោះ នៅពេលដែលនាងកំពុងបើករថយន្ត បំណងចូលទៅហូបបាយនៅហាងកាហ្វេ ក្នុងខណ្ឌពោធិ៍សែនជ័យ កាលពីវេលាម៉ោង១១និង៤៥នាទី ព្រឹកថ្ងៃទី១៣ ខែកក្កដា ឆ្នាំ២០១៨ មុខហាងកាហ្វេតេស្ត ផ្លូវវេងស្រេង ភូមិចោមចៅ២ សង្កាត់ចោមចៅ២ ខណ្ឌពោធិ៍សែនជ័យ។
មុនកើតហេតុ ស្ត្រីរងគ្រោះបើករថយន្ត រួមដំណើរជាមួយស្ត្រីម្នាក់ទៀត បម្រុងចូលទៅហូបបាយនៅហាងកាហ្វេតេស្ត ហើយគ្រាន់តែជនរងគ្រោះចុះពីលើរថយន្ត ស្រាប់តែក្រុមជនបង្ក ប្រដាប់ដោយដែកគាស់ ចំនួន២ដើម បើករថយន្តកាមរីឆ្លាមមកដល់ ធ្វើសកម្មភាពវាយទៅលើស្ត្រីរងគ្រោះ បណ្តាលឲ្យដេកដួលរងរបួសធ្ងន់ ហើយវាយរថយន្តជនរងគ្រោះ បណ្តាលឲ្យបែកកញ្ចក់ខ្ទេចជុំវិញ។
ក្រោយពីធ្វើសកម្មភាពរួច ក្រុមជនដៃដល់បើករថយន្តគេចផ្អើលអស់សមត្ថកិច្ចខណ្ឌពោធិ៍សែនជ័យ ចេញអន្តរាគមន៍ ប្រដេញតាមចាប់ជនបង្ក រហូតដល់ផ្លូវសហព័ន្ធរុស្សីមុខព្រលានយន្តហោះពោធិ៍ចិនតុង ទើបសមត្ថកិច្ចចាប់ឃាត់ខ្លួនបាន៣នាក់ ដកហូតបានវត្ថុតាង មានរថថយន្តរបស់ជនរងគ្រោះ និងដែកគាស់២ដើម ហើយបានកសាងសំណុំរឿងបញ្ជូនមកកាន់តុលាការ តាមនីតិវិធីច្បាប់៕ ដោយ ៖ បញ្ញាស័ក្តិ