ភ្នំពេញ ៖ បុសម្នាក់ដែលកាប់ប្រពន្ធជាច្រើនកាំបិតប៊ិះដាក់កញ្ចឹងក ព្រោះភ្លើងប្រច័ណ្ឌ បណ្ដាលឲ្យប្រពន្ធរងរបួសធ្ងន់ស្ទើរស្លាប់ រួចបានរត់គេចខ្លួនបាត់ស្រមោលជាង១០ថ្ងៃ ត្រូវកម្លាំងនគរបាលព្រហ្មទណ្ឌ រាជធានីភ្នំពេញ សហការជាមួយនគរបាលខេត្តបាត់ដំបង ចាប់ខ្លួនបានហើយ នៅវេលាម៉ោង១១និង២០នាទី ថ្ងៃទី១៩ ខែកក្កដា ឆ្នាំ២០១៨នេះ នៅកន្លែងដែលជននេះលាក់ខ្លួន ស្ថិតក្នុងភូមិបួនជួរ ឃុំបឹងប្រិយ៍ ស្រុកបាណន់ ខេត្តបាត់ដំបង។
បើតាមនគរបាលខេត្តបាត់ដំបង បានឲ្យដឹងថា នៅថ្ងៃទី ១៩ ខែ កក្កដា ឆ្នាំ ២០១៨ អនុវត្តតាមមតិដឹកនាំរបស់ឯកឧត្តមឧត្ថមសេនីយ៍ទោ អ៊ុចសុខុន ស្នងការនៃស្នងការដ្ឋាននគបាលខេត្តបាត់ដំបង ក៏ដូចជាការដឹកនាំបញ្ជាផ្ទាល់របស់លោកឧត្តមសេនីយ៍ត្រី ជេត វណ្ណនី ស្នងការរងទទួលផែនព្រហ្មទណ្ឌ ជនដៃដល់ដែលប៉ុនប៉ង សម្លាប់ប្រពន្ធរបស់ខ្លួនដោយសារភ្លើងប្រច័ណ្ឌនៅសង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ត្រូវបានចាប់ខ្លួនបន្ទាប់ពីជនដៃដល់រូបនេះ រត់គេចខ្លួនមកពួនសំងំនៅក្នុងភូមិសាស្ត្រឃុំស្នឹង ស្រុកបាណន់ ខេត្តបាត់ដំបង ។ កិច្ចប្រតិបត្តិការនេះបានធ្វើឡើង ដោយនគរបាល ជំនាញនៃស្នងការដ្ឋននគរបាលខេត្តបាត់ដំបង ការ សហការណ៍ជាមួយសមត្ថកិច្ចនគរបាលនៃនាយកដ្ឋានព្រហ្មទណ្ឌ អគ្គស្នងការដ្ឋាននគរបាលជាតិ ។
សូមជម្រាបជូនថា កាលពីថ្ងៃទី ៨ ខែ កក្កដា ឆ្នាំ ២០១៨ នៅក្នុងបន្ទប់ជួលស្ថិតក្នុងភូមិព្រៃទា សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ ដោយសារតែភ្លើងប្រច័ណ្ឌជ្រុល ជនដៃដល់ឈ្មោះ ហ៊ាន រិទ្ឋី ភេទប្រុស អាយុ ២៨ ឆ្នាំ មុខរបរកម្មករសំណង់ មានស្រុកកំណើតនៅក្នុងភូមិព្រៃបឹង ឃុំវាលពន់ ស្រុកថ្ពង ខេត្តកំពង់ស្ពឺ ជាប្តីបានប្រើប្រាស់កាំបិតផ្គាក់កាប់ទៅលើប្រពន្ធរបស់ខ្លួនឈ្មោះ ត្រេន ពៅ អាយុ ៣៣ ឆ្នាំមានមុខរបរជាកម្មការិនីរោងចក្រ បណ្តាល ឲ្យរងរបួសធ្ងន់ធ្ងរ និងត្រូវបាននាំទៅសង្គ្រោះនៅមន្ទីរពេទ្យ ។ ក្រោយកើតហេតុ ជនដៃដល់ជាប្តីបានគេចខ្លួនបាត់ ហើយមកសម្ងំលាក់ខ្លួននៅក្នុងមូលដ្ឋានឃុំស្នឹង ស្រុកបាណន់ ខេត្តបាត់ដំបង ឆ្លងតាមរយៈការស្រាវជ្រាវស៊ើបអង្កេត មកដល់ថ្ងៃនេះ ជនដៃដល់ត្រូវបានចាប់ខ្លួន និងបញ្ជូនទៅកាន់សមត្ថកិច្ចនគរបាលនាយកដ្ឋាន ជំនាញចាត់ការតាមនីតិវិធី ។
បើតាមលោក យឹម សារ៉ាន់ អធិការនគរបាលខណ្ឌពោធិ៍សែនជ័យ បានឲ្យដឹងថា ហេតុការណ៍នេះបានកើតឡើង នៅរសៀលថ្ងៃទី៨ ខែកក្កដា ឆ្នាំ២០១៨ នៅក្នុងបន្ទប់ផ្ទះជួល នៅក្នុងភូមិព្រៃទា សង្កាត់ចោមចៅ៣ ដោយបុរសជាប្ដីបានប្រច័ណ្ឌប្រពន្ធរបស់ខ្លួន ជាមួយប្រុសផ្សេង ហើយបានតាមរករឿងនាងជាប្រពន្ធ ជាបន្តបន្ទាប់។ ដោយនៅមុនពេលកើតហេតុ ល្ងាចថ្ងៃទី៧ ខែកក្កដា បុរសជាប្ដីបានចោទថា នាងក្បត់ចិត្តទៅមានប្រុសថ្មី ហើយពេលនោះនាងបានបដិសេធថា អត់មានទេ ស្រាប់តែប្ដីបានយកដែកឆាបចុងស្រួច គំរាមចាក់សម្លាប់នាង ប៉ុន្តែមិនហ៊ានរួចក៏បានស្ងប់ស្ងាត់ទៅវិញ។ លុះដល់ថ្ងៃកើតហេតុ ប្ដីបានរករឿងដោយចោទនាងថា មានប្រុសថ្មីបន្ត ទៀត ចំណែកនាងដែលមិនបានក្បត់ចិត្តប្ដីផង ត្រូវទទួលរងការចោទប្រកាន់ទាំងអយុត្តិធម៌បែបនេះ ក៏បានប្រកែក។ ខណៈនោះប្ដីនៅតែមិនជឿ ហើយក៏បានទាញកាំបិតផ្គាក់ កាប់រូបនាងជាច្រើនកាំបិតប៉ងសម្លាប់រួចគេចខ្លួនបាត់តែម្ដង។ បន្ទាប់មកនាងត្រូវបានអ្នកជិតខាង នាំទៅសង្គ្រោះបន្ទាន់ ហើយប្តីជាជនដៃដល់បានរត់គេចខ្លួន៕ ដោយ ៖ កូឡាប