ប្រទេសអ៊ីតាលីត្រូវបានរិះគន់ បន្ទាប់ពីបានបដិសេធយកសាកសពជនអន្តោរប្រវេសន៍ស្លាប់២នាក់ ដែលបានលង់ទឹកស្លាប់ ខណៈត្រូវបានគេជួញដូរនៅក្នុងសមុទ្រមេឌីទែរ៉ាណេ។ សាកសពស្ត្រីម្នាក់ និងក្មេងម្នាក់ ត្រូវបានរកឃើញចម្ងាយ ៨០ ម៉ាយ ពីឆ្នេរលីប៊ី កាលពីថ្ងៃអង្គារ បន្ទាប់ពីទូករបស់ពួកគេដែលផ្ទុកជនអន្តោប្រវេសន៍ ១៦០ នាក់ ត្រូវបានស្ទាក់ចាប់ដោយអាជ្ញាធរ ។ អង្គការក្រៅរដ្ឋាភិបាល Proactiva Open Arms បានអះអាងថា ស្ត្រីពីរនាក់ និងកូនក្មេងម្នាក់ បានបដិសេធមិនព្រមជិះនាវាលីប៊ី ហើយត្រូវបានគេបោះបង់ចោលនៅក្នុងសមុទ្រ បន្ទាប់ពីឆ្មាំសមុទ្រលីប៊ី បានបំផ្លាញទូកជនអន្តោប្រវេសន៍នោះ ។
ពិតជាអព្ភូតហេតុដ៏អស្ចារ្យណាស់ ម្នាក់ក្នុងចំណោមស្ត្រីទាំងពីរ បាននៅរស់រានមានជីវិត ហើយនាងត្រូវបាននាំយកដោយអ៊ីតាលី ប៉ុន្តែ ប្រទេសនេះបានបដិសេធទទួលយកសាកសពជនអន្តោប្រវេសន៍២នាក់ (ស្ត្រីម្នាក់ និងកូនក្មេង) នោះទេ ។ Proactiva បានសរសេរនៅលើ Twitter ថា៖ “រឿងនេះមិនអាចយល់បានទេថា ហេតុអីបានជាពួកគេយល់ព្រមទទួលយកស្ត្រីម្នាក់ដែលត្រូវបានជួយសង្គ្រោះ ដែលទទួលរងគ្រោះធ្ងន់ធ្ងរពីការលង់ទឹក ប៉ុន្តែ មិនបានបង្ហាញឆន្ទៈដូចគ្នាចំពោះសាកសពទាំងពីរនេះទៅវិញ” ។
រដ្ឋមន្ត្រីក្រសួងមហាផ្ទៃអ៊ីតាលី Matteo Salvini ក៏ឆ្លើយតបទៅនឹងការចោទប្រកាន់នៅលើបណ្តាញសង្គមផងដែរ បន្ទាប់ពីបានអានអត្ថបទមួយ ដោយបានបន្ថែមថា៖ “ជំនួសឱ្យការលើកកម្ពស់ការមកដល់នៅក្នុងអឺរ៉ុប របស់ជនក្រីក្រអាហ្វ្រិកទាំងអស់ នោះកាតព្វកិច្ចរបស់ខ្ញុំចំពោះរដ្ឋាភិបាល គឺគិតគូរដំបូងចំពោះប្រជាជនអ៊ីតាលីក្រីក្ររាប់លាននាក់ ។ តើជាកំហុសមែនទេ?» ។
ស្ថាបនិក និងជានាយកអង្គការនេះ លោក Oscar Capmps បានស្តីបន្ទោសទៅលើកិច្ចសហប្រតិបត្តិការរបស់រដ្ឋាភិបាលអ៊ីតាលី ជាមួយអាជ្ញាធរលីប៊ី ចំពោះការស្លាប់របស់ស្ត្រីម្នាក់ និងកូនក្មេងតូចម្នាក់ ។ លោកបន្តថា៖ «នេះគឺជាផលវិបាកដោយផ្ទាល់មួយ របស់កងជីវពលប្រដាប់ដែលបានសន្យា ដើម្បីធ្វើឲ្យស្ងប់ស្ងៀមដល់ប្រជាជនអឺរ៉ុប ក្នុងជឿជាក់ថាប្រទេសលីប៊ី គឺជារដ្ឋមួយ, រដ្ឋាភិបាលមួយ និងជាប្រទេសដែលមានសុវត្ថិភាពណាស់» ។
ស្របជាមួយគ្នានេះផងដែរ លោក Oscar Camps ក៏បានលើកឡើងនៅលើ Twitter ថា៖ «ទូកនោះត្រូវបានបំផ្លាញ និងបោះបង់ដោយឆ្មាំលីប៊ី» ។
Camps និយាយនៅក្នុងវីដេអូថា៖ «ថ្ងៃនេះ យើងបានរកឃើញសាកសពស្ត្រីម្នាក់ និងកូនក្មេងម្នាក់ ព្រមទាំងស្ត្រីម្នាក់ទៀតដែលនៅតែមានជីវិត ក្នុងចំណោមបំណែកកប៉ាល់រងការបំផ្លាញនោះ» ។
លោកបានបន្ថែមថា៖ «ខ្ញុំចង់ថ្កោលទោសចំពោះការខ្វះខាតជំនួយ ក្នុងដែនទឹកអន្ដរជាតិ និងពួកក្រុមនាវាជួញដូរ ដែលបានបោះបង់ចោលទូកមួយដែលមានគ្រោះថ្នាក់នៅពាក់កណ្តាលយប់បែបនេះ» ។
«ពួកគេមិនចេះគ្រប់គ្រងស្ថានការណ៍អាសន្នដែលពួកគេបានមកដល់យឺត២ថ្ងៃ ហើយបានបោះបង់ចោលស្ត្រី២នាក់ និងកូនក្មេងម្នាក់ នៅក្នុងបំណែកកប៉ាល់ដែលពួកគេបានបំផ្លាញដោយខ្លួនពួកគេ» ៕ ឧត្តម (ប្រភព៖ aljazeera, metro)